რას ან ვის შეიძლება შევადაროთ სინდისი?

•   კომპასს

•   სარკეს

•   მეგობარს

•   მოსამართლეს

 ოთხივე პასუხი სწორია. ამ სტატიიდან გავიგებთ, რატომ შეგვიძლია ამის თქმა.

•  რა არის სინდისი?

•  რატომ სჭირდება სინდისს გაწაფვა?

•  როგორ შეგიძლია ამის გაკეთება?

•  რას ამბობენ შენი თანატოლები

 სინდისი არის საკუთარი საქციელის ავკარგიანობის შეფასების თანდაყოლილი უნარი. როგორც ბიბლიიდან ვიგებთ, სინდისი არის „კანონის არსი“, რომელიც ადამიანებს „გულებში უწერიათ“ (რომაელები 2:15). გაწაფული სინდისი გვეხმარება, შევაფასოთ საკუთარი საქციელი ან წინასწარ განვსაზღვროთ, რამდენად გონივრული იქნება ამა თუ იმ გადაწყვეტილების მიღება.

•   სინდისი კომპასივითაა. ის სწორ მიმართულებას გიჩვენებს და თავიდან გარიდებს ზედმეტ პრობლემებს.

•   სინდისი სარკესავითაა. ის განახვებს, როგორია შენი ზნეობრივი ფასეულობები და როგორი ადამიანი ხარ.

•   სინდისი მეგობარივითაა. მას შეუძლია რჩევა მოგცეს და წარმატების მიღწევაში დაგეხმაროს, თუ რა თქმა უნდა მოუსმენ მის ხმას.

•   სინდისი მოსამართლესავითაა. ის მსჯავრს გდებს ცუდი საქციელის გამო.

 გახსოვდეს: გაწაფული სინდისი დაგეხმარება, 1) სწორი გადაწყვეტილებები მიიღო და 2) შეცდომები გამოასწორო.

 ბიბლია მოგვიწოდებს: „სუფთა სინდისი გქონდეთ“ (1 პეტრე 3:16). სწორედ ამიტომ გვჭირდება სინდისის გაწაფვა.

 „ჩემს მშობლებს ვუმალავდი, სად დავდიოდი და რას ვაკეთებდი. თავიდან სინდისი მქენჯნიდა, მაგრამ დროთა განმავლობაში ეს საერთოდ აღარ მადარდებდა“ (ჯენიფერი).

 რაღაც დროის შემდეგ ჯენიფერი სინდისმა შეაწუხა და მშობლებს სიმართლე უთხრა; მას შემდეგ აღარ მოუტყუებია ისინი.

 დაფიქრდი: უკეთესი არ იქნებოდა, ჯენიფერი უფრო ადრე მოგებულიყო გონს?

 „ორმაგი ცხოვრება საკმაოდ სტრესულია. თუ ერთხელ დაგრთავს სინდისი არასწორი გადაწყვეტილების მიღების უფლებას, სხვა დროსაც ადვილად წახვალ დათმობაზე“ (მეთიუ).

 ზოგი არ უსმენს სინდისის ხმას. ბიბლია ასეთებზე ამბობს, რომ „ყველანაირად ზნედაცემულნი“ არიან (ეფესოელები 4:19). ბიბლიის ერთ-ერთ თარგმანში ეს მუხლი ასეა გადათარგმნილი: „ყველანაირი სირცხვილის გრძნობა აქვთ დაკარგული“.

 დაფიქრდი: ისინი უფრო ბედნიერები არიან, ვისაც არასდროს ქენჯნის სინდისი თუ ისინი, ვინც უსმენს სინდისის ხმას? რა პრობლემები შეექმნებათ ადრე თუ გვიან მათ, ვინც არ უსმენს სინდისის ხმას?

 გახსოვდეს: სუფთა სინდისი რომ გქონდეს, „აღქმის უნარი“ უნდა გაიწაფო, რაც კარგისა და ცუდის გარჩევაში დაგეხმარება (ებრაელები 5:14).

