Ass n 13 di ctember 2014, ţţunefken diblumat i terbaɛt n inelmaden tis 137 n Uɣerbaz n Gilɛad deg wemkan ideg i sselmaden Inagan n Yahwa di Baṭirṣun (Nuyuṛk). Aɣerbaz-agi yesseḥfaḍ kra n iqeddacen di ddin ger Inagan n Yahwa yessnen yerna ijeṛṛben iwakken ad ṣelḥen akteṛ i useǧhed n tjemmuyaɛ akk-d Bitilat uɣur ara ţţuceggɛen. Ḥedṛen 12 333 lɛibad i temlilit-agi, ama dinna di Baṭirṣun, ama s ţţawil n usiweḍ n bidyu s Internet ɣer imeḍqan yemxallafen am Kanada, Marikan, Jamayka akk-d Burtu Riku.

D Samuel Herd, yiwen uɛeggal seg Wesqamu amwellah n Inagan n Yahwa, i gellan d aselway n timlilit-agi. Deg imeslayen-is imezwura, yesbeggen-ed acḥal i ɛlayit ixemmimen n Yahwa ɣef wid-nneɣ. (Icɛaya 55:8, 9) Yenna-d belli, ɣas sɛeddan inelmaden-agi xemsa wagguren nutni ţɛemmiṛen allaɣen-nsen d ixemmimen n Ṛebbi, d aslaf kan i sen-sselfen: “cwiṭ kan si lecɣwal-is” i ssawḍen ad ḥefḍen. (Yub 26:14) Gma-tneɣ Herd yesmekta-d daɣen belli yal tikkelt ideg ara nennejmaɛ bac a nessenqed ixemmimen n Ṛebbi, neţţaf nnfeɛ. D ayen ara d-yawi ula d anejmuɛ-agi amxalef.

“Lfakya n ṛṛuḥ, d ṣṣber.” (Igalatiyen 5:22) John Larson, yiwen si terbaɛt yeţwellihen Bitil n Marikan, yemmeslay-ed ɣef sin wudmawen is ara d-nesbeggin yiwet n ṣṣifa si lfakya n ṛṛuḥ n Ṛebbi: ṣṣber. Amezwaru deg-sen, ilaq a nṣebber m’ara ɣ-yesseḥfaḍ Yahwa w’a ɣ-isseǧhad di liman-nneɣ. (1 Buṭrus 5:10) Yahwa yesseḥfeḍ Abṛaham uqbel a d-yesseḍru lweɛd-nni i s-ifka. Di teswiɛt-nni, Abṛaham yella d lemtel ifazen di ṣṣber.—Iɛebṛaniyen 6:15.

Wis sin, ilaq a nṣebber d yiman-nneɣ. Asm’ara fakken inelmaden leqraya, zemren ahat ad cerrḍen xilla n leḥwayeǧ seg yiman-nsen. Mi wwḍen ɣer imukan iɣer i ţţuceggɛen, ma yella ur d-ḍrint ara leḥwayeǧ akken ilaq, zemren a s-inin ahat: “Acu i y-yuɣen akka?” Gma-tneɣ Larson yemmeslay-ed ɣef wayen i gesɛedda yerna yenna i inelmaden belli zemren ad qablen cceddat ara d-mmagren ma yella ṣebbren d yiman-nsen yerna ţţenɛeţţaben di lxedma, skud i ten-yeţwenniɛ Ṛebbi.—Iɛebṛaniyen 6:11, 12.

“Sɛut annuz deg wulawen-nwen tɛicem i dima.” Anthony Morris, yiwen seg iɛeggalen n Wesqamu amwellah, ireṣṣa lxeṭba-ines ɣef Uhellil 22:27; aḥric aneggaru n wafir-agi yezmer a d-yeţwaṭerjem akka: “Ad yiɣzif leɛmeṛ-nwen i dayem.” Bac a nestenfeɛ si lbaṛaka-yagi, ilaq-aɣ a neqqim dima nesɛa annuz. Gma-tneɣ Morris yesmekta-d, abeɛda, belli m’ur nesɛi ara annuz, ur neţţili ara neṣleḥ i Yahwa. Yal yiwen deg-neɣ, ula d win yellan d amasiḥi xilla iseggasen aya, yezmer a s-yeɛreq wazal i tesɛa lemɛanda ara neţɛanad Ɛisa Lmasiḥ.—2 Buṭrus 1:9.

