Di Usṭralya, tesɛa n Inagan n Yahwa i geţţuǧazan ɣef leqdic yelhan i xedmen. Leqdic-agi xedmen-t i lmend n ibeṛṛaniyen yeţwaḥebsen deg yiwen seg imeḍqan anda i jemmɛen iɣriben ur nesɛi ara lekwaɣeḍ. Axxam n yeɣriben i sen-yerran tajmilt d win i d-iṣebḥen di Kurtin, a tama n Daṛbi, di lɣerb n Usṭralya.

Mkul smana, Inagan-agi rezzun ɣef ibeṛṛaniyen yeţwaḥebsen dinna. Ţḥessisen i yeɣriben-a i sen-d-iḥekkun ɣef wayen i sɛeddan yerna ţţaken-asen lexbaṛ yeţṣebbiren yellan deg Wedlis Iqedsen akk-d usirem i d-itekken seg-s. Atan wayen i d-inna Christopher Riddoch yesteklfen s temsal yeɛnan ddin d yidles: “Nnfeɛ i d-tewwi tmerziwt-nsen i imezdaɣ n wexxam-agi yeţban-ed din din.” Yenna-d daɣen belli mkul m’ara tekfu tmerziwt, iɣriben-agi ţnecṛahen yerna feṛṛḥen akteṛ, axaṭer ẓran belli “llan lɛibad beṛṛa n wexxam n yeɣriben i geţxemmimen fell-asen seg wul.”

Mass Riddoch ikemmel tameslayt-is, yenna-d belli ayagi ţ-ţajmilt kan tamecṭuḥt i geţţunefken i Inagan “i gwennɛen cwiṭ liḥala n yergazen iɣef i ţţuwekklen.” Yerna yenna-d belli Inagan “cebbḥen tiwaculin-nsen, tajmaɛt-nsen akk-d liman-nsen.”