 სინდისი რომ გაიწაფო, შენი საქციელი გარკვეულ სტანდარტებს უნდა შეუსაბამო. ამ საკითხში ზოგისთვის მთავარი კრიტერიუმია ...

•   ოჯახი და კულტურა

•   თანატოლების აზრი

•   პოპულარული ადამიანები

 თუმცა საუკეთესო სტანდარტებს ბიბლია გვიდგენს. ამაში გასაკვირი არაფერია, რადგან ბიბლიის ავტორი ჩვენი შემოქმედია, რომელმაც კარგად იცის, რა არის ჩვენთვის საუკეთესო (2 ტიმოთე 3:16).

 განვიხილოთ რამდენიმე მაგალითი:

 ბიბლიური პრინციპი: „გვსურს, ყველაფერში პატიოსნად მოვიქცეთ“ (ებრაელები 13:18).

•   როგორ დაგეხმარება ამ პრინციპით გაწაფული სინდისი, არ გადაიწერო დავალება, არ მოატყუო მშობლები ან არ იქურდო?

•   რატომ იქნება შენთვისვე კარგი, თუ სინდისი ყოველთვის პატიოსანი საქციელისკენ გიბიძგებს?

 ბიბლიური პრინციპი: „გაექეცით სიძვას“ (1 კორინთელები 6:18).

•   როგორ დაგეხმარება ამ პრინციპით გაწაფული სინდისი, არ უყურო პორნოგრაფიას და უარი თქვა ქორწინებამდელ სექსზე?

•   რატომ იქნება შენთვისვე კარგი, თუ სინდისი არ დაგრთავს უზნეობის ჩადენის ნებას?

 ბიბლიური პრინციპი: „კეთილად მოექეცით ერთმანეთს, დიდად თანაუგრძნეთ და მთელი გულით აპატიეთ ერთმანეთს“ (ეფესოელები 4:32).

•   როგორ დაგეხმარება ამ პრინციპით გაწაფული სინდისი, თუ დედმამიშვილებთან ან მეგობრებთან უთანხმოება მოგივა?

•   რატომ იქნება შენთვისვე კარგი, თუ სინდისი მიმტევებლობისა და თანაგრძნობისკენ გიბიძგებს?

 ბიბლიური პრინციპი: იეჰოვას „ძალადობის მოყვარული სძულს“ (ფსალმუნი 11:5).

•   როგორ დაგეხმარება ამ პრინციპით გაწაფული სინდისი, გონივრულად შეარჩიო ფილმები, ტელეგადაცემები და ვიდეოთამაშები?

•   რატომ იქნება შენთვისვე კარგი, თუ უარს იტყვი ძალადობრივ გართობაზე?

 რეალური ამბავი: „მეგობრებთან ერთად ძალადობრივი ვიდეოთამაშებით ვერთობოდი. მამამ რომ გაიგო, ამიკრძალა ეს თამაშები, თუმცა მაინც ვთამაშობდი ხოლმე, როცა მეგობრებთან მივდიოდი. მშობლებმა არაფერი იცოდნენ. მამას ვეუბნებოდი ხოლმე, რომ ყველაფერი რიგზე იყო. ერთ დღესაც ფსალმუნის 11:5 წავიკითხე და სინდისმა შემაწუხა. მივხვდი, რომ უნდა შემეწყვიტა ასეთი ვიდეოთამაშებით გართობა. ასეც მოვიქეცი. ჩემი შემხედვარე, ერთმა ჩემმა მეგობარმაც დაანება ასეთ თამაშებს თავი“ (ჯერემი).

 დაფიქრდი: როდის შეაწუხა ჯერემი სინდისმა და როდის მოუსმინა მის ხმას? რას სწავლობ მისი შემთხვევიდან?

 გახსოვდეს: სინდისი ბევრს ამბობს იმაზე, თუ როგორია ადამიანი და რა ფასეულობები აქვს. შენი სინდისი რაზე მეტყველებს?