Adlis Iqedsen yeţţak-ed kra n lemtul n yemdanen yesɛan annuz akk-d wid yeţzuxxun. Hiṛudus Agribas, s zzux, yeǧǧa imdanen a s-qezzben mi geqbel a s-rren ccan i glaqen ad yeţţunefk kan i Yahwa. Ɣef wannect-a i t-id-yewwet yiwen n lmelk, mbeɛd “ičča-t uwekkiw.” (Lecɣal 12:21-23) Meɛna, Buṭrus si lǧiha-s, asmi yendeh fell-as Ɛisa, yenna-yas: “Ur teţxemmimeḍ ara am Yillu, lameɛna am yemdanen”; ɣef wakken i d-iban, Buṭrus ur icennef ur yezɛif. (Matta 16:21-23) Yeqbel ţṛebga yerna yeǧǧa-d lemtel n lɛali deg wayen yeɛnan annuz.—1 Buṭrus 5:5.

Kra n inelmaden ad uɣalen d iqeddacen di Bitilat n Inagan n Yahwa. Gma-tneɣ Morris iɛeggen-asen belli m’ur sɛin ara annuz, ad ilin d imeḥzunen deg wemkan iɣer ara ţţuceggɛen. Acu kan, tikwal iwɛeṛ-aɣ lḥal a d-nerr s lexbaṛ belli nxuṣṣ annuz. Bac a ten-iɛiwen ad fehmen ayagi, gma-tneɣ Morris yefka-d lemtel i d-yeḍran xilla n lesnin aya; lemtel n yiwen n ccix n tejmaɛt i geţwanedṛen imi ur d-ibeggen ara annuz. Ccix-agi yura yiwet n tebṛaţ ɣer Bitil, yenna: “Ulac amdan yesɛan annuz am nekk.” Gma-tneɣ Morris iweṣṣa inelmaden ad xḍun i ṭṭbiɛa am tagi. Zemren ad qqimen dima sɛan annuz ma yella ur ţzuxxun ara imi ţţuwekklen ɣef kra n lecɣal yerna ma steɛṛfen belli d Yahwa akk-d Ɛisa Lmasiḥ i geṭṭfen ger ifassen-nsen leḥkem n ṣṣeḥ.

“Iţţak-ed ṛṛuḥ mebla cceḥḥa.” (Yuḥenna 3:34) Michael Burnett, yiwen uselmad di Gilɛad, yesmekta-d i inelmaden belli ṛṛuḥ iqedsen a ten-iɛiwen ad ɣelben ccekk akk-d cceddat ara d-mlilen ahat deg imeḍqan iɣer ara ţţuceggɛen. Ṛṛuḥ iqedsen iɛawen Baṣalil ad yizmir i ccɣel ameqran iɣef i geţţuwekkel: lebni n uqiḍun imqeddes. (Tuffɣa 35:30-35) Ur yesnerna ara kan tamusni n Baṣalil deg wayen yeɛnan lḥirfa n lebni, meɛna yefka-yas ula d lefhama iwulmen bac ad yesselmed wiyaḍ. Ṛṛuḥ iqedsen yezmer ad yexdem akkagi i wid i d-yeffɣen si Gilɛad, abeɛda ma yella tebɛen aselmed yellan deg Wedlis Iqedsen, i sen-yeţţunefken di llakul-agi.

Di lweqt n Baṣalil, ula ţ-ţulawin iṣaḥ-itent-id wemkan yesɛan azal di lebni n uqiḍun imqeddes. (Tuffɣa 35:25, 26) Tiyessetmatin daɣen, i geɣran di llakul-agi, beggnent-ed iman-nsent ţ-ţulawin “yetɛeqqlen” imi ţɛawanent irgazen-nsent. Gma-tneɣ Burnett ifukk lxeṭba-ines s lewṣaya-yagi i gefka i inelmaden: “Sseɛdlet ger leḥṛaca-nwen akk-d wannuz ţ-ţiɣin n wawal. Akka, a wen-d-yefk Yahwa ṛṛuḥ-ines mebla cceḥḥa.”

