Ala, Inagan n Yahwa mačči d ṭṭayfa. Nekni d imasiḥiyen, yerna nxeddem ayen akk iwumi nezmer bac a netbeɛ lemtel n Ɛisa Lmasiḥ w’a neddu ɛlaḥsab n uselmed-ines.

 Mkul yiwen amek i gefhem ameslay-agi “ṭṭayfa.” A nessenqed sin ixemmimen i gcaɛen ɣef wayen yeɛnan ṭṭayfat w’a nẓer iwacu ur ɛnin ara Inagan n Yahwa.

•   Kra fehmen belli ṭṭayfa ţ-ţarbaɛt n lɛibad itebɛen yiwen n ddin ajdid neɣ ţ-ţarbaɛt yeffɣen i webrid n walbeɛḍ n ddyanat yellan yakan. Inagan n Yahwa ur d-snulfan ara ddin ajdid. Ddin-nneɣ iţeddu ɛlaḥsab n lemtel i d-ǧǧan imasiḥiyen n lqern amezwaru; lemtel-nsen d wayen i sselmaden ţwaketben deg Wedlis Iqedsen. (2 Timutawus 3:16, 17) Neţţamen belli, deg wayen yeɛnan ddin, d Adlis Iqedsen iɣef i glaq ad yili leţkal.

•   Kra nniḍen fehmen belli ṭṭayfa ţ-ţarbaɛt n lɛibad itebɛen yiwen n ddin i d-yeţţawin lemḍerra, i gesɛan yiwen wergaz d amḍebber. Inagan n Yahwa ur ḥsiben ula d yiwen wergaz d amḍebber fell-asen. Neţţak azal i umenzay-agi i d-yeǧǧa Ɛisa i inelmaden-is: “Yiwen kan n umeqwran [neɣ wemḍebber] i tesɛam, d Lmasiḥ.”—Matta 23:10.

 Inagan n Yahwa mačči yakk d ṭṭayfa i d-yeţţawin lemḍerra; ttabaɛen ddin i d-yeţţawin nnfeɛ ama i wid yellan deg-s ama i lɛamma. Di lemtel, leqdic-nneɣ n uberreḥ n lexbaṛ n lxiṛ yeţɛawan aṭas n lɛibad ad ɣelben ṭṭbayeɛ yeţḍurrun, am ccṛab neɣ lkif i gmelken kra seg-sen. Nesseḥfaḍ lektiba d leqraya i luluf n yemdanen di ddunit meṛṛa. Yerna, ma yella teḍra-d twaɣit, neţţak afus n lemɛawna s lqewwa di lecɣal n usellek. Nxeddem s ṣṣeḥ ayen akk umi nezmer bac a nefk i medden ayen i ten-inefɛen, akken i t-iweṣṣa Ɛisa i inelmaden-is.—Matta 5:13-16.