იეჰოვას მოწმეებს ასეთი მრავალფეროვანი ციფრული პუბლიკაციები და ვიდეოები არასოდეს გვქონია. მაგრამ მსოფლიოს ბევრ ქვეყანაში ჩვენს და-ძმებს ხელი არ მიუწვდებათ ინტერნეტზე. ზოგი კი ისეთ ადგილას ცხოვრობს, სადაც ინტერნეტის დაფარვის ზონა სუსტია, ძალიან ნელია ან საერთოდ არ არის.

 თუმცა ბევრ ჩვენს და-ძმას ახლა უკვე შეუძლია ჩამოტვირთოს ციფრული ლიტერატურა ინტერნეტის გარეშე. საინტერესოა, როგორ.

 JW ბოქსი არის პატარა მოწყობილობა, რომლის გამოყენებითაც სულიერი საზრდო მიეწოდება იმ კრებებს, სადაც ინტერნეტის მიწოდება შეზღუდულია. ამ ყუთში ჩამონტაჟებულია კომერციული ფირმისგან შეძენილი როუტერი, ბეთელის კომპიუტერული განყოფილების მიერ შემუშავებული პროგრამული უზრუნველყოფა და jw.org-ზე განთავსებული ციფრული პუბლიკაციები და ვიდეოები. ერთი ასეთი ყუთი დაახლოებით 75 აშშ დოლარი ჯდება.

 დარბაზებში და-ძმები თავიანთ მობილურ მოწყობილობებს JW ბოქსთან აკავშირებენ და ელექტრონულ პუბლიკაციებსა და ვიდეოებს ტვირთავენ. ამის გაკეთება შეუძლიათ მათაც, ვისაც ძველი ან დაბალფასიანი მოწყობილობები აქვთ. მაგრამ თუ კრებას არ აქვს ინტერნეტზე წვდომა, როგორ ხდება JW ბოქსის განახლება? ფილიალი პერიოდულად მეხსიერების ბარათების მეშვეობით უგზავნის კრებებს ახალ ციფრულ პუბლიკაციებს, რომელთა გადატვირთვაც შესაძლებელია JW ბოქსში. ეს ბარათები დაახლოებით 4 აშშ დოლარი ღირს.

 რა დახმარებას უწევს JW ბოქსი ჩვენს და-ძმებს? ნათან ადრუანდრა, რომელიც კონგოს დემოკრატიულ რესპუბლიკაში ცხოვრობს, ამბობს: «დიდი ხნის განმავლობაში ვცდილობდი, ჩამომეტვირთა ფილმები „იეჰოვა, შენ მოგენდობი!“ და „გახსოვდეთ ლოტის ცოლი“, მაგრამ ვერ ვახერხებდი და გულდაწყვეტილი ვიყავი. ახლა უკვე შემიძლია ტელეფონში ჩამოვტვირთო ეს ფილმები, რაც მე და ჩემს მეუღლეს დაგვეხმარება, უკეთესად ვასწავლოთ შვილებს».

 ნიგერიაში მცხოვრები ერთი ძმა, რომელიც კრებებს ეხმარება JW ბოქსით სარგებლობაში, აღნიშნავს: «ძმები ამ მოწყობილობას იეჰოვასგან ბოძებულ განსაკუთრებულ საჩუქრად მიიჩნევენ. ისინი უზომოდ გახარებულები არიან, რადგან ახლა უკვე ადვილად შეუძლიათ პუბლიკაციებისა და ვიდეოების ჩამოტვირთვა განყოფილებიდან, „სწავლებაში დამხმარე საშუალებები“».

 1 700-ზე მეტი JW ბოქსი უკვე გაეგზავნა აფრიკის, ოკეანეთისა და სამხრეთ ამერიკის კრებებს და იგეგმება მათი გაცილებით მეტ ადგილას გაგზავნა. როგორ იფარება ამ ყველაფრის ხარჯები? მსოფლიო სამქადაგებლო საქმიანობისთვის გაღებული შესაწირავებით, რომელთა გადარიცხვაც უმეტესად ხდება ვებგვერდის donate.pr418.com-ის მეშვეობით. დიდ მადლობას გიხდით თქვენი გულუხვი შესაწირავებისთვის.