ძვირფასო და-ძმებო!

ძვ. წ. მე-7 საუკუნეში წინასწარმეტყველმა ეზეკიელმა იხილა გასაოცარი ხილვა. მან იხილა უზარმაზარი ზეციერი ეტლი, რომელსაც მართავდა სამყაროს უზენაესი მმართველი. ყველაზე შთამბეჭდავი ამ ხილვაში ის იყო, თუ როგორ გადაადგილდებოდა ეს ეტლი. ის ელვის სისწრაფით მოძრაობდა მაშინაც კი, როცა მიმართულებას იცვლიდა; მოძრაობისას არც სვლას ანელებდა და არც ტრიალდებოდა (ეზეკ. 1:4, 9, 12, 14, 16—27).

ეს ხილვა შეგვახსენებს, რომ იეჰოვას ორგანიზაციის ზეციერი ნაწილი არასდროს ჩერდება. რის თქმა შეიძლება მიწიერ ნაწილზე? გასული სამსახურებრივი წელი იმის აშკარა მტკიცებაა, რომ იეჰოვას ორგანიზაციის მიწიერი ნაწილიც გასაოცარი სისწრაფით მოძრაობს!

ამჟამად შეერთებულ შტატებში ბეთელის ოჯახის წევრები ბრუკლინიდან უორიკში (ნიუ-იორკი) გადადიან, სადაც ახალი მსოფლიო მთავარი სამმართველო განთავსდა; ბევრი მათგანი ფილიალის სხვა კომპლექსებში გადადის ან ველზე განაგრძობს მსახურებას. გარდა ამისა, მსოფლიოს სხვადასხვა ქვეყნის რამდენიმე ფილიალი თუ განყოფილება ერთიანდება; აგრეთვე ბევრ ბეთელში მიმდინარეობს სამშენებლო თუ სარემონტო სამუშაოები; ზოგ ბეთელელს ერთი ადგილიდან მეორეზე გადასვლა უწევს. რა შეიძლება ითქვას თქვენზე? იმ შემთხვევაშიც კი, თუ პირდაპირი გაგებით არსად გადადიხართ, ეჭვგარეშეა, რომ თქვენც აქტიურად ხართ ჩაბმული საქმეში.

 ხელმძღვანელი საბჭოს თითოეულ წევრს გულს უხარებს, რომ მთელ მსოფლიოში ღვთის ხალხი ახლა, ისე როგორც არასდროს, ფეხს უწყობს იეჰოვას ორგანიზაციას. ბევრი ისეთ ტერიტორიებზე ქადაგებს, სადაც მაუწყებლებზე დიდი მოთხოვნილებაა; სხვები უცხოენოვან ტერიტორიაზე საქადაგებლად გადადიან. ზოგმა ახალი მეთოდებით დაიწყო ქადაგება, ბევრმა კი სხვა მხრივ გააფართოვა მსახურება. ყველა ერთგული ქრისტიანი, მათ შორის ხანდაზმული თუ სუსტი ჯანმრთელობის მქონე, დაუღალავად განაგრძობს სიცოცხლის გზაზე რბოლას — ისინი კვლავაც მთელი შემართებით მსახურობენ და ამგვარად ფარდას ხდიან სატანის სიცრუეს (1 კორ. 9:24).

დარწმუნებული იყავით, რომ თქვენი სულისკვეთება შეუმჩნეველი არ რჩება ჩვენს ზეციერ მამას, იეჰოვას (ებრ.  6:10). თქვენ ისეთივე მზადყოფნის სულს ავლენთ, როგორსაც აბრაამი და სარა. აბრაამი 70 წელს იყო გადაცილებული, როცა დატოვა ქალდეველთა ქალაქი ური და ოჯახთან ერთად შორეული ქანაანისკენ აიღო გეზი, სადაც დარჩენილი ასი წლის გატარება კარვებში მოუწევდათ. მართლაც რა კარგი მაგალითი დაგვიტოვეს აბრაამმა და მისმა ძვირფასმა მეუღლემ! (დაბ. 11:31; საქ. 7:2, 3).

