Si 6 ɣer 16 di yunyu 2013, d imelyunen n yemdanen i d-yusan si ddunit meṛṛa ɣer lmerṣa n Ṛuwan, di tama n ufella n tmurt n Fṛansa, akken ad ḥedṛen i yiwen ger inejmuɛen imeqranen yerna icebḥen n ibeḥṛiyen. Anejmuɛ-agi qqaren-as: Aṛmada.

Lbabuṛat iteddun s lqewwa n waḍu, icebḥen yerna meqqren akk di ddunit, ddan azal n 120 n kilumitrat deg wasif n Lassan, i d-yezzin akk i wemḍiq-agi icebḥen yeţţusemman Nuṛmundi, mbeɛd ḥebsen di lmerṣa yesɛan sebɛa n kilumitrat, i d-yeţţuheggan ɣef ddemma n wayagi. Usan-d ɣer tmeɣra-yagi 45 n lbabuṛat imeqranen yerna mechuṛen si zik. Deg wakteṛ n ɛecṛa wussan i tekka tmeɣra-yagi, teţţunefk tegniţ tamxaleft i lɣaci akken ad alin ɣer kra seg-sen w’a ten-id-walin.

Acu i gdemmren annect-agi n lɛibad, s umecṭuḥ s umeqran, ad ṛuḥen ɣer Aṛmada? Ɛlaḥsab n win i d-yesnulfan tameɣra-yagi yerna i ţ-id-iheggan, Aṛmada ţ-ţagniţ yeţţunefken i lɣaci akken ad qerrben ɣer “‘leɣwal-agi iţeddun di lebḥeṛ’ i ɣ-yezgan di lxaṭer akken ma nella.” Ţ-ţideţ, di lbal n waṭas n yelmeẓyen akk-d imeqranen, lbabuṛat-agi ţmettilen-d acerreg n lebḥeṛ akk-d tlelli.

Luluf n lɣaci i d-yerzan teţţunefk-asen daɣen tegniţ ad slen s yiwet n tlelli nniḍen, tin i d-teţţak tideţ yellan deg Wedlis Iqedsen. (Yuḥenna 8:31, 32) Wid i d-yusan ad walin tamdint-agi n Ṛuwan, icebḥen yerna yesɛan akteṛ n xemsa leqrun, akk-d tzenqatin-is iḍeyqen yerna yeččuṛen d lɣaci, ur zmiren ara ad zeglen ticeryulin n usenɛet n tezmamin n Inagan n Yahwa n temdint n Ṛuwan. M’ara d-iqerreb yiwen, ama d aḥewwas ama ixeddem di lbabuṛ, ɣer imukan-agi anda i rsent tezmamin ireṣṣan ɣef Wedlis Iqedsen, qqaren-as ad yeddem seg-sent yerna baṭel. Asentel “À quand un monde sans préjugés ?” yuran ɣef teɣlaft n Lbeṛǧ n Tɛessast, ijbed-ed lbal n waṭas n yemdanen; imdanen-agi ţwaɛerḍen ɣer yiwet n lxeṭba, ireṣṣan ɣef Wedlis Iqedsen, s tṛumit, s teglizit neɣ s tesbenyulit.

Aṭas n imezdaɣ n Ṛuwan i gfeṛḥen s ccɣel-agi. Di tazwara, yiwen wergaz yewhem mi gwala Inagan ssexdamen taceryult n usenɛet n tezmamin deg wezniq, dɣa yenna-yasen: “Iɛǧeb-iyi lḥal imi i ken-ẓriɣ akka deg izenqan. Steɛṛfeɣ yis-wen imi i teţdafaɛem ɣef wayen is i teţţamnem, ɣas m’ur lliɣ ara am kenwi.” Sin yergazen meqqren di leɛmeṛ nnan i sin Inagan, yellan d ilmeẓyen, iţekkan di leqdic-agi: “Tzemrem aţ-ţzuxxem imi i tellam d Inagan n Yahwa.”