ეზეკიელი 35:1—15
-
წინასწარმეტყველება სეირის მთიანი მხარის წინააღმდეგ (1—15).
35 კვლავ მეუწყა იეჰოვას სიტყვა:
2 «კაცის ძეო, მიბრუნდი სეირის მთიანი მხარისკენ+ და იწინასწარმეტყველე მისდა საუბედუროდ.+
3 უთხარი, აი, რას ამბობს-თქო უზენაესი უფალი იეჰოვა: „შენ წინააღმდეგ გამოვდივარ, სეირის მთიანო მხარევ, ხელს აღვმართავ შენზე და გაგაპარტახებ.+
4 შენს ქალაქებს ნანგრევებად ვაქცევ და გაგაუდაბურებ;+ გაიგებ, რომ მე ვარ იეჰოვა.
5 ამ ყოველივეს იმიტომ დაგატეხ, რომ ემტერებოდი+ და მახვილით მუსრავდი ისრაელებს მათი უბედურების დროს, მათი საბოლოო დასჯის დროს.+
6 ჩემს თავს ვფიცავ*, — ამბობს უზენაესი უფალი იეჰოვა, — მოგამზადებ სისხლის ღვრისთვის და სისხლის ღვრა გეწევა.+ სისხლი გძულდა, მაგრამ სისხლის ღვრა გეწევა.+
7 გავაპარტახებ სეირის მთიან მხარეს;+ იქ გამვლელსაც მოვსპობ და მასაც, ვინც იქ დაბრუნდება.
8 დახოცილებით დავფარავ შენს მთებს; მახვილით განგმირულები შენს გორებზე, ველებზე და მდინარეებში ეყრებიან.
9 სამარადისოდ გაგაპარტახებ, აღარასოდეს დასახლდება შენი ქალაქები;+ მაშინ გაიგებთ, რომ მე ვარ იეჰოვა.
10 რაკი ამბობდი, ეს ორი ხალხი და ეს ორი მიწა ჩემი გახდება და ორივე მიწას დავეპატრონებიო,+ მაშინ როცა იეჰოვა იყო იქ,
11 ჩემს თავს ვფიცავ, — ამბობს უზენაესი უფალი იეჰოვა, — ისევე აღვშფოთდები და განგირისხდები, როგორც შენ აღშფოთდი და განურისხდი მათ, ვინც გძულდა.+ როცა გაგასამართლებ, გაიგებენ ისინი, ვინც ვარ.
12 მაშინ გაიგებ, რომ მე, იეჰოვას, მესმოდა, როგორ შეურაცხყოფდი ისრაელის მთებს, როცა ამბობდი, გაპარტახდა და ახლა ჩვენ დავეუფლებითო.
13 ქედმაღლურად ლაპარაკობდი ჩემ წინააღმდეგ, გაუთავებლად ლაპარაკობდი+ და მესმოდა ეს ყველაფერი“.
14 აი, რას ამბობს უზენაესი უფალი იეჰოვა: „მთელი დედამიწა გაიხარებს, როცა გაგაუდაბურებ.
15 რაკი ხარობდი ისრაელის სამკვიდროს გაპარტახებით, შენც იმავეს დაგმართებ;+ გაპარტახდები, სეირის მთიანო მხარევ, გაპარტახდება მთელი ედომი;+ მაშინ გაიგებენ, რომ მე ვარ იეჰოვა“».
სქოლიოები
^ სიტყვასიტყვით — „ცოცხალი ვარ“.
