Inagan n Yahwa ssexdamen xilla n ṭrejmat m’ara ssenqaden Adlis Iqedsen. Acu kan, ma tella Ṭrejma n ddunit tajdiṭ di lluɣa-nsen, ţţextiṛin akteṛ ṭrejma-yagi imi tessexdam isem n Ṛebbi, tṣeḥḥa yerna teshel i lefhama.

•   Tessexdam isem n Ṛebbi. Kra seg wid i d-yessufuɣen Adlis Iqedsen ur rrin ara ccan i Bab n tektabt-agi. Ɣef lemtel, yiwet n ṭrejma tefka-d ismawen n 70 yemdanen i gţekkan, s lqerb neɣ s lbeɛd, deg usufeɣ-ines; meɛna ur d-tebdir ula tikkelt isem n Bab n Wedlis Iqedsen: Yahwa Ṛebbi.

   Ma d Ṭrejma n ddunit tajdiṭ terra isem-agi n Ṛebbi ɣer luluf n imukan anda i gella yeţwakteb deg iţafţaren imezwura. Tarbaɛt i d-issufɣen ṭrejma-yagi ur bɣin ara a d-ssenɛten ismawen-nsen.

•   Tṣeḥḥa. Kra n ṭrejmat ur d-ţţakent ara lexbaṛ n Wedlis Iqedsen akken i gella di laṣel. Deg yiwet seg-sent, Matta 7:13 yeţwaṭerjem akka: “Ur nezmir a nekcem ɣer igenni siwa si tewwurt iḍeyqen! Tawwurt yeţţawin ɣer tmes wessiɛet.” Lameɛna afir-agi, di laṣel, yella deg-s umeslay “nnger”, mačči “times”. Ṭrejmanat ssexdmen ahat ameslay “times” axaṭer ţţamnen belli imcumen ţţenɛeţţaben i lebda deg yiwet n ǧahennama n tmes. Acu kan, aselmed-agi ur ireṣṣa ara ɣef Wedlis Iqedsen. Daymi i nezmer a nɣer di Ṭrejma n ddunit tajdiṭ ayagi: “Kecmet si tewwurt iḍeyqen; axaṭer hraw yerna wessiɛ webrid yeţţawin ɣer nnger.”

•   Teshel i lefhama. Bac aţ-ţili ṭrejma telha, ur ilaq ara kan aţ-ţili tṣeḥḥa, meɛna ilaq daɣen aţ-ţishil i lefhama. A d-nefk yiwen n lemtel. Di 1 Buṭrus 1:13, amceggeɛ Buṭrus yessexdem kra n imeslayen i gzemren a d-ţwaṭerjmen akka: “Begset i wammas n leɛqel-nwen.” Imi di zzman-nneɣ imeslayen-agi ur sɛin ara lmeɛna ilaqen, Ṭrejma n ddunit tajdiṭ terra-ten-id akken ara ishilen i lefhama. Teqqar-ed belli imasiḥiyen ilaq ad ‘heggin leɛqel-nsen i leqdic.’

 Ṭrejma n ddunit tajdiṭ tufrar-ed imi tessexdam isem n Ṛebbi, tṣeḥḥa yerna teshel i lefhama. Yerna mačči d aya kan. Teţwafraq daɣen baṭel. D imelyan n lɛibad i gzemren ihi ad ɣren Adlis Iqedsen, mkul yiwen di lluɣa-ines, ula d wid ur nesɛi ara s wacu ara t-id-aɣen.