“Aţ-ţceḍḥem yid-i?” Mark Noumair, amɛawen n Terbaɛt yeţwellihen aselmed, yekkes-ed asentel n lxeṭba-ines si teḥkayt n ugellid Dawed asmi i d-yerra asenduq n leɛqed ɣer Yarucalim. (2 Camwil 6:12-14) Di lawan-nni ideg i d-yewweḍ usenduq, Dawed yecḍeḥ s wannuz akk-d “tqeddacin n iqeddacen-is.” (2 Camwil 6:20-22) D lmuḥal ad ţţunt tlawin-agi ass-nni ideg i gecḍeḥ yid-sent ugellid Dawed. Gma-tneɣ Noumair iweṣṣa mbeɛd inelmaden ad “ceḍḥen akk-d iqeddacen.” Yerna yesteqsa-ten: “Aţ-ţilim d wid iqeddcen ɣef wid yeţţuwekklen ɣef cwiṭ n leḥwayeǧ neɣ ur neţţuwekkel ara maḍi? Eɛni a wen-ɛeǧben wiyaḍ imi kesben ṣṣifat n ṛṛuḥ?”

Inelmaden i d-yewwin diblumat seg Uɣerbaz n Gilɛad ad ɛanden Yahwa ma yella zgan sbegginen-d leḥmala s nnṣaḥa deg wannect-a. (Ahellil 113:6, 7) Ɣas ma yella kra si lɛibad i sen-d-yezzin xuṣṣen annuz, wid i d-yeffɣen si Gilɛad ur ilaq ara ad ǧǧen yir ṭṭbayeɛ n wiyaḍ a ten-ɣelbent. Gma-tneɣ Noumair iweṣṣa-ten s imeslayen-agi: “Mmektit-ed belli ur tellim ara sennig wiyaḍ [...] Lḥut i wulli n Yahwa am wakken ara sent-yelḥu neţţa.”

“Farṣet yal tagniţ bac aţ-ţberrḥem.” William Samuelson, amḍebber ɣef leqdic yeɛnan iɣerbazen iṛebbaniyen, ibder-ed lemtel n wemceggeɛ Bulus i gellan yeţfaraṣ yal tagniţ bac ad iberreḥ lexbaṛ n lxiṛ. (Lecɣal 17:17) Gma-tneɣ Samuelson iqeddem-ed mbeɛd kra n tmeskanin ireṣṣan ɣef liḥalat iseg i d-ɛeddan inelmaden deg uberreḥ n lexbaṛ n lxiṛ. Ɣef lemtel, yiwen n gma-tneɣ ţ-ţmeṭṭut-is ufan yiwet tlemẓit i geznuzun di tḥanuţ. Ṛǧan armi i genqes lɣaci i d-yusan ad aɣen, sseknen-as-d bidyu-nni yeţţusemman: Acuɣer i glaq a nɣer Adlis Iqedsen? Nnan-as daɣen belli tezmer aţ-ţaf leḥwayeǧ nniḍen yerna s lluɣa-ines, yeɛni talawuţ, deg wesmel jw.org. Kra n lweqt mbeɛd, uɣalen-d ɣur-es bac a ţ-ɛiwnen aţ-ţissin akteṛ.

