იესო ნავეს ძე 11:1—23
11 შეიტყო ეს ამბები ხაცორის მეფე იაბინმა და მაშინვე მაცნეები გაუგზავნა მადონის მეფე+ იობაბს, შიმრონის მეფეს, აქშაფის მეფეს,+
2 მეფეებს, რომლებიც ცხოვრობდნენ მთაში ჩრდილოეთით, ველზე ქინერეთის სამხრეთით, შეფელაში და დორის+ მაღლობებზე დასავლეთით,
3 ქანაანელებს+ აღმოსავლეთითა და დასავლეთით, ამორეველებს,+ ხეთელებს, ფერიზელებს, იებუსელებს მთაში და ხიველებს+ ხერმონის+ ძირას, მიცფის მიწაზე.
4 გამოვიდნენ ისინი, ზღვის ქვიშასავით ურიცხვნი, მთელი თავიანთი ჯარებით, უამრავი ცხენითა და საომარი ეტლით.
5 შეხვედრა დათქვეს მეფეებმა, წამოვიდნენ და მერომის წყლებთან დაბანაკდნენ ისრაელთან შესაბრძოლებლად.
6 უთხრა იეჰოვამ იესო ნავეს ძეს: „ნუ შეგეშინდება მათი,+ რადგან ხვალ ამ დროს დახოცილებს ჩავუგდებ მათ ხელში ისრაელს. მყესები გადაუჭერი მათ ცხენებს+ და ცეცხლში დაწვი მათი ეტლები!“
7 იესო მთელ მეომარ ხალხთან ერთად მიადგა მათ მერომის წყაროებთან და მოულოდნელად დაესხა თავს.
8 ხელში ჩაუგდო ისინი იეჰოვამ ისრაელს;+ დაამარცხეს და სდიეს დიდ სიდონამდე,+ მისრეფოთ-მაიმამდე+ და აღმოსავლეთით მიცფეს ველამდე; ხოცეს ისინი, სანამ მუსრი არ გაავლეს.+
9 ისე მოექცა მათ იესო, როგორც იეჰოვამ უბრძანა: მათ ცხენებს მყესები გადაუჭრა და მათი ეტლები ცეცხლში დაწვა.+
10 გამობრუნდა იესო ნავეს ძე, დაიპყრო ხაცორი და მახვილით მოკლა მისი მეფე,+ რადგან ხაცორი იმ სამეფოების მთავარი ქალაქი იყო.
11 მახვილით დახოცეს და გაანადგურეს ყველა იქ მყოფი;+ არცერთი სულდგმული არ დაუტოვებიათ ცოცხალი,+ რის შემდეგაც იესომ ცეცხლს მისცა ხაცორი.
12 ხელში ჩაიგდო იესომ იმ მეფეთა ყველა ქალაქი, თავად მეფეები კი მახვილით ამოხოცა.+ გაანადგურა მან ისინი,+ როგორც იეჰოვას მსახურ მოსეს ჰქონდა ნაბრძანები.
13 თუმცა ისრაელს, ხაცორის გარდა, მაღლობებზე არცერთი ქალაქი არ გადაუწვავს; მხოლოდ ის გადაწვა იესომ.
14 წამოიღეს ნადავლი ისრაელებმა იმ ქალაქებიდან და წამოასხეს პირუტყვი,+ ხალხი კი მანამდე ხოცეს მახვილით, სანამ ყველა არ გაანადგურეს.+ არცერთი სულდგმული არ დაუტოვებიათ ცოცხალი.+
15 როგორც იეჰოვამ უბრძანა თავის მსახურ მოსეს, მოსემ კი — იესოს,+ ისე გააკეთა იესომ; არცერთი სიტყვა არ დაუტოვებია შეუსრულებელი იქიდან, რაც იეჰოვამ უბრძანა მოსეს.+
16 დაიპყრო იესომ მთელი ის მიწა, მთიანი მხარე, მთელი ნეგები,+ გოშენის მთელი მიწა, შეფელა,+ არაბა+ და ისრაელის მთიანი მხარე დაბლობიანად,
17 სეირამდე რომ ადის ხალაკის მთა, იქიდან მოყოლებული ბაალ-გადამდე,+ რომელიც ლიბანის ველზე, ხერმონის მთის+ ძირასაა; შეიპყრო მათი მეფეები და დახოცა.
18 დიდხანს ებრძოდა იესო იმ მეფეებს.
19 გაბაონის გარდა, რომელიც ხიველებით იყო დასახლებული, არცერთ ქალაქს არ დაუდია ზავი ისრაელებთან.+ დანარჩენი ქალაქები ისრაელებმა ბრძოლით აიღეს.+
20 იეჰოვამ გააჯიუტა+ ეს ხალხები*, რომ შებრძოლებოდნენ ისრაელს, რათა მას დაუნანებლად გაენადგურებინა ისინი;+ როგორც იეჰოვამ უბრძანა მოსეს, უნდა გაეწყვიტათ ეს ხალხები.+
21 მაშინ აღგავა იესომ ანაკიმები+ მთიანი მხარიდან, ხებრონიდან, დებირიდან, ანაბიდან, იუდასა და ისრაელის მთიანი მხარეებიდან. ქალაქებიანად გაანადგურა იესომ ისინი.+
22 ანაკიმთაგან არავინ დარჩენილა ისრაელების მიწაზე. ისინი მხოლოდ ღაზაში,+ გათში+ და აშდოდში+ დარჩნენ.+
23 ასე აიღო იესომ მთელი ის მიწა, როგორც მოსეს დაჰპირდა იეჰოვა.+ შემდეგ ტომების მიხედვით დაუნაწილა ის იესომ ისრაელს სამკვიდროდ,+ და მშვიდობა ჩამოვარდა იმ მიწაზე.+
სქოლიოები
^ სხვაგვარად — „იეჰოვამ დაუშვა, გული გაჯიუტებოდათ ამ ხალხებს“.
