ეზეკიელი 46:1—24
46 «აი, რას ამბობს უზენაესი უფალი იეჰოვა: „შიდა ეზოს კარიბჭე, აღმოსავლეთს რომ გაჰყურებს,+ დაკეტილი უნდა იყოს+ ექვსი სამუშაო დღე,+ შაბათებსა და ახალმთვარობებზე კი უნდა გაიღოს.
2 თავკაცი გარედან ამ კარიბჭის წინკარის გავლით შემოვა და კარიბჭის წირთხლთან დადგება.+ მღვდლები შესწირავენ მის მოტანილ მთლიანად დასაწვავ მსხვერპლსა და სამშვიდობო მსხვერპლს. ის პირქვე დაემხობა კარიბჭის ზღურბლზე და მერე გარეთ გავა. კარიბჭე საღამომდე არ დაიკეტება.
3 ამ კარიბჭის შესასვლელთან შაბათებსა და ახალმთვარობებზე ამ მიწის მკვიდრნიც დაემხობიან პირქვე იეჰოვას წინაშე.+
4 შაბათ დღეს თავკაცი იეჰოვას მთლიანად დასაწვავ მსხვერპლად წარუდგენს საღ ვერძს და ექვს საღ მამალ თოხლს.+
5 ვერძთან ერთად მიიტანოს 1 ეფა მარცვლეული შესაწირავი, ხოლო მამალ თოხლებთან ერთად იმდენი, რამდენიც შეუძლია. 1 ეფასთან ერთად 1 ჰინი ზეთიც მიიტანოს.+
6 ახალმთვარობის დღეს საქონლიდან შესწიროს საღი მოზვერი, ექვსი მამალი თოხლი და ერთი ვერძი; თითოეული მათგანი საღი უნდა იყოს.+
7 მოზვერთან და ვერძთან ერთად თითო-თითო ეფა მარცვლეული შესაწირავი მიიტანოს, ხოლო მამალ თოხლებთან ერთად იმდენი, რამდენიც შეუძლია. 1 ეფასთან ერთად 1 ჰინი ზეთიც მიიტანოს.
8 თავკაცი კარიბჭის წინკარის გავლით უნდა შემოვიდეს და ამავე გზით უნდა გავიდეს.+
9 როცა ამ მიწის მკვიდრნი დღესასწაულებზე+ იეჰოვას თაყვანსაცემად მოვლენ, ჩრდილოეთი კარიბჭით+ შემოსულები სამხრეთი კარიბჭით+ უნდა გავიდნენ, ხოლო სამხრეთი კარიბჭით შემოსულები — ჩრდილოეთი კარიბჭით. არავინ არ უნდა გავიდეს იმ კარიბჭით, რომლითაც შემოვიდა, მოპირდაპირე კარიბჭით უნდა გავიდეს.
10 ხალხს შორის მყოფი თავკაცი მათი შემოსვლისას შემოვიდეს და მათი გასვლისას გავიდეს.
11 დღესასწაულებზე მან მოზვერთან და ვერძთან ერთად თითო-თითო ეფა მარცვლეული შესაწირავი მიიტანოს, ხოლო მამალ თოხლებთან ერთად იმდენი, რამდენიც შეუძლია. 1 ეფასთან ერთად 1 ჰინი ზეთიც მიიტანოს.+
12 თუ თავკაცი მთლიანად დასაწვავ მსხვერპლს+ ან სამშვიდობო მსხვერპლს იეჰოვას ნებაყოფლობით შესაწირავად წარუდგენს, კარიბჭე, რომელიც აღმოსავლეთს გაჰყურებს, უნდა გააღონ მისთვის; ის ისე წარადგენს მთლიანად დასაწვავ მსხვერპლსა და სამშვიდობო მსხვერპლს როგორც შაბათ დღეს.+ მისი გასვლის შემდეგ კარიბჭე უნდა დაიკეტოს.+
13 ყოველდღიურად მიიყვანე იეჰოვასთვის მთლიანად დასაწვავ მსხვერპლად ერთწლიანი საღი მამალი თოხლი;+ ყოველ დილით მიიყვანე.
14 ამასთან ერთად ყოველ დილით მიიტანე მეექვსედი ეფა მარცვლეული შესაწირავი და მესამედი ჰინი ზეთი წმინდად დაფქულ ფქვილზე მოსასხურებლად, როგორც მარცვლეული შესაწირავი იეჰოვასთვის. ეს არის სამარადისო წესი.
15 ყოველ დილით მიიყვანონ მამალი თოხლი, მიიტანონ მარცვლეული შესაწირავი და ზეთი, როგორც ყოველდღიური მთლიანად დასაწვავი მსხვერპლი“.
16 აი, რას ამბობს უზენაესი უფალი იეჰოვა: „თუ თავკაცი თავის ვაჟებს დაასაჩუქრებს, მემკვიდრეობას მისცემს, ეს მისი ვაჟების საკუთრება გახდება, მემკვიდრეობით მიღებული საკუთრება.
17 თუ იგი თავის ერთ-ერთ მსახურს დაასაჩუქრებს, მემკვიდრეობას მისცემს, ეს მემკვიდრეობა მსახურს გათავისუფლების წლამდე+ ექნება, შემდეგ კი ისევ თავკაცს დაუბრუნდება; მემკვიდრეობა სამუდამოდ მხოლოდ მის ვაჟებს დარჩებათ.
18 თავკაცმა არ უნდა გამოსძალოს ხალხს ქონება, არ უნდა წაართვას მათ მემკვიდრეობა. მან მემკვიდრეობა თავის ვაჟებს თავისი ქონებიდან უნდა გაუნაწილოს, რათა არ გააძევონ ჩემი ხალხი თავ-თავიანთი მიწებიდან“».
19 მან შემიყვანა კარიბჭის გვერდითა შესასვლელით,+ იმ კარიბჭისა, რომელიც მიემართებოდა მღვდლებისთვის განკუთვნილი წმინდა სასადილო ოთახებისკენ, ჩრდილოეთს რომ გაჰყურებს.+ იქ უკან, დასავლეთით, რაღაც ადგილი მოჩანდა.
20 მან მითხრა: „ამ ადგილზე მოხარშავენ მღვდლები დანაშაულის შესაწირავსა და ცოდვის შესაწირავს და გამოაცხობენ მარცვლეულ შესაწირავს,+ რათა არაფერი გაიტანონ გარეთა ეზოში და ხალხი არ განწმინდონ“.+
21 მან გამიყვანა გარეთა ეზოში და ეზოს ოთხივე კუთხე მომატარა. გარეთა ეზოს თითოეული კუთხიდან ეზო მოჩანდა.
22 ეზოს ოთხივე კუთხესთან პატარა ეზოები იყო, სიგრძით 40 წყრთა* და სიგანით 30 წყრთა. ოთხივე ერთი ზომისა იყო.
23 ოთხივე მათგანს დაბალი კედლები ჰქონდა შემოვლებული. კედლების ძირში შესაწირავის მოსახარში ადგილები იყო მოწყობილი.
24 მან მითხრა: „ეს ის ადგილებია, სადაც ტაძრის მსახურები მსხვერპლს ხარშავენ ხალხისთვის“.+
სქოლიოები
^ იგულისხმება გრძელი წყრთა. იხ. დანართი ბ14.
