Inagan n Yahwa xeddmen lmeǧhud bac ad tebɛen ddin amasiḥi akken i t-yesselmed Ɛisa d wakken i t-ṭebbqen yemceggɛen-is. Amagrad-agi iheddeṛ-ed ɣef kra n leḥwayeǧ yellan d lsas n wayen swayes i neţţamen.

1.   Ṛebbi. Neţţeɛbad ala Ṛebbi awḥid n tideţ, Bab n Tezmert, Axellaq, yeţţusemman Yahwa. a (Ahellil 83:18, Traduction du monde nouveau; Aweḥḥi 4:11) D Ṛebbi n Abṛaham, n Musa akk-d Ɛisa.​—Tuffɣa 3:6; 32:11; Yuḥenna 20:17.

2.   Adlis Iqedsen. Ar ɣur-neɣ, Adlis Iqedsen d lexbaṛ i d-iweḥḥa Ṛebbi i lɛibad. (Yuḥenna 17:17; 2 Timutawus 3:16) Ayen swayes i neţţamen ireṣṣa ɣef 66 tektabin yellan deg-s, ama ţ-ţid yellan di “Lɛahd Aqdim”, ama ţ-ţid yellan di “Lɛahd Ajdid”. Ayagi yessefhem-it-id akken ilaq Jason BeDuhn, yiwen uselmad n tesdawit, mi gura ɣef Inagan n Yahwa belli “ayen is i ţţamnen d wayen i xeddmen [ireṣṣa ɣef] wayen kan yellan deg Wedlis Iqedsen, bla ma xemmen uqbel kra n lḥaǧa ɣef wayen i glaq a t-afen deg-s.” b

    Ɣas nqebbel aselmed n Wedlis Iqedsen s lekmal-is, ur nelli ara d wid yeţnadin ad fken lmeɛna i yal ameslay weḥd-es. Nesteɛṛef belli kra n yeḥricen n Wedlis Iqedsen ţţunefken-d d lemɛun yerna ur ilaq ara a ten-nefhem akken kan i ţwaketben.​—Aweḥḥi 1:1.

3.   Ɛisa. Nettabaɛ aselmed n Ɛisa Lmasiḥ akk-d lemtel i d-yeǧǧa yerna neţţarra-yas ccan imi d Amsellek yerna d Mmi-s n Ṛebbi. (Matta 20:28; Lecɣal 5:31) Ihi, nekni d imasiḥiyen. (Lecɣal 11:26) Acu kan, nelmed-ed seg Wedlis Iqedsen belli Ɛisa Lmasiḥ mačči d neţţa i d Ṛebbi Bab n Tezmert yerna aselmed n Talut ur d-yewwi ara yakk aẓar seg Wedlis Iqedsen.​—Yuḥenna 14:28.

4.   Tagelda n Ṛebbi. D yiwet n lḥukuma n igenwan yellan s ṣṣeḥ, mačči d liḥala n wul n imasiḥiyen. Tagelda-yagi aţ-ţuɣal deg wemkan n lḥukumat n lɛibad w’a d-tesseḍru lmeqsud n Ṛebbi yeɛnan lqaɛa. (Danyil 2:44; Matta 6:9, 10) D annect-a i qrib a t-texdem, axaṭer licaṛat n Wedlis Iqedsen ssenɛatent-ed belli la neţɛici deg “wussan ineggura.”​—2 Timutawus 3:1-5; Matta 24:3-14.

    Ɛisa d Agellid n Tgelda n Ṛebbi deg igenwan. Yebda leḥkem-ines di 1914.​—Aweḥḥi 11:15.

5.   Leslak. Nezmer a neţţusellek si ddnub d lmut s wesfel n Ɛisa, i geţţunefken d lefdiya. (Matta 20:28; Lecɣal 4:12) Bac a d-sfaydin yemdanen si ţţawil-agi, mačči d liman kan s Ɛisa i sen-ilaqen, ilaq-asen daɣen ad beddlen ṭṭbiɛa-nsen w’ad ţwaɣeḍṣen. (Matta 28:19, 20; Yuḥenna 3:16; Lecɣal 3:19, 20) Lefɛayel n walbeɛḍ ţţaken-d ţţbut belli liman-is yedder. (Yeɛqub 2:24, 26) Meɛna, leslak ur t-id-nrebbeḥ ara; ḥaca s “nneɛma n Yillu” i gezmer a ɣ-d-yeţţunefk.​—Igalatiyen 2:16, 21.

