კოლოსელების მიმართ 4:1—18
4 ბატონებო, თქვენს მონებს კარგად და სამართლიანად მოექეცით, რადგან იცით, რომ თქვენც გყავთ ბატონი ზეცაში.+
2 გამუდმებით ილოცეთ,+ იფხიზლეთ და მადლობა შესწირეთ ღმერთს.+
3 ჩვენთვისაც ილოცეთ,+ რომ ღმერთმა გზა გაგვიხსნას მისი სიტყვის საქადაგებლად, რათა გავაცხადოთ წმინდა საიდუმლო ქრისტეს შესახებ, რომლისთვისაც ბორკილდადებული ვარ,+
4 და ეს ისე ვაკეთო, როგორც მმართებს.
5 გარეშეებთან ბრძნულად მოიქეცით. გონივრულად გამოიყენეთ დრო*.+
6 თქვენი საუბარი ყოველთვის მადლიანი იყოს,+ მარილით შეზავებული, რათა იცოდეთ, ვის როგორი პასუხი გასცეთ.+
7 ჩემს ამბებს ტიქიკე+ მოგიყვებათ, ჩემი საყვარელი ძმა და ერთგული მსახური, ჩვენსავით უფლის მონა.
8 მას იმიტომ გიგზავნით, რომ გაგაგებინოთ, როგორ ვართ, და განუგეშოთ.
9 ის ონისიმესთან,+ ჩემს ერთგულ და საყვარელ ძმასთან, თქვენებურ კაცთან ერთად მოდის; აქაურ ამბებს ისინი მოგიყვებიან.
10 მოკითხვას გითვლიან არისტარქე,+ რომელიც ჩემთან ერთადაა დაპატიმრებული, და ბარნაბას ბიძაშვილი მარკოზი,+ რომლის შესახებაც მოგეცით მითითება, თბილად დახვდით,+ თუკი თქვენთან ჩამოვა-მეთქი,
11 აგრეთვე იესო, რომელსაც იუსტუსსაც ეძახიან; ესენი, ყველანი, წინადაცვეთილნი არიან და მხოლოდ ისინი იღვწიან ჩემთან ერთად ღვთის სამეფოსთვის; ისინი არიან ჩემთვის ნუგეში.
12 მოკითხვას გითვლით ქრისტე იესოს მონა ეპაფრაც,+ თქვენებური კაცი, რომელიც დაუღალავად ლოცულობს თქვენთვის, რათა ბოლომდე დარჩეთ მოწიფულნი და იმაში მტკიცედ დარწმუნებულნი, რომ ღმერთი სრულად შეასრულებს თავის ნებას.
13 გარწმუნებთ, რომ ის თავს არ ზოგავს არც თქვენთვის და არც ლაოდიკეელთა და ჰიერაპოლისელთათვის.
14 მოკითხვას გითვლიან საყვარელი ძმა, ექიმი ლუკა,+ და დემასი.+
15 მომიკითხეთ ლაოდიკეელი ძმები, აგრეთვე ნიმფა და კრების წევრები, მის სახლში რომ იკრიბებიან.+
16 როცა ამ წერილს თქვენთან წაიკითხავთ, იზრუნეთ, რომ ის ლაოდიკეელთა კრებაშიც წაიკითხონ,+ ხოლო ლაოდიკეელებისთვის გაგზავნილი წერილი თქვენთანაც წაიკითხეთ.
17 არქიპეს+ კი ასე უთხარით, ძალ-ღონეს ნუ დაიშურებ იმ საქმისთვის, უფალმა რომ მოგანდო-თქო.
18 მე, პავლე, საკუთარი ხელით გწერთ მოკითხვას.+ გახსოვდეთ ბორკილდადებული პატიმარი ვარ.+ ღვთის წყალობა არ მოგკლებოდეთ!
სქოლიოები
^ სიტყვასიტყვით — „იყიდეთ დრო“.
