Di ddunit meṛṛa, xilla n lɣaci i geqqaren tizmamin n Inagan n Yahwa. D imelyunen i tent-yeqqaren s ţţawil aliktṛunan, am kečč akka tura. Meɛna aţ-ţwehmeḍ ahat lukan aţ-ţeẓreḍ acḥal i gmeqqer leqdic-nneɣ n weḍbaɛ. Si 2013 ɣer da, nessufuɣ-ed tizmamin ireṣṣan ɣef Wedlis Iqedsen deg wazal n 700 lluɣat yerna nferreq-itent di 239 tmura d imeḍqan.

Uqbel 1920, ţ-ţikebbaniyin i ɣ-d-iṭṭabaɛen tizmamin-nneɣ. Aseggas-nni, nebda neṭṭabaɛ-ed kra si tesɣunin ţ-ţreẓẓiyin-nneɣ deg yiwen wexxam amecṭuḥ i nekra di Bruklin (Nuyuṛk). Ɣas akken asmi i nebda ur nelli ara d imeṛkantiyen, ass-a nesɛa 15 lemṭabɛat, i d-yezgan di Tefriqt, di Marikan n Ufella, di Marikan n Wadda, di Asya, di Usṭralya akk-d Luṛub.

Taktabt yesɛan azal akk ameqran ɣur-neɣ i d-neṭṭabaɛ d Adlis Iqedsen. Adlis Iqedsen amezwaru i d-nessufeɣ s lekmal-is di lemṭabɛat-nneɣ, yeţwaxdem deg useggas n 1942. Adlis-agi d ṭrejma yeţţusemman King James Version. Si 1961 ɣer da, nesṭerjim-ed yerna nessufuɣ-ed Tira Iqedsen, Ṭrejma n ddunit tajdiṭ s lekmal-is deg yiwen wedlis. Di 2013, nexdem-ed kteṛ n 184 imelyunen seg Wedlis Iqedsen s 121 lluɣat.

Meɛna, leḥsabat-agi ur d-beggnen ara kullec. Idlisen-agi i d-nessufuɣ ţwaxedmen bac ad ṭṭfen aṭas. Ḍebɛen-d ɣef lkaɣeḍ ur nxesseṛ ara, yeɛni ur neţţiwriɣ ara, yerna lesqen akken ilaq. Ɣer taggara, Adlis Iqedsen i ɣ-d-iţţawḍen ger ifassen yezmer ad yeṭṭef ɣas ma nessexdam-it kul ass.

Neṭṭabaɛ-ed daɣen tizmamin i ɣ-iţɛawanen a nefhem Adlis Iqedsen. Wali kra n leḥsabat n 2013:

• Lbeṛǧ n Tɛessast, tasɣunt-nneɣ tamezwarut, neṭṭabaɛ-iţ-id s wakteṛ n 210 lluɣat. Ţ-ţasɣunt yeţwaferqen akteṛ akk di ddunit. Yal yiwet seg-sent tesɛa 16 isebtar yerna neṭṭabaɛ-ed kteṛ n 45 000 000 seg-sent.

• Aki-d!, weltma-s n Lbeṛǧ n Tɛessast, ţ-ţasɣunt yeṭṭfen amkan wis sin, nessufuɣ-ed seg-s 44 000 000 yal ccheṛ. Neṭṭabaɛ-iţ-id s 99 lluɣat.

• Acu yesselmad s ṣṣeḥ Wedlis Iqedsen? ţ-ţaktabt n 224 isebtar yesɛan taɣlaft taleqqaqt. Teţwaxdem bac aţ-ţɛiwen win ara ţ-yeɣren ad yefhem leḥwayeǧ yellan d lsas n wayen yesselmad Wedlis Iqedsen. Si 2005 ar ass-a, neḍbeɛ-ed seg-s 214 imelyunen s wakteṛ n 240 lluɣat.

• Ḥess i Ṛebbi, d yiwet n treẓẓit n 32 isebtar, teţwaxdem i wid ur nessin ara ad ɣren akken ilaq. S ţţeswiṛat icebḥen yellan deg-s akk-d imeslayen i tent-id-yessefhamen, tesskanay-ed tideţ n Wedlis Iqedsen s sshala. Ɛeddan i 42 imelyunen i d-neḍbeɛ si treẓẓit-agi s wakteṛ n 400 lluɣat.

Zzyada ɣef tezmamin-agi, neṭṭabaɛ-ed xilla n yedlisen, n treẓẓiyin akk-d tewriqin n uberreḥ. Tizmamin-agi meṛṛa ţɛawanent wid yeqqaren Adlis Iqedsen bac ad afen leǧwab i yesteqsiyen-nsen, bac ad qablen iɣeblan i d-ţmagaren, bac daɣen ad afen kra n lewṣayat ara sen-iṣelḥen di temɛict n twacult-nsen. Di 2012, lemṭabɛat-nneɣ ssufɣent-ed kteṛ n 1 300 000 000 tesɣunin d 80 000 000 ger Wedlis Iqedsen akk-d tektabin nniḍen.

Wid i d-yeţţasen ad ẓren lemṭabɛat-nneɣ wehhmen m’ara walin wid i gqeddcen dinna amek i ţţaken si tezmert-nsen akk-d lweqt-nsen s leḥṛaṛa bac ad yeddu ccɣel-agi. M’ara d-asen yejdiden ad qedcen deg yiwen si lbiruwat iɣelnawen n Inagan n Yahwa, yeţţusemman Bitilat (ameslay Bitil lmeɛna-s “Axxam n Ṛebbi”), amur ameqran seg-sen ur ssinen ara maḍi ad xedmen di lemṭabɛa. Acu kan m’ara kecmen, sseḥfaḍen-ten dinna, yerna liḥala ideg i xeddmen teţţak tagniţ yelhan i leḥfaḍa. Daɣneţţa, tikwal aţ-ţwaliḍ ilmeẓyen yesɛan azal n ɛecrin n sna sselḥayen yiwet lemṭabɛa iteddun s lemɣawla i gzemren a d-tessufeɣ di ssaɛa azal n 200 000 n tesɣunin n 16 isebtar.

Di ddunit meṛṛa, leqdic i xeddmen Inagan n Yahwa iteddu s tukciwin i d-yeţţunefkayen seg wul. Atan d acu yuran di tesɣunt, yeţţusemman ass-a Lbeṛǧ n Tɛessast, i d-yeffɣen di ɣuct 1879: “Numen belli ‘La Tour de Garde de Sion’ tesɛa YAHWA d amɛawen; skud akka i gella lḥal, ur teṭṭalab i yemdanen a ţ-ɛiwnen ur teţḥawat deg-sen.” Akka i neţwali timsal ula ţ-ţura.

Acuɣer i neţţak annect-agi meṛṛa si lweqt-nneɣ, seg yedrimen-nneɣ akk-d lǧehd-nneɣ ɣef leqdic-agi? Axaṭer nessaram aţ-ţeɣreḍ yiwet seg imelyunen n tektabin neɣ seg Wedlis Iqedsen i d-nessufeɣ si lemṭabɛat-nneɣ, neɣ yiwet si tezmamin-nneɣ yellan di Internet akken aţ-ţqerrbeḍ ɣer Ṛebbi.