სიტყვა „ზეცა“ ბიბლიაში სამი ძირითადი მნიშვნელობით გამოიყენება. ესენია: 1) ფიზიკური ცა, 2) სულიერი სამყარო და 3) მაღალი ან აღმატებული მდგომარეობის სიმბოლო. კონტექსტი გვეხმარება იმის გაგებაში, თუ რა მნიშვნელობით არის გამოყენებული სიტყვა „ზეცა“. a

1.   ფიზიკური ცა. მასში იგულისხმება დედამიწის ატმოსფერო, სადაც ქარი ქრის, ფრინველები დაფრინავენ, ღრუბლები წვიმასა და თოვლს წარმოქმნიან და ელვა ანათებს (ფსალმუნი 78:26; იგავები 30:19; ესაია 55:10; ლუკა 17:24). ფიზიკური ცა აგრეთვე მოიცავს კოსმოსურ სივრცეს, სადაც მზე, მთვარე და ვარსკვლავებია განლაგებული (კანონი 4:19; დაბადება 1:1).

2.   სულიერი სამყარო. სიტყვაში „ზეცა“ აგრეთვე სულიერი ცა, სულიერი სამყარო იგულისხმება. ეს არის სამყოფელი, რომელიც ფიზიკური სამყაროს ფარგლებს სცდება (1 მეფეები 8:27; იოანე 6:38). სულიერ სამყაროში მკვიდრობენ იეჰოვა ღმერთი, რომელიც „სულია“ და მისი შექმნილი სულიერი ქმნილებები — ანგელოზები (იოანე 4:24; მათე 24:36). ზოგჯერ სიტყვა „ზეცა“ გაპიროვნებულია და გამოიყენება ერთგული ანგელოზების, „წმინდათა კრებულის“ აღსანიშნავად (ფსალმუნი 89:5—7).

 ბიბლიაში სიტყვა „ზეცა“ ზოგჯერ სულიერი სამყაროს იმ ნაწილს გულისხმობს, სადაც იეჰოვას „მუდმივი სამყოფელია“ (1 მეფეები 8:43, 49; ებრაელები 9:24; გამოცხადება 13:6). ბიბლიაში ნაწინასწარმეტყველები იყო, რომ სატანა და დემონები გადმოყრილნი იქნებოდნენ ზეციდან და ვეღარასდროს იხილავდნენ იეჰოვას სამყოფელს; თუმცა ისინი კვლავ სულიერ სამყაროში იქნებოდნენ (გამოცხადება 12:7—9, 12).

3.   მაღალი ან აღმატებული მდგომარეობის სიმბოლო. ბიბლიაში სიტყვა „ზეცა“ გამოყენებულია აღმატებული მდგომარეობის აღსანიშნავად, რომელიც ძირითადად მმართველობის უფლებამოსილებას უკავშირდება. მსგავსი უფლებამოსილება გააჩნია:

   •   ყოვლისშემძლე და უზენაეს ღმერთს, იეჰოვას (2 მატიანე 32:20; ლუკა 15:21).

   •   ღვთის სამეფოს, ანუ მთავრობას, რომელიც ადამიანთა მმართველობებს შეცვლის. ბიბლია ღვთის სამეფოს „ახალ ცას“ უწოდებს (ესაია 65:17; 66:22; 2 პეტრე 3:13). b

   •   დედამიწაზე მცხოვრებ იმ ქრისტიანებს, რომლებსაც ზეცაში ცხოვრების იმედი აქვთ (ეფესოელები 2:6).

   •   ადამიანთა მთავრობებს, რომლებიც თავიანთ ქვეშევრდომებზე მაღლა დგანან (ესაია 14:12—14; დანიელი 4:20—22; 2 პეტრე 3:7).

   •   ბოროტ სულიერ ქმნილებებს, რომლებიც მსოფლიოს მართავენ (ეფესოელები 6:12; 1 იოანე 5:19).

როგორია ზეცა?

 ზეცაში, სადაც უამრავი საქმე სრულდება, ასობით მილიონი სულიერი ქმნილება მკვიდრობს, რომლებიც ღმერთს ემსახურებიან (ფსალმუნი 103:20, 21; დანიელი 7:10).

 ბიბლიაში ზეცა აღწერილია, როგორც კაშკაშა სინათლით მოცული სამყოფელი (1 ტიმოთე 6:15, 16). წინასწარმეტყველმა ეზეკიელმა ხილვაში ნახა კაშკაშა ზეცა; დანიელმა კი ცეცხლის ნაკადი იხილა, რომელიც ზეცაში ღვთის ტახტის წინ მოედინებოდა (ეზეკიელი 1:26—28; დანიელი 7:9, 10). ზეცა წმინდაა (ფსალმუნი 96:6; ესაია 63:15; გამოცხადება 4:2, 3).

 როგორც ბიბლიიდან ვიგებთ, ზეცა შიშის მომგვრელი და შთამბეჭდავია (ეზეკიელი 43:2, 3). და მაინც, შეუძლებელია ადამიანი ბოლომდე ჩასწვდეს სულიერი სამყაროს მნიშვნელობას, რადგან ეს მის შესაძლებლობებს აღემატება.