წმინდა წერილებიდან ვიგებთ, რა შესანიშნავ თვისებებს ფლობს ღმერთი, რაც მისი გაცნობის საშუალებას გვაძლევს. მაგალითად, ვიგებთ, რომ ღმერთს ოთხი ძირითადი თვისება აქვს: ძალა, სამართლიანობა, სიბრძნე და სიყვარული. მოდი განვიხილოთ თითოეული მათგანი.

იეჰოვამ უთხრა აბრაამს: „მე ყოვლისშემძლე ღმერთი ვარ“ (დაბადება 17:1). ის განუზომელ და უსაზღვროდ დიდ ძალას ფლობს. სწორედ ამ ძალით შექმნა ღმერთმა მთელი სამყარო.

ღმერთი არასოდეს იყენებს ბოროტად თავის ძალას. ის ყოველთვის მიზნობრივად და მოზომილად იყენებს მას. რასაც თავისი ძალით აკეთებს, ყველაფერში სრულყოფილად ჩანს, სამართლიანობა, სიბრძნე და სიყვარული.

იეჰოვა ძალას არ იშურებს თავისი ერთგული მსახურების სასიკეთოდ. „იეჰოვას თვალები აკვირდება მთელ დედამიწას, რომ თავისი ძალით დაეხმაროს მათ, ვინც მთელი გულით ემსახურება“ (2 მატიანე 16:9). განა არ გიჩნდებათ სურვილი, რომ ასეთ ძლევამოსილ და მზრუნველ ღმერთს დაუახლოვდეთ?!

„იეჰოვა სამართლიანობის მოყვარულია“ (ფსალმუნი 37:28). ის ყოველთვის სწორად მოქმედებს და თავის სრულყოფილ ნორმებს არ გადადის.

ღმერთს სძულს უსამართლობა. ის „მიუკერძოებელია და ქრთამს არ იღებს“ (კანონი 10:17). ღმერთი განსჯის მჩაგვრელებს და მხარში უდგას ყველა დაჩაგრულს, მათ შორის, ქვრივ-ობლებს (გამოსვლა 22:22). ის არავის მიმართ ავლენს მიკერძოებას: „ღმერთი მიუკერძოებელია და ყოველ ხალხში მისი მოშიში და სიმართლის მქნელი მოსაწონია მისთვის“ (საქმეები 10:34, 35).

იეჰოვას სამართალი სრულყოფილია. ის არც ზედმეტად ლმობიერია და არც ზედმეტად მკაცრი. ის სჯის მოუნანიებელ შემცოდველებს, მაგრამ მოწყალებას ავლენს მათ მიმართ, ვინც ინანიებს. „იეჰოვა გულმოწყალე და თანამგრძნობია, სულგრძელია და ურყევია მისი სიყვარული. არც მუდმივად დაგდებს ბრალს და არც მარადიულად გაგინაწყენდება. ჩვენი ცოდვებისამებრ არ მოგვკითხა და არც დანაშაულისთვის მოგვიზღა საკადრისი“ (ფსალმუნი 103:8—10). ღმერთს ყოველთვის ახსოვს თავისი მსახურების ერთგულება და აჯილდოებს მათ. განა ასეთი სამართლიანი ღმერთი ჩვენს ნდობას არ იმსახურებს?!

იეჰოვა სიბრძნის წყაროა. „რა განუზომელია ღვთის გულუხვობა, სიბრძნე და ცოდნა!“ (რომაელები 11:33). ის უსაზღვრო და შეუდარებელ სიბრძნეს ფლობს.

ღვთის სიბრძნე მის შემოქმედებაში ჩანს. „რაოდენ მრავალია შენი საქმენი, იეჰოვა! ყოველივე სიბრძნით შექმენი“, — აღფრთოვანებას ვერ მალავდა ფსალმუნმომღერალი (ფსალმუნი 104:24).

