„ღვთისთვის შეუძლებელი არაფერია“ (ლუკა 1:37, „ახალი ქვეყნიერების თარგმანი“).

 „ღმერთთან არავითარი სიტყვა არ დარჩება შეუძლებელი“ (ლუკა 1:37, „ახალი აღთქმა და ფსალმუნი“, ბიბლიის თარგმნის ინსტიტუტი).

 ყოვლისშემძლე ღმერთს იმის გაკეთების ძალა შესწევს, რაც ადამიანისთვის წარმოუდგენელია. ვერაფერი შეუშლის მას ხელს, რომ თავისი ნათქვამი ან დაპირება შეასრულოს.

 ამ მუხლის დედნისეულ ტექსტში გამოყენებულია სიტყვა „გაცხადება“, რომელიც ამ შემთხვევაში ღვთის „ნათქვამს“ ან „სიტყვას“ მოიაზრებს. ის შეიძლება აგრეთვე მიანიშნებდეს შედეგზე, რომელიც იეჰოვას a ნათქვამს მოჰყვება. რახან ღვთის სიტყვა ყოველთვის სრულდება, ლუკას 1:37 შეიძლება შემდეგნაირადაც ითარგმნოს: „ღვთის დაპირებები არასოდეს გამტყუნდება“ ან „შეუძლებელია, ღვთის სიტყვა არ შესრულდეს“. ბიბლიის ბერძნულ დედნისეულ ტექსტში ერთი უდავო ჭეშმარიტება იკვეთება: ღვთის არცერთი დაპირება შეუსრულებელი არ დარჩება, რადგან მისთვის შეუძლებელი არაფერია (ესაია 55:10, 11).

 მსგავსი აზრის მატარებელ გამოთქმებს ღვთის დაპირებებთან დაკავშირებით მთელ ბიბლიაში ვხვდებით. მაგალითად, იეჰოვამ ანგელოზის მეშვეობით გააცხადა, რომ აბრაამის ხანში შესული ცოლი, სარა, რომელსაც შვილი არ უჩნდებოდა, დაორსულდებოდა. ღმერთმა საკუთარ თავზე ასეთი რამ თქვა: „არის რაიმე იეჰოვასთვის შეუძლებელი?!“ (დაბადება 18:13, 14). ღვთის შემოქმედებაზე დაკვირვების შემდეგ პატრიარქმა იობმა ასეთი დასკვნა გააკეთა: „არ არსებობს განზრახვა, ხორცი რომ ვერ შეასხა“ (იობი 42:2). როცა იესოს მოწაფეები დაეჭვდნენ, შეძლებდნენ თუ არა ღვთის ნორმების თანახმად ცხოვრებას და ხსნის მოპოვებას, იესომ მათ შეახსენა: „ღვთისთვის ყველაფერი შესაძლებელია“ (მათე 19:25, 26). b

 ლუკას 1:37-ში ჩაწერილი სიტყვები ანგელოზ გაბრიელს ეკუთვნის, რომლებიც ებრაელ ქალწულ მარიამთან საუბრისას წარმოთქვა. გაბრიელმა მას უთხრა, რომ ის „უზენაესის ძეს“ გააჩენდა და მისთვის „იესო უნდა [დაერქმია]“. ის ღვთის სამეფოს მეფე გახდებოდა, იმ სამეფოსი, რომლის მმართველობაც მარადიული იქნებოდა (ლუკა 1:26—33; გამოცხადება 11:15).

 ამ ცნობამ მარიამი გააკვირვა, რადგან ჯერ არ იყო დაქორწინებული. სწორედ ამიტომ დასვა მან ასეთი კითხვა: „როგორ დავორსულდები, როცა კაცი არ გამკარებია?“ (ლუკა 1:34, 35). გაბრიელმა მას უთხრა, რომ ღმერთი თავისი წმინდა სულით ანუ მოქმედი ძალის მეშვეობით განახორციელებდა ამ განზრახვას. ამ სიტყვების წარმოთქმისას იესო ჯერ კიდევ ღვთის სულიერი ძე იყო და ზეცაში ცხოვრობდა. იეჰოვამ წმინდა სულის მეშვეობით იესოს სიცოცხლე ზეციდან მარიამის საშვილოსნოში გადაიტანა (იოანე 1:14; ფილიპელები 2:5—7). მარიამი სასწაულებრივად დაორსულდა. ღვთის ძალისადმი რწმენა რომ განემტკიცებინა, ანგელოზმა მას შეატყობინა, რომ მის „ნათესავ ელისაბედსაც ჩაესახა ვაჟი სიბერეში“. მას და მის ქმარს, ზაქარიას, შვილი არ ჰყავდათ, რადგან ელისაბედი უშვილო იყო (ლუკა 1:36). მათ ვაჟი შეეძინათ, რომელიც იოანე ნათლისმცემლის სახელით გახდა ცნობილი. იეჰოვამ მისი მსახურების შესახებაც წარმოთქვა წინასწარმეტყველება (ლუკა 1:10—16; 3:1—6).

 როცა ანგელოზმა გაბრიელმა ამ ბიბლიურ მუხლში ჩაწერილი სიტყვები წარმოთქვა, სავარაუდოდ, მარიამიც და ელისაბედიც ჰყავდა მხედველობაში. ეს სიტყვები დღეს მცხოვრებ იეჰოვას თაყვანისმცემლებსაც არწმუნებს, რომ ღვთის განზრახვები შესრულდება. ერთ-ერთი მისი დაპირების თანახმად, ადამიანთა მთავრობებს ღვთის ზეციერი სამეფო ჩაანაცვლებს, რომლის მმართველიც ღვთის ძე, იესო ქრისტეა (დანიელი 2:44; 7:13, 14).

 უყურეთ ვიდეორგოლს, რომელიც ზოგად წარმოდგენას შეგიქმნით „ლუკას სახარებაზე“.