თქვენც ავლენთ მსგავს სულს? რა თქმა უნდა! მიუხედავად იმისა, რომ ამ მეტად მძიმე დროში მოთმინებით იტანთ არაერთ სირთულეს, თითოეული თქვენგანი იესოს სიტყვების თანახმად იქცევით. მან თქვა: „წადით და მოწაფეებად მოამზადეთ ხალხი ყველა ერიდან, მონათლეთ ისინი მამის, ძისა და წმინდა სულის სახელით“ (მათ. 28:19).

იესოს მიერ გამოყენებული სიტყვაც „წადით“ იმაზე მიანიშნებს, რომ უნდა ვიმოქმედოთ. რა სასიამოვნოა იმის დანახვა, თუ რამდენ რამეს მიაღწიეს გასულ წელს ქრისტეს ერთგულმა მიმდევრებმა. აშკარაა, რომ ქადაგების საქმეს იეჰოვა აკურთხებს, რომლის წყალობითაც სამეფოს შესახებ სასიხარულო ცნობა ყველა ერს ეუწყება მთელი დედამიწის ზურგზე (მარ. 13:10).

სასიხარულოა, რომ მრავალი ეხმაურება ამ ცნობას. გასულ წელს მაუწყებლების უმაღლესმა რიცხვმა 8 340 847-ს მიაღწია, ხოლო ბიბლიის შესწავლების რაოდენობა ყოველთვე საშუალოდ 10 115 264-ს შეადგენდა. ერთი რამ ნათელია: ზეციერი ეტლი მოძრაობაშია და თქვენც ფეხს უწყობთ მას! კვლავაც გულმოდგინედ განაგრძეთ ამ მნიშვნელოვანი საქმის კეთება, სანამ ჯერ კიდევ არის ამის დრო!

მართლაც რომ დროულია 2017 წლის მუხლი: „მიენდე იეჰოვას და კარგი აკეთე“ (ფსალმ. 37:3). ამ სიტყვების თანახმად,  თუ კარგს აკეთებთ და იეჰოვას წმინდა მსახურებას უსრულებთ, ამით ნდობას უცხადებთ მას. ნურასდროს დაგავიწყდებათ, რომ თქვენ მარტო არა ხართ! იესო ყოველთვის შეასრულებს თავის პირობას: „და აი, მე ყოველდღე თქვენთან ვარ ქვეყნიერების აღსასრულამდე“ (მათ. 28:20).

გულდაჯერებული იყავით, რომ იეჰოვა კვლავაც გაკურთხებთ ერთგულებისთვის! იმის მიუხედავად, ბევრს აკეთებთ თუ ცოტას, მთავარია, საუკეთესო გაიღოთ იეჰოვასთვის და ეს სწორი მოტივით გააკეთოთ. სწორედ ამას მოელის იეჰოვა თქვენგან! მას გული სიხარულით ევსება, როცა ასეთ ძღვენს ვიღებთ მისთვის (2 კორ. 9:6, 7). ასე რომ, კვლავ მიმართეთ ლოცვით თქვენს მოსიყვარულე მამას, იეჰოვას, განაგრძეთ მისი სიტყვის კვლევა, ქრისტიანულ შეხვედრებზე დასწრება და აქტიურად მსახურება და, ამგვარად, დაუახლოვდით მას.

სანამ ეს მცირე დრო, რომელიც სატანას დარჩა, ამოიწურება, ეს ბოროტი არსება ყველანაირად შეეცდება, რომ გზა აგვიბნიოს და იეჰოვას ჩამოგვაშოროს (გამოცხ. 12:12). ამიტომ მაგრად ჩასჭიდეთ იეჰოვას ხელი და სატანა ვერას დაგაკლებთ! (ფსალმ. 16:8). არასდროს შეგეპაროთ ეჭვი ჩვენს სიყვარულში. ძალიან ვაფასებთ, რომ ამ ბოლო დღეებში მხარს უჭერთ ღვთის სამეფოს მეფეს და თავდაუზოგავად შრომობთ სამეფოს საქმის წინსვლისთვის.

თქვენი ძმები,

იეჰოვას მოწმეების ხელმძღვანელი საბჭო