Inagan n Yahwa sɛan 15 lemṭabɛat i d-yezgan deg imukan yemxallafen di ddunit. Yiwet seg-sent tella di Selters, di tmurt n Lalman anda yella lbiru-nsen n Luṛub talemmast, deg wemḍiq umi qqaren Ctaynfilz (yeɛni “Aẓru” s tlalmanit).

Si 23 ar 25 maggu 2014, lbiru n Luṛub talemmast yeldi tiwwura-s i lǧiran, i yemɛellmen akk-d yemḍebbren n temdint. Tadyant-agi teţţusemma: “30 n sna di Selters”, imi lemṭabɛa-ya tebda txeddem si 21 yebrir 1984.

Deg wussan-a ideg i ldint tewwura, akteṛ n 3 000 yemdanen i d-yusan ad walin amḍiq-agi. Lmir, yellan d yiwen ger yemḍebbren n tɣiwant azal n tlatin n sna ayagi, yenna-d: “Timeẓriwt n lbiru aɣelnaw n Inagan n Yahwa teţţili dima ţ-ţaswiɛt ifazen.” Yenna-d daɣen: “Wehmeɣ di lemɣawla is i gebna lbiru n Inagan n Yahwa di Ctaynfilz si 1979 ar 1984.”

Timzikent (asenɛet) tamezwarut yeţţusemman “Agdud n Yahwa di Luṛub talemmast” tḥekku-d ɣef 120 n sna seg umezruy (ttarix) n Inagan n Yahwa di lǧiha-yagi. Timzikent-agi mazal-iţ ar ass-a di lbiru-ya.

Timzikent nniḍen tessenɛat-ed kra n ṭrejmat n Wedlis Iqedsen yesɛan lqima tameqrant yerna qlilit. Ɣef lemtel, ger ṭrejmat-agi, yella yiwen wedlis iqedsen seg imezwura yakk i d-yeffɣen di 1534, yerna yeţwaṭerjem s lekmal-is ɣer tlalmanit; yella daɣen yiwen weḥric si Ṭrejma n Elyas Hutter i d-yeffɣen di 1599. Di ṭrejma-yagi, aḍris yeţwakteb s 12 n tutlayin. Kra n telwiḥin akk-d bidyuwat ssefhament-ed deg wacu i ṣelḥent lewṣayat n Wedlis Iqedsen di temɛict-nneɣ ass-a.

Timeẓriwt teţţili ɣef sin iberdan; teţţak tagniţ i wid i d-yusan akken ad issinen amek i ţɛicen wakteṛ n 1000 n yergazen ţ-ţlawin i gzedɣen yerna i gqeddcen di lbiru aɣelnaw n Inagan. Deg webrid amezwaru, yeţţusemman “Amek i neţɛic”, wid i d-yusan walan kra n tnezduɣin, mbeɛd ččan di tzeqqa n lmakla yerna ḥewwsen di leǧnan. Yiwet n tmeṭṭut tenna-d: “Ayla-yagi-nwen yecbeḥ mliḥ!”

Deg webrid wis sin, yeţţusemman “Ayen i d-nessufuɣ”, timeẓriwt teɛna tazeqqa n weḍbaɛ, leqdic n welsaq n tektabin akk-d leqdic n uceggeɛ. Wid i d-yusan walan s wallen-nsen amek i d-ţwaḍbaɛent tektabin ireṣṣan ɣef Wedlis Iqedsen, amek i tent-sselsaqen d wamek i tent-ţceggiɛen ɣer wakteṛ n 50 tmura. Yiwen wergaz yenna-d: “Ur nwiɣ ara maḍi belli Inagan n Yahwa ad ilin ţ-ţuddsa i d-yekkan ddunit meṛṛa. Ayen akk i d-ssufuɣen, ţ-ţiktabin neɣ d ayen nniḍen, yelḥeq yal tiɣmert di ddunit. Imi i ssawḍen ad xedmen ayagi s iwaziwen, annect-a d lmuɛǧiza.”

Yiwet n teswiɛt n lɛali di tmeẓriwt-agi, ţ-ţaswiɛt yeɛnan amḍiq i d-iţwaɛezlen i jw.org, i geţdemmiren lɣaci ad rren ddehn-nsen ɣer wesmel n Inagan n Yahwa. Imeqranen d imecṭaḥ walan timeskanin d bidyuwat, rnan ufan leǧwab ɣef xilla n yesteqsiyen-nsen.

Wid i d-yusan fehmen akteṛ amek iga leqdic n Inagan n Yahwa di ddunit meṛṛa. Mi tekfa tmeẓriwt, xilla seg-sen i gṛuḥen ceṛhen yerna teɛǧeb-asen mliḥ lxedma n Inagan. Yiwen wergaz yesteɛṛef, yenna: “Lliɣ ččuṛeɣ d ixemmimen ur nṣeḥḥa ara ɣef Inagan n Yahwa. Ḥwaǧeɣ s ṣṣeḥ ad beddleɣ ayen akka i ţxemmimeɣ.” Yiwet n tmeṭṭut tenna-d acḥal n tikkal: “Ass-agi, ayen akk i d-ggaren medden ɣef Inagan yemḥa.”