Ih. Neţţak afus n lemɛawna deg umur ameqran n txessaṛin i d-iḍerrun. Acḥal d abrid i nefka afus n lemɛawna m’ara d-teḍru txessaṛt. Neţɛawan Inagan d wid ur nelli ara d Inagan, ɛlaḥsab n lameṛ-agi n Wedlis Iqedsen: “An-nexdem lxiṛ i yemdanen meṛṛa, ladɣa i watmaten di liman.” (Igalatiyen 6:10) Nxeddem daɣen lmeǧhud akken a nefk i wid i tḥuza txessaṛt lemɛawna deg wayen yeɛnan leḥwayeǧ n ṛṛuḥ w’a ten-nṣebber.—2 Ikurintiyen 1:3, 4.

 M’ara d-teḍru txessaṛt, iqeddacen n tjemmuyaɛ n wemḍiq-nni ţnadin ɣef Inagan meṛṛa akk-d yemdukkal-nsen di ddin bac ad ẓren m’ur ten-yuɣ wara, neɣ ma yella kra i ḥwaǧen. Umbeɛd, ţxebbiṛen lbiru aɣelnaw n Inagan n Yahwa, qqaren-as d acu n lemɛawna i geţţunefken.

 Ma yella ur zmirent ara tjemmuyaɛ n wemḍiq-nni ideg i d-teḍra txessaṛt ad fkent afus n lemɛawna, d Asqamu amwellah n Inagan n Yahwa i gesteklifen s temsalt-agi. Akka i ssewǧden iman-nsen imasiḥiyen n lqern amezwaru yiwet n tikkelt, asmi i d-yeɣli fell-asen laẓ. (1 Ikurintiyen 16:1-4) Lbiru aɣelnaw yeţwekkil kra n trebbuyaɛ n usellek bac ad wellhent lecɣal. Kra n Inagan n tamiwin nniḍen ţṛuḥun d iwaziwen, ţţaken si lweqt-nsen bac ad ɛiwnen.—Lemtul 17:17.

 Tukciwin yeţţuceggaɛen ɣer lbiruwat iɣelnawen n Inagan n Yahwa ssexdamen-tent daɣen iwakken ad ɛiwnen yis-sent wid i tḥuza txessaṛt. (Lecɣal 11:27-30; 2 Ikurintiyen 8:13-15) Wid akk yeţcaraken di leqdic-agi n usellek d iwaziwen. Ihi, idrimen yeţwaɛezlen i ccɣel-agi ssexdamen-ten kan i usellek mačči i wayen nniḍen. Neţḥebbiṛ mliḥ bac a nessexdem akken ilaq yal tikci.—2 Ikurintiyen 8:20.