Ass n lǧemɛa 5 yulyu 2013, tawacult n Bitil n Marikan tefṛeḥ mi tesla i lexbaṛ i d-yefka Anthony Morris, yellan d aɛeggal n Wesqamu amwellah. Anthony Morris yenna-d: “Nestenya lkaɣeḍ ideg i newɛed a nezzenz seţţa lbaṭimat i nesɛa di Bruklin a, gar-asent tin yellan di 117 Adams Street akk-d tin i d-yezgan di 90 Sands Street. Lbiɛ n lbaṭimat uṭṭun 1 ar 5 iḥettem-aɣ a d-nessufeɣ ayen akk yellan deg-sent uqbel ad ineṣṣef ccheṛ n ɣuct n useggas-a.”

D ṣṣeḥ, annect-a meṛṛa d lxedma meqqren nezzeh. Amḍiq i d-ḥeṛṛent xemsa lbaṭimat-agi yesɛa lqider n 11 tikkal annar n ddabex n uḍar i ssexdamen di temliliyin tigraɣlanin (ger tmura)! Yerna lbaṭimat-agi iwulem a d-ţţuferrɣent di 60 wussan!

Xemsa lbaṭimat-agi, xilla n iseggasen nutenti ččuṛent d lemṭabɛat akk-d tmacinin n welsaq. Meɛna, di 2004, timacinin-agi meṛṛa wwin-tent ɣer Wulkil (Nuyuṛk).

Seg yimiren, lbaṭimat-a uɣalent ṣelḥent i usexzen d uqeɛɛed n wayen yeţwaɣen. Srusuyen daɣen deg-sent dduzan n lebni, tiɣawsiwin n lbiru d wayen akk i ssexdamen deg imukan anda i bennun di Marikan akk-d tmura nniḍen.

Bac a d-ferrɣen lbaṭimat-agi di lweqt iqewwmen, yessefk a d-heggin ccɣel-agi akken ilaq. Di tazwara, ḥesben meṛṛa ayen i ssexznen deg-sent bac ad ẓren acu ara yenzen, acu ara yeţţuḍeggren d wayen ara yeqqimen. Mbeɛd, ṭṭfen kra n leqrarat bac ad iţwaxdem kullec akken ilaq yerna s leḥder.

Iɛeggalen n twacult n Bitil xedmen aṭas bac ad ifakk ccɣel-agi. Zzyada ɣef wannect-a, ɛerḍen-d 41 iwaziwen bac a sen-d-fken afus n lemɛawna. Iwaziwen-a usan-d si mkul lǧiha n Marikan. Amur ameqran seg-sen d ilmeẓyen, ur zwiǧen ara yerna ǧehden. Qeblen a d-asen ad qqimen di Bitil seţţa ar ɛecṛa smanat; ǧǧan tiwaculin-nsen, leḥbab-nsen d lxedma-nsen. Acu is i ḥussen mi ţekkan di ccɣel-a?

Jordan, 21 n sna, yusa-d si Wacinṭun. Yenna-d: “Axiṛ lukan ḍelbeɣ a d-aseɣ ɣer da uqbel.”

Steven, 20 n sna, yusa-d si Tikṣas. Yenna-d: “Ḥusseɣ amzun lliɣ deg yiwet n twacult tameqrant, ţ-ţaseɛdit yerna ţ-ţaxeddamt, ţ-ţawacult i d-yekkan ddunit meṛṛa.”

Justin, 23 n sna, yura-d imeslayen-agi: “Dagi, di Bitil, ḥusseɣ amzun deg wexxam-nneɣ i lliɣ. Lekyasa di leḥwayeǧ n ṛṛuḥ, tagmaţ akk-d leḥmala yellan dagi d ayen i gerrzen.”

Adler, 20 n sna, iṛuḥ-ed si Burtu Riku. Yenna-d ayagi: “Iwɛeṛ-iyi a d-kkreɣ ṣṣbeḥ zik, meɛna rebḥeɣ-d kra n leḥbab i lebda.”

William, yesɛan 21 n sna, yeḥka-d: “Seg wasmi i lliɣ d amecṭuḥ i ţmenniɣ a d-aseɣ ɣer Bitil. Ɣileɣ a d-afeɣ iman-iw amzun weḥd-i i lliɣ neɣ a yi-iɛerqent akk, meɛna ɣelṭeɣ di leḥsab-iw. Ussan i sɛeddaɣ di Bitil d ussan ifazen akk i ɛaceɣ di ddunit-iw! Ar ɣur-i, ulac ayen i gifen annect-agi.”

Amek ihi? Iwaziwen-agi yesɛan leḥṛaṛa xedmen ccɣel-nsen di lweqt iqewwmen? Ih, fukken lxedma... di 55 wussan kan!