“Acḥal n leḥmala i ɣ-d-iţţunefken! Nefṛeḥ ayendin!” Akka i d-tenna yiwet n tmeṭṭut di Ukṛanya mi tesla i yiwet tebṛaţ yesɛan azal i d-yeɣra Stephen Lett, yiwen uɛeggal seg Wesqamu amwellah n Inagan n Yahwa. Tameṭṭut-agi tella d yiwet ger 165 000 n Inagan i gḥessen i gma-tneɣ Lett i d-yusan ɣer tmurt-a di taggara n dduṛt, yeɛni si 10 ar 11 maggu 2014.

Leqraya n tebṛaţ-agi d waṭas n lxeṭbat ireṣṣan ɣef Wedlis Iqedsen ţwaṭerjment ɣer xemsa tutlayin yerna sɛeddan-tent-id di 700 n imukan n leɛbada di Ukṛanya.

Di sin wussan-nni, Mark Sanderson, yellan ula d neţţa d aɛeggal n Wesqamu amwellah, yeɣra-d tabṛaţ-agi deg yiwen wahil i d-iţţuheggan i yerfiqen-nneɣ di ddin n tmurt n Rrus. Kteṛ n 2 500 tjemmuyaɛ n Byilurusya akk-d Rrus, yeɛni azal n 180 413 imeḥdaṛ, i gfeṛṛǧen s ţţawil n tiliẓri ahil-agi i d-yeţwaṭerjmen ɣer 14 tutlayin.

Tabṛaţ-agi ikteb-iţ-id Wesqamu amwellah i tjemmuyaɛ meṛṛa n Inagan n Rrus d Ukṛanya. Gma-tneɣ Sanderson yeɣra-ţ-id s trusit, ayen i gdemmren lbiru aɣelnaw n Rrus a d-yaru imeslayen-agi: “Atmaten ţ-ţyessetmatin iɛǧeb-asen lḥal mliḥ imi d-yerra lbal-is Wesqamu amwellah ɣer temnaṭ-agi. Akken ma nella nḥuss amzun Asqamu amwellah yeṭṭef-aɣ ger ifassen-is.”

Tabṛaţ-agi teţţuceggeɛ-ed bac aţ-ţṣebber w’aţ-ţesseǧhed Inagan n tama-yagi yeţmagaren iɣeblan i d-texleq tsertit. Teţweṣṣi-ten ad xḍun i temsal icudden ɣer tsertit bac “ur [ţţilin] ara si ddunit.”—Yuḥenna 17:16.

Ɣef ddemma n wannect-a, Asqamu amwellah idemmer Inagan ad sseǧhden lɛalaqat-nsen akk-d Yahwa s tẓallit, s usenqed n Wawal n Ṛebbi akk-d umeyyez fell-as. Yesmekta-yasen-d daɣen i imeḥdaṛ belli, akken bɣunt ilint cceddat-nsen, zemren ad ţţeklen ɣef wayen i d-iwɛed Ṛebbi di Icɛaya 54:17, ara yeḍrun mebla ccekk: “Kra n leslaḥ ara yeţwaxedmen i lemḍerra-[nwen], ur [wen]-ixeddem acemma.”

Asqamu amwellah ifukk tabṛaţ-is s imeslayen-agi: “Nḥemmel-iken aṭas akken ma tellam. Ḥṣut belli nezga neţxemmim fell-awen yerna neţẓalla i Yahwa ɣef ddemma-nwen.”

Lbiru n Inagan n Yahwa n Ukṛanya yenna-d ɣef tmerziwt-agi: “Asqamu amwellah yerra-d lbal-is ɣur-neɣ s leḥmala tameqrant, annect-a yugar akk ayen i llan ţṛaǧun-t watmaten. Timerziwt n watmaten-nneɣ Lett d Sanderson ɣer Ukṛanya akk-d Rrus deg yiwet n teswiɛt, yesbeggen-ed ɛinani tadukli n wegdud n Ṛebbi. Ayagi yesmekta-d daɣen i watmaten acḥal i ţḥebbiṛen fell-asen Yahwa akk-d Ɛisa. Nezmer meṛṛa a d-nini belli timerziwt-agi tusa-d di lweqt-is: nḥuss belli yeţţunefk-aɣ-d lǧehd yerna newǧed a nkemmel leqdic i Yahwa, akken bɣunt ilint cceddat ara d-nemmager.”