6.   Igenwan. Yahwa Ṛebbi, Ɛisa Lmasiḥ akk-d lmuluk unṣiḥen ţɛicen deg igenwan. c (Ahellil 103:19-21; Lecɣal 7:55) Ḥaca cwiṭ kan n lɛibad, 144 000, ara d-yeḥyun si lmut akken ad ɛicen deg igenwan bac ad ḥekmen akk-d Ɛisa di Tgelda.​—Danyil 7:27; 2 Timutawus 2:12; Aweḥḥi 5:9, 10; 14:1, 3.

7.   Lqaɛa. Ṛebbi ixleq-ed lqaɛa bac aţ-ţili ţ-ţanezduɣt n lɛibad i lebda. (Ahellil 104:5; 115:16; Amusnaw 1:4) Ṛebbi ad yefk i lɛibad yeţţaɣen awal ṣṣeḥḥa ikemlen akk-d tudert n dayem ɣef lqaɛa ara yuɣalen d lǧennet.​—Ahellil 37:11, 34.

8.   Cceṛ akk-d lemḥayen. Kulci yebda-d asmi yuɣal yiwen n lmelk n Ṛebbi d amɛaṣi. (Yuḥenna 8:44) Lmelk-agi, yeţţusemman “Cciṭan” neɣ “Iblis” seg wasmi i gɛuṣa Ṛebbi, iqenneɛ argaz ţ-ţmeṭṭut imezwura akken ad ddun si lǧiha-s. Aya yegla-d s uxessaṛ ameqran i warraw n wergaz ţ-ţmeṭṭut-agi imezwura. (Laṣel n ddunit 3:1-6; Iṛumaniyen 5:12) Bac ad yefru timsal i d-yessker Cciṭan, Ṛebbi iɛemmed i cceṛ akk-d lemḥayen ad ilin, lameɛna ur ten-yeţţaǧǧa ara i lebda.

9.   Lmut. Imdanen ara yemmten ţţuɣalen ulac-iten. (Ahellil 146:4; Amusnaw 9:5, 10) Ur tmeḥḥinen ara di kra n ǧahennama n tmes.

    D imelyaṛen n lɛibad ara d-yerr Ṛebbi ɣer tudert s ḥeggu n lmeggtin. (Lecɣal 24:15) Acu kan wid ara d-yuɣalen ɣer tudert, ma ugin ad issinen iberdan n Ṛebbi, ad negren i dayem; ur ţţuɣalen ara ad sɛun asirem n ḥeggu.​—Aweḥḥi 20:14, 15.

10.   Tawacult. Nettabaɛ ṣṣenf n zzwaǧ i gesbedd Ṛebbi di laṣel, yeɛni zzwaǧ n yiwen wergaz d yiwet n tmeṭṭut, yerna tella yiwet kan n ssebba iɣef i gezmer a d-yili berru: d zzna. (Matta 19:4-9) Neţţuqenneɛ belli imenzayen n Wedlis Iqedsen yeččuṛen d lekyasa ţɛawanen tiwaculin ad ilint ţ-ţiseɛdiyin.​—Ifasusiyen 5:22–6:1.

11.   Leɛbada-nneɣ. Ur neţţeɛbad la amidag (ṣṣalib) wala ayen akk yellan d ameṣnuɛ neɣ d ţţewṣifa icudden ɣer leɛbada. (Asmekti 4:15-19; 1 Yuḥenna 5:21) Atentah kra n leḥwayeǧ yesɛan azal i nxeddem di leɛbada-nneɣ:

    •   Neţẓalla i Ṛebbi.​—Ifilibiyen 4:6.

    •   Neqqar yerna nessenqad Adlis Iqedsen.​—Ahellil 1:1-3.

    •   Neţmeyyiz ɣef wayen i d-nlemmed seg Wedlis Iqedsen.​—Ahellil 77:13.

    •   Neţnejmaɛ bac a neẓẓall, a nɣer Adlis Iqedsen, a necnu, a nehdeṛ ɣef liman-nneɣ w’a nesseǧhed irfiqen-nneɣ di ddin akk-d imeḥdaṛ nniḍen.​—Ikulusiyen 3:16; Iɛebṛaniyen 10:23-25.

    •   Neţberriḥ “linǧil [lexbaṛ n lxiṛ] n tgelda.”​—Matta 24:14.

    •   Neţɛawan wid yellan di lexṣaṣ.​—Yeɛqub 2:14-17.