ღვთის სიბრძნე წმინდა წერილებიდანაც კარგად ჩანს. მეფე დავითმა დაწერა: „იეჰოვას რჩევა სანდოა, დააბრძენებს გამოუცდელს“ (ფსალმუნი 19:7). წარმოიდგინეთ, რა უნიკალური შესაძლებლობა გეძლევათ, ისწავლოთ ყოვლადბრძენი ღმერთისგან. მთავარია, თქვენ თუ გამოიყენებთ ამ შესაძლებლობას.

იეჰოვას ძირითადი თვისება სიყვარულია. „ღმერთი სიყვარულია“, — ნათქვამია წმინდა წერილებში (1 იოანე 4:8). ის ყველაფერს სიყვარულით აკეთებს.

 ღმერთი მრავალმხრივ ავლენს ჩვენ მიმართ სიყვარულს. მაგალითად, წმინდა წერილი ამბობს: „გაძლევდათ წვიმას ციდან და უხვ მოსავალს, არ გაკლებდათ სარჩოს და სიხარულით გივსებდათ გულებს“ (საქმეები 14:17). მართლაც, „ყოველი კარგი ძღვენი და ყოველი სრულყოფილი საბოძვარი ზემოდან, ციურ მნათობთა მამისგანაა“ (იაკობი 1:17). თავისი ფასდაუდებელი საჩუქრის, წმინდა წერილების, მეშვეობით ღმერთი თავს გვაცნობს და სიყვარულით ნაკარნახევ კანონებსა და პრინციპებს გვასწავლის. „შენი სიტყვა ჭეშმარიტებაა!“ — უთხრა იესომ ლოცვაში ღმერთს (იოანე 17:17).

ღმერთი პრობლემების დროსაც გვეხმარება. „იეჰოვას მიანდე შენი ტვირთი და ის ამოგიდგება მხარში, ის არასოდეს დაუშვებს მართლის დაცემას“ (ფსალმუნი 55:22). ის გვპატიობს ცოდვებს. „იეჰოვა, რაოდენ კარგი და მიმტევებელი ხარ; სიყვარულს არ იშურებ მისთვის, ვინც გიხმობს“ (ფსალმუნი 86:5). ის მარადიულ სიცოცხლესაც გვპირდება. „მოსწმენდს მათ ყოველ ცრემლს თვალებიდან და აღარ იქნება სიკვდილი, აღარც გლოვა, გოდება და ტკივილი“ (გამოცხადება 21:4). თქვენ როგორ მოიქცევით? უპასუხებთ ღვთის სიყვარულს სიყვარულითვე?

ღმერთს უნდა, რომ კარგად იცნობდეთ. ღვთის სიტყვა მოგვიწოდებს: „დაუახლოვდით ღმერთს და ისიც დაგიახლოვდებათ“ (იაკობი 4:8). თავის ერთგულ წინასწარმეტყველ აბრაამს ღმერთმა მეგობარი უწოდა (ესაია 41:8). იეჰოვას სურს, რომ თქვენც დაუმეგობრდეთ მას.

რაც უფრო კარგად გაიცნობთ ღმერთს, მით უფრო დაუახლოვდებით მას და თავს უფრო ბედნიერად იგრძნობთ. „ბედნიერია კაცი . . . [რომელსაც] იეჰოვას კანონი ანიჭებს სიამოვნებას და კითხულობს მას დღედაღამ“ (ფსალმუნი 1:1, 2). ამიტომ, შეისწავლეთ წმინდა წერილები; იფიქრეთ ღვთის თვისებებსა და საქმეებზე; თუ ნასწავლს ცხოვრებაში გამოიყენებთ, ღმერთს სიყვარულს დაუმტკიცებთ. „ღვთის სიყვარული ისაა, რომ ვიცავდეთ მის მცნებებს; მისი მცნებები დამამძიმებელი არ არის“ (1 იოანე 5:3). ილოცეთ ფსალმუნმომღერლის მსგავსად: „მაუწყე შენი გზები, იეჰოვა, მასწავლე შენი ბილიკებით სიარული! მატარე შენი ჭეშმარიტებით“ (ფსალმუნი 25:4, 5). მაშინ თავად დარწმუნდებით, რომ ღმერთი „არცერთი ჩვენგანისგან არ არის შორს“ (საქმეები 17:27).