“Ilit dima tweǧdem i uberreḥ n Tgelda.” William Nonkes, si lbiru n leqdic n Bitil n Marikan, yesteqsa ṛebɛa inelmaden. Llan ssewǧden yakan iman-nsen i uberreḥ n Tgelda, am wakken yura di Icɛaya 6:8. Meɛna, tura mi ɣran di Gilɛad, heggan iman-nsen bac ad xedmen akteṛ. Weltma-tneɣ Snolia Maseko tenna-d belli Aɣerbaz n Gilɛad iɛawen-iţ aţ-ţẓer d acu-tent leḥwayeǧ ideg i glaq aţ-ţwenneɛ iman-is akteṛ. Di lemtel: aţ-ţessexdem lweqt i s-d-yegran s lmizan, ɣas ma yella tesɛedda ass kamel deg uberreḥ. Tenna: “Ayen i d-lemdeɣ di llakul-agi, yerra-yi zemreɣ ad xedmeɣ akteṛ n wayen i lliɣ xeddmeɣ-t uqbel.” Gma-tneɣ Dennis Nielson yefhem amek i zemren a t-ɛiwnen imeslayen yuran di Ṣafanya 3:17 bac ur ifeččel ara di leqdic-is. Yenna-d imeslayen-agi: “Ma yella ţberriḥeɣ, ɣas ur d-wwiɣ ara lfayda ilaq-iyi a d-mmektiɣ belli Yahwa yefṛeḥ aṭas, yerna ula d nekkini ad feṛḥeɣ am neţţa.”

“Muqlet s ifṛax n igenni.” (Matta 6:26) Stephen Lett, seg Wesqamu amwellah, yefka-d lxeṭba tigejdit i greṣṣa ɣef imeslayen n Ɛisa i gennan i inelmaden-is: “Muqlet s ifṛax n igenni.” Gma-tneɣ Lett yessefhem-ed aṭas n leḥwayeǧ i gezmer a ɣ-yesselmed lemtel-nsen.—Yub 12:7.

Akken i gesseččay Yahwa ifṛax, akken daɣen ara d-yelhu yid-neɣ. Nekni d iɛeggalen n “wexxam-[is]”, yerna iwɛed-aɣ ad ibedd ɣer “wid i s-iţţilin.” (1 Timutawus 3:15; 5:8) D ṣṣeḥ, ula d nekni ilaq a nexdem lmeǧhud. Ifṛax ţnadin-d lmakla i sen-d-yeţmuddu Ṛebbi; ilaq-aɣ i nekni daɣen a ‘nnadi qbel tagelda’ bac a ɣ-ibarek Yahwa.—Matta 6:33.

Gma-tneɣ Lett yesmekta-d daɣen belli xilla n yefṛax, m’ara ḥussen tţeddu-d kra n lemḍerra, ţsuɣun mliḥ bac ad xebbṛen wiyaḍ. Nekni daɣen, neţweṣṣi wiyaḍ m’ara iwalem, ɣef lemtel m’ara ‘yeɣleḍ yiwen.’ (Igalatiyen 6:1) M’ara neţberriḥ, neţxebbiṛ lɣaci belli ‘ass n Yahwa’ iqreb-ed. (Ṣafanya 1:14) Tikti nniḍen: gma-tneɣ Lett yessefhem-ed belli ifṛax yeţţinigen, ţţafgen nnig n idurar ɛlayen; am nutni, s lemɛawna n Yahwa, nezmer a nezger i kra n iɛewwiqen ara ɣ-d-ibanen amzun d lmuḥal a sen-nɛeddi.—Matta 17:20.

Taggara. Mbeɛd mi ţţunefken diblumat i inelmaden, yiwen seg-sen yeɣra-d yiwet tebṛaţ n ccekṛan i d-uran wid yeɣran deg uɣerbaz-agi. Deg imeslayen-is ineggura, gma-tneɣ Herd yessefhem-ed belli win yeţţeɛraḍen ad yessekcem lehduṛ n Yahwa deg wul-is, icuba win yeţţeɛraḍen ad yessentu imesmaṛen deg ifeggagen n webrid n tmacint. Laqent xilla n tyitiwin s tefḍist bac ad yentu umesmaṛ akken ilaq. Akka daɣen i gwulem i inelmaden n Gilɛad ad ţkemmilen ad ţxemmimen ɣef wayen i d-ḥefḍen. Yenna-yasen: “Nadit aţ-ţessentum mliḥ aselmed-agi deg wulawen-nwen. [...] Leḥḥut ɛlaḥsab n ixemmimen n Ṛebbi, aţ-ţilim d lbaṛaka i wiyaḍ.”