    •   Nbennu yerna neţreqqiɛ imukan-nneɣ n leɛbada (yeţţusemman Tizeɣwa n Tgelda) akk-d lbaṭimat-nneɣ nniḍen i nessexdam i lmend n leqdic-nneɣ n uselmed n Wedlis Iqedsen di ddunit meṛṛa.​—Ahellil 127:1.

    •   Neţţak afus n lemɛawna i wid i ḥuzant twaɣiyin.​—Lecɣal 11:27-30.

12.   Tuddsa-nneɣ. Tuddsa-nneɣ tebna ţ-ţijemmuyaɛ, mkul yiwet seg-sent teţwellih-iţ yiwet n terbaɛt n iqeddacen di ddin. Iqeddacen-agi mačči d lḥekkam n ddin yerna ur ţwaxellaṣen ara ɣef wayen i xeddmen. (Matta 10:8; 23:8) Ur neṭṭalab ara leɛcuṛ yerna ur nessutur ara maḍi idrimen deg inejmuɛen-nneɣ. (2 Ikurintiyen 9:7) Neţqabal ameṣruf n leqdic-nneɣ meṛṛa s wayen i d-itekken si tukciwin.

     Asqamu amwellah, yeɛni yiwet n terbaɛt tamecṭuḥt n imasiḥiyen yessnen mliḥ i gqeddcen di lbiru-nneɣ amaḍlan, yeţmuddu lewhi i Inagan n Yahwa n ddunit meṛṛa.​—Matta 24:45.

13.   Tadukli-nneɣ. Di ddunit kamel, neddukkel s wayen is i neţţamen. (1 Ikurintiyen 1:10) Nxeddem seg wul lmeǧhud bac ur nxeddem ara lxilaf ger leɛṛac, ccetlat neɣ ger yemdanen yesɛan d wid ur nesɛi. (Lecɣal 10:34, 35; Yeɛqub 2:4) Meɛna, tadukli-yagi ur tmenneɛ ara i mkul yiwen deg-neɣ ad yextiṛ ayen yebɣa. Mkul Inigi yeţţaṭṭaf leqrarat-is ɛlaḥsab n lxaṭer-is yeţţuṛebban s wayen yesselmad Wedlis Iqedsen.​—Iṛumaniyen 14:1-4; Iɛebṛaniyen 5:14.

14.   Tikli-nneɣ. Neţnadi a d-nbeggen leḥmala mebla ṭṭmeɛ deg wayen akk i nxeddem. (Yuḥenna 13:34, 35) Ur nqebbel ara lefɛayel ur s-nɛeǧǧeb ara i Ṛebbi, am yir asexdem n idammen s tmerna n idammen. (Lecɣal 15:28, 29; Igalatiyen 5:19-21) Nekni d imhenniyen, ur neţcarak ara di lgirrat. (Matta 5:9; Icɛaya 2:4) Neţqadar imḍebbren n tmurt anda i neţɛic, yerna neţţaɣ awal deg wayen yeɛnan leqwanen, ma yella ur xulfen ara leqwanen n Ṛebbi.​—Matta 22:21; Lecɣal 5:29.

15.   Lɛalaqat-nneɣ akk-d wiyaḍ. Ɛisa yefka-d lameṛ-agi: “Aţ-ţḥemmleḍ lɣir-ik am yiman-ik.” Yenna-d daɣen belli imasiḥiyen “ur llin ara si ddunit.” (Matta 22:39; Yuḥenna 17:16) Ihi, ɣas neţnadi “an-nexdem lxiṛ i yemdanen meṛṛa”, nexḍa yakk i tsertit yerna ur nseɛɛu ara maḍi lɛalaqa akk-d ddyanat nniḍen. (Igalatiyen 6:10; 2 Ikurintiyen 6:14) Meɛna neţqadar wiyaḍ di lxetyaṛ-nsen yeɛnan timsal-agi.​—Iṛumaniyen 14:12.

 Ma tesɛiḍ isteqsiyen nniḍen ɣef wayen swayes i ţţamnen Inagan n Yahwa, tzemreḍ aţ-ţafeḍ aṭas n lexbaṛat nniḍen deg wesmel-nneɣ. Tzemreḍ daɣen aţ-ţaruḍ neɣ aţ-ţessiwleḍ i yiwen si lbiruwat-nneɣ iɣelnawen, aţ-ţḥedṛeḍ i unejmuɛ deg yiwen seg imukan-nneɣ n leɛbada i k-iqerben neɣ aţ-ţhedṛeḍ d yiwen Inigi izedɣen di lǧiha-k.