Inagan n Yahwa ţnadin ad sseǧhden lɛalaqat ama di twaculin-nsen ama di twaculin n lɣir-nsen. D Ṛebbi i d Axellaq n twacult; neţqadar-it ɣef wannect-a. (Laṣel n ddunit 2:21-24; Ifasusiyen 3:14, 15) Deg Wedlis Iqedsen, Ṛebbi yesselmad kra n imenzayen i geţɛawanen, di ddunit meṛṛa, yal argaz ţ-ţmeṭṭut-is ad ddukklen mliḥ w’ad ilin di lfeṛḥ.

 Nxeddem lmeǧhud bac a netbeɛ lewṣayat n Wedlis Iqedsen axaṭer ţɛawanent-aɣ a nuɣal d imezwaǧen n lɛali yerna d imawlan n lɛali. (Lemtul 31:10-31; Ifasusiyen 5:22–6:4; 1 Timutawus 5:8) S imenzayen yeččuṛen d lekyasa, i d-yekkan seg Wedlis Iqedsen, ula ţ-ţiwaculin ideg i mxallafen iɛeggalen-nsent di ddin ţɛicent di lfeṛḥ. (1 Buṭrus 3:1, 2) Daɣneţţa, wali d acu i d-nnan kra n lɛibad, d irgazen neɣ ţ-ţulawin ur nelli ara d Inagan n Yahwa, meɛna imezwaǧen-nsen uɣalen d Inagan:

•   “Seţţa iseggasen imezwura i d-nɛac lwaḥid yeqwa deg-sen umennuɣ d leḥzen. Asmi i teqqel Ivete ţ-ţinigit n Yahwa, tuɣal ţ-ţaḥnint yerna ţ-ţaṣebrit.” Ayen i tbeddel di ṭṭbiɛa-ines isellek-ed zzwaǧ-nneɣ.—Clauir, Brizil.

•   “Asmi i gebda wergaz-iw Chansa taɣuri n Wedlis Iqedsen akk-d Inagan n Yahwa, ur bɣiɣ ara axaṭer lliɣ nwiɣ-as beṭṭun tiwaculin. Meɛna, rriɣ-d s lexbaṛ belli Adlis Iqedsen, di tin n ṣṣeḥ, iɛawen zzwaǧ-nneɣ.”—Agness, Zambya.

 Di leqdic-nneɣ n uberreḥ, nesskanay i lɣir-nneɣ belli ma ṭṭebbiqen lewṣayat yeččuṛen d lekyasa n Wedlis Iqedsen, ad issinen:

•   Amek ara yextiṛ yal yiwen akken ilaq amezwaǧ

•   Amek ara ɣelben uguren n useggas amezwaru n zzwaǧ

•   Amek ara sen-lḥun i iḍulan akk-d yemɣaren

•   Amek ara ţṣerrifen

•   Amek ara ḥebsen amceččew

•   Amek ara ḥefḍen ad ţţemsamaḥen

•   Amek ara ṛebbin dderya-nsen

 Ilaq a nesteɛṛef belli tikwal abeddel n ddin yeţţili d ssebba n wuguren. Di 1998, yiwet n tkebbanit yesteklfen s lbeḥt umi qqaren Sofres tefka-d leḥsabat-agi: Mkul argaz ţ-ţmeṭṭut-is ger ɛecrin imezwaǧen, iseg yiwen umezwaǧ yuɣal d Inigi, mmugren-d uguren.

 Ɛisa icar-ed belli wid ara itebɛen aselmed-ines ad sɛun tikwal uguren di twaculin-nsen. (Matta 10:32-36) Ɣef wayen yeɛnan leḥwayeǧ iɣef i llan lɛibad ţlummun imasiḥiyen n zik, di lweqt n leḥkem n Ṛṛuman, yiwen n umusnaw n umezruy yeţţusemman Will Durant yenna-d: “Ddin amasiḥi, ɣef wakken i d-qqaren, yella yeţţawi-d tawaɣit i yexxamen.” a Kra n Inagan n Yahwa ţqabalen llum yecban wagi ass-a. Nezmer a d-nefhem seg wannect-a belli d amezwaǧ-nni yellan d Inigi i d ssebba n wemceččew di twacult?

 Axxam n ccṛeɛ n Luṛub n izerfan n wemdan yenna-d awal-is ɣef taluft-agi i d-gren ɣef Inagan n Yahwa belli beṭṭun tiwaculin. Yenna-d belli d iɛeggalen ur nelli ara d Inagan i d ssebba n wuguren n twacult di xilla n liḥalat, axaṭer ţţagin “ad qeblen w’ad qadren tilelli i gesɛa weqrib-nni-nsen [yuɣalen d Inigi] akken ad yetbeɛ w’a d-ibeggen ddin-is.” Yerna-d daɣen ayagi: “Tiwaculin meṛṛa, ideg iɛeggalen mxallafen di ddin, ţɛicent liḥala-yagi; akken ula d Inagan n Yahwa.” b Ula m’ara sɛun uguren d wid i gkeṛhen ddin-nsen, Inagan n Yahwa ţnadin ad ṭebbqen lewṣaya-yagi n Wedlis Iqedsen: “Ur ţţarrat ara i cceṛ s cceṛ. [...] Ma yella wamek, ma ɣur-wen i tella, ilit di lehna kwenwi d yemdanen meṛṛa.”—Iṛumaniyen 12:17, 18.

 Inagan ttabaɛen lameṛ n Wedlis Iqedsen i geţdemmiren ɣer zzwaǧ “di Ssid” kan, yeɛni d win yellan d Inigi am nutni. (1 Ikurintiyen 7:39) Uyerna lameṛ-agi i d-yekkan seg Wedlis Iqedsen mačči d ayen yellan d lmuḥal. Ɣef lemtel, ɛlaḥsab n yiwen umagrad n 2010 i d-yeffɣen deg ujeṛnan yeţţusemman Journal of Marriage and Family, “imezwaǧen yellan deg yiwen n ddin, yesɛan yiwet n leɛbada yerna i gɛedlen deg wayen is i ţţamnen” c seɛɛun dima lɛalaqat yelhan di zzwaǧ-nsen.

 Acu kan, Inagan n Yahwa ur ţweṣṣin ara wid yellan di ddin-nsen ad msebḍun d wid ukud i zewǧen, ur nelli ara d Inagan. Yeqqar-ed Wedlis Iqedsen: “Ma yella yiwen seg watmaten isɛa tameṭṭut ur numin ara, lameɛna teqbel aţ-ţeqqim yid-es, ur s-iberru ara. Tameṭṭut yesɛan argaz ur numin ara, lameɛna yeqbel ad iqqim yid-es, ur tberru ara i wergaz-is.” (1 Ikurintiyen 7:12, 13) Inagan n Yahwa ttabaɛen imeslayen-agi.