Watch Tower Bible and Tract Society of Pennsylvania d yiwet n tiddukla ur neţnadi ara aţ-ţerbeḥ idrimen; tennulfa-d di 1884 ɛlaḥsab n leqwanen n Bansilbanya (Marikan). Ssexdamen-ţ Inagan n Yahwa akken ad sseddun leqdic-nsen di ddunit meṛṛa, ideg iţekka usufeɣ n Wedlis Iqedsen akk-d tektabin ireṣṣan fell-as.

 Akken i t-id-iqqar lmitaq iɣef i tbedd, tiddukla-yagi tesɛa lmeqsudat yeɛnan “ddin, afus n lemɛawna akk-d uselmed”, abeɛda “aberreḥ akk-d uselmed n Linǧil n Tgelda n Ṛebbi yellan ddaw n leḥkem n Ɛisa Lmasiḥ.” Yezmer walbeɛḍ ad yuɣal d aɛeggal di tiddukla-yagi s leɛraḍa ara d-yeţwaɛreḍ, mačči s tukciwin-ines. Iɛeggalen n tiddukla-yagi neɣ wid i ţ-yesseddayen ţɛawanen Asqamu amwellah n Inagan n Yahwa.

 Zzyada ɣef Watch Tower Bible and Tract Society of Pennsylvania, Inagan n Yahwa ssexdamen aṭas n tkebbaniyin i gbedden s lqanun deg waṭas n tmura. Kra deg-sent sɛant deg yismawen-nsent imeslayen “Watch Tower”, “Watchtower” neɣ ṭrejma yeţcabin ɣer umeslay-agi.

 Tiddukliwin-agi meṛṛa ɛawnent-aɣ a nexdem yiwen n leqdic d ameqran seg wasmi i d-nnulfant. Ɣef lemtel:

•   Tira akk-d usufeɣ n tezmamin. Nessufeɣ-ed azal n 220 imelyan n Wedlis Iqedsen d 40 imelyaṛen n tezmamin ireṣṣan fell-as, s wakteṛ n 900 lluɣat. Asmel Internet jw.org isemmeḥ i lɛibad ad ɣren baṭel Adlis Iqedsen di Internet s wakteṛ n 160 lluɣat w’ad afen leǧwab i yesteqsiyen ɣef Wedlis Iqedsen am westeqsi-yagi: “D acu i ţ-ţagelda n Ṛebbi?”

•   Aselmed. Nesbedd llakulat yemxallafen i uselmed n Wedlis Iqedsen. Ɣef lemtel, si 1943 ɣer da, azal n 9 000 n Inagan n Yahwa umi yeţţunefk uselmed iǧehden deg Uɣerbaz n Gilɛad, ireṣṣan ɣef Wedlis Iqedsen, bac ad ilin d imceggɛen neɣ bac ad sseǧhden leqdic-nneɣ di ddunit meṛṛa. Yal smana, d imelyan n lɛibad, yerna ula d wid ur nelli ara d Inagan, umi yeţţunefkay uselmed deg inejmuɛen n mkul tajmaɛt n Inagan. Nesselmad daɣen i yemdanen ad issinen ad ɣren w’ad ketben yerna nessufeɣ-ed yiwet n treẓẓit s 120 lluɣat bac a nesseḥfeḍ i wiyaḍ ad ɣren w’ad arun.

•   Afus n lemɛawna. Neţţak lemɛawna i wid i ḥuzant twaɣiyin i d-itekken sɣur lɛebd, am usenger n ccetlat i geḍran di 1994 di tmurt n Ṛwanda, neɣ si twennaṭ, am zzelzla i gessengren tamurt n Hayti di 2010.

 Ɣas ma yella amur ameqran n lecɣal-nneɣ ţ-ţiddukliwin akk-d tkebbaniyin-agi i nessexdam i t-yeţwellihen, lecɣal-agi ur cudden ara ɣur-sent. Yessefk ɣef yal amasiḥi ad yexdem ayen iɣef i t-iwekkel Ṛebbi: ad iberreḥ w’ad yesselmed lexbaṛ n lxiṛ. (Matta 24:14; 28:19, 20) Neţţuqenneɛ belli Ṛebbi yeţɛawan-aɣ di leqdic-nneɣ yerna d neţţa ara ikemmlen ad “yesgem” ayen i nxeddem.​—1 Ikurintiyen 3:6, 7.