Mkul aseggas, d luluf n lɛibad i geţṛuḥun a d-ẓren lbiru aɣelnaw n Inagan n Yahwa n Marikan akk-d lbiru-nsen amaḍlan yellan di Nuyuṛk. Lbiruwat-agi ţţusemman Bitil; Bitil d ameslay i d-ikkan si tɛibṛanit, lmeɛna-s “Axxam n Ṛebbi.” Wid i d-iţţasen ɣer imukan-agi, ama si lebɛid ama si lqerb, ţţasen-d bac ad walin amek i d-ssufuɣen Inagan n Yahwa tizmamin-nsen d wamek i ţheggin lecɣal-nsen, neɣ bac ad rzun ɣef leḥbab-nsen. Mačči aṭas aya, yiwen wergaz yusa-d si lebɛid mliḥ bac ad iẓer lbaṭimat-agi.

Marcellus d Inigi n Yahwa izedɣen di Ankariǧ, Alaṣka. Kra n lesnin akka ɣer deffir, iṭṭerḍeq-as uẓar deg uqerru, yuɣal seg yimiren ur yezmir a d-yini ḥaca kra n imeslayen. a Iteddu s tkeṛṛust (akersi bu ṛṛwadi) yerna yeḥwaǧ win ara t-iɛiwnen bac ad yexdem lecɣal-is n yal ass. Ɣas yella di liḥala-ya, yebɣa nezzeh a d-iẓer Bitil. Yewweḍ ɣer lebɣi-s mačči xilla aya.

Corey, amdakkel n Marcellus, i t-iɛawnen ad iheggi iman-is akken ad iṛuḥ ɣer Bitil yeḥka-d: “Yella d win iṣebbren. Yessawal-iyi-d daymen bac ad iẓer sani i nessaweḍ deg uheggi. Deg imeslayen i gessexdam Marcellus, qrib ḥaca “ih” d “xaṭi” i s-iqqimen yeqqar-iten-id. Bac ad ẓreɣ d acu i gebɣa, ilaq a s-fkeɣ acḥal d asteqsi.” M’ara heddṛen gar-asen, lehduṛ-nsen ţţemcabin cwiyya ɣer waya:

A s-yini Corey: “Tebɣiḍ a n-aseɣ a k-ẓreɣ?

— A s-d-iǧaweb Marcellus: Xaṭi.

— Tebɣiḍ a s-ssiwleɣ i ṭṭbib?

— Xaṭi.

— Tessawleḍ-iyi-d ɣef ṛṛwaḥ-inek ɣer Bitil?

— Ih.”

Corey yenna-d daɣen: “Mbeɛd ilaq a s-d-ssefhmeɣ sani i ssawḍeɣ deg uheggi. Feṛḥeɣ mliḥ mi walaɣ belli yeṭṭef di leqsed-agi.”

Marcellus iqubel aṭas n wuguren. Imi i gxuṣṣ ameṣruf, yekka ɛamayen neţţa ijemmeɛ idrimen swayes ara ixelleṣ amkan di tmesrifegt armi d Nuyuṛk. Ilaq-as daɣen a d-yaf win ara t-isaɛfen yerna ara yizmiren a t-iɛiwen ɛlaǧal n wuguren n ṣṣeḥḥa-ines. Zzyada ɣef wannect-a, ilaq-as ţţesriḥ n ṭṭbib-is, axaṭer ad yeddu azal n 5 400 kilumitrat; ţţesriḥ-agi yeţţunefk-as-d mi s-d-qqimen kra kan n wussan uqbel ad iṛuḥ.

Mi gewweḍ Marcellus ɣer Nuyuṛk, yeḍleb a d-iẓer s wemsaɛef lbaṭimat yellan di Bruklin, di Baṭirṣun akk-d Wulkil. Yessaweḍ ad iwali kra n lemṭabɛat annect-ilatent la d-ṭṭabaɛent aṭas seg Wedlis Iqedsen ţ-ţektabin nniḍen, yerna yefhem akteṛ amek i ţheggin Inagan leqdic-nsen. Iwala yiwet temzikent teţţusemma “Adlis Iqedsen akk-d yisem n Ṛebbi” tayeḍ teţţusemma “Yiwen wegdud i yisem n Yahwa.” Yerna ixdem-ed aṭas n leḥbab ijdiden. Annect-a d ayen iɣef ara yecfu s ṣṣeḥ!

Aṭas i d-yeqqaren belli ur d-ufin ara imeslayen swayes ara d-inin d acu i xemmen ɣef ṛṛwaḥ-nsen ɣer Bitil. Mi i s-ḍelben i Marcellus ma yewwi-d ad yexdem annect-nni n lmeǧhudat bac ad iṛuḥ a d-iẓer Bitil, iǧaweb-ed s yiwen umeslay kan i gezmer a d-yini: “Ih! Ih! Ih!”

Am Marcellus, ula d kečč ţ-ţwacult-ik mebla ccekk aţ-ţiǧhidem ma tṛuḥem a d-teẓrem yiwen n Bitil. Yerna, di ddunit meṛṛa, wid yeţṛuḥun a d-ẓren Bitilat, steṛḥiben yis-sen Inagan n Yahwa di lbiruwat-nsen iɣelnawen. Lukan kan aţ-ţheggiḍ iman-ik aţ-ţṛuḥeḍ a d-teẓreḍ Bitil ula d kečč!