იაკობის წერილი 2:1—26
2 ჩემო ძმებო, თუ მიკერძოებულნი ხართ, განა გწამთ ჩვენი დიდებული უფალი იესო ქრისტე?+
2 თუ თქვენთან კრებაში შემოდის ოქროსბეჭდებიანი, მდიდრულ ტანსაცმელში გამოწყობილი კაცი და შემოდის ღარიბიც, ჭუჭყიანი ტანსაცმლით,
3 თქვენ კი მდიდრულ ტანსაცმელში გამოწყობილს პატივისცემით ეპყრობით და ეუბნებით, აი აქ, კარგ ადგილზე, დაბრძანდით, ღარიბს კი ეუბნებით, ფეხზე იდექი ან ჩემს ფეხსადგამთან დაჯექიო,+
4 ასე ხომ ერთმანეთს ფენებად ყოფთ+ და ისეთი მოსამართლეები გამოდიხართ, უსამართლო გადაწყვეტილებებს რომ იღებენ?!+
5 მომისმინეთ, ჩემო საყვარელო ძმებო! განა ქვეყნიერების თვალში ღარიბები არ ამოირჩია ღმერთმა, რომ ყოფილიყვნენ რწმენით მდიდრები+ და სამეფოს მემკვიდრეები, რომელსაც ის თავის მოყვარულებს დაჰპირდა?!+
6 თქვენ კი შეურაცხყოფთ ღარიბებს. განა მდიდრები არ გჩაგრავენ+ და მიგათრევენ სასამართლოებში?!
7 განა ისინი არ გმობენ იმ დიდებულ სახელს, რომლითაც იწოდებით?!
8 თუ აღმატებულ კანონს* ისე ასრულებთ, როგორც დაწერილია: „მოყვასი საკუთარი თავივით გიყვარდეს“, კარგია,+
9 მაგრამ, თუ ისევ მიკერძოებულნი ხართ,+ სცოდავთ; კანონი გამხელთ დანაშაულში.+
10 თუ მთელი კანონის დამცველი ერთ-ერთ მცნებას არღვევს, ყველაფერში დამნაშავე გამოდის.+
11 მან, ვინც თქვა: „არ იმრუშო“,+ ისიც თქვა, რომ „არ მოკლა“,+ და, თუ არ მრუშობ, მაგრამ კლავ, კანონს არღვევ.
12 მაშ, ისე ილაპარაკეთ და მოიქეცით, როგორც იმ ხალხს შეჰფერის, რომელიც თავისუფალი ხალხის კანონით გასამართლდება.+
13 ვინც გულმოწყალე არ არის, გულმოწყალების გარეშე გასამართლდება.+ გულმოწყალება იმარჯვებს გასამართლებაზე.
14 ჩემო ძმებო, თუ ვინმე ამბობს, რწმენა მაქვსო, მაგრამ მის რწმენას საქმეები არ ახლავს, რა აზრი აქვს ასეთ რწმენას?+ განა იხსნის მას?!+
15 თუ ძმა ან და შიშველია და დღიური საზრდო აკლია,
16 რომელიმე თქვენგანი კი ეუბნება, აბა მშვიდობით, თავი არ მოიმშიო და არ შეიციოო, მაგრამ არაფრით ეხმარება, რა აზრი აქვს ამის თქმას?!+
17 რწმენაც ასეა, თუ საქმეები არ ახლავს თან, მკვდარია.+
18 ვიღაცამ შეიძლება გითხრათ: „შენ რწმენა გაქვს, მე კი — საქმეები. მაჩვენე შენი რწმენა საქმეების გარეშე, მე კი საქმეებით გაჩვენებ ჩემს რწმენას“.
19 ხომ გწამთ, რომ ღმერთი ერთია? კარგია. თუმცა ეს დემონებსაც სწამთ და კანკალებენ.+
20 უგუნურნო, ნუთუ არ გესმით, რომ რწმენა საქმეების გარეშე ფუჭია?!
21 განა მამაჩვენი აბრაამი საქმეებით არ იქნა მიჩნეული მართლად, როცა თავის ძეს, ისაკს, სამსხვერპლოზე სწირავდა?!+
22 როგორც ხედავთ, აბრაამის რწმენას თან ახლდა საქმეები და მისი რწმენა მისმა საქმეებმა სრულყო.+
23 ამით შესრულდა დაწერილი: „აბრაამი ერწმუნა იეჰოვას* და ეს სიმართლედ ჩაეთვალა“,+ და მას იეჰოვას* მეგობარი ეწოდა.+
24 როგორც ხედავთ, ადამიანი საქმეებით იქნება მართლად მიჩნეული და არა მხოლოდ რწმენით.
25 განა მეძავი რახაბიც საქმეებით არ იქნა მართლად მიჩნეული, როცა გულთბილად მიიღო მაცნეები და მერე სხვა გზით გაუშვა?!+
26 ასე რომ, როგორც სხეულია მკვდარი სულის* გარეშე,+ ისე რწმენაა მკვდარი საქმეების გარეშე.+
სქოლიოები
^ სიტყვასიტყვით — „სამეფო კანონს“.
^ იხ. დანართი ა5.
^ იხ. დანართი ა5.
^ ბერძნ. „პნევმა“. იხ. „სული“ („ბიბლიურ სიტყვათა განმარტებანი“).
