Isem n Ṛebbi, yeţwaktaben s ṛebɛa leḥṛuf-agi n tɛibṛanit יהוה, yura-d azal n 7000 tikkal di Tira tiɛibṛaniyin. Ṭrejma n ddunit tajdiṭ terra-d ṛebɛa leḥṛuf-agi, umi qqaren deg waṭas n lluɣat Titṛagṛam: “Jehovah” s teglizit, “Jéhovah” s tefṛansist, “يَ‍هْوَه‍” (Yahwah) s taɛṛabt. a Deg Wedlis Iqedsen neţţaf isem-agi akteṛ n yismawen akk nniḍen. Ɣas akken wid umi d-yeţţuweḥḥa Wedlis Iqedsen weṣṣfen-d Ṛebbi s kra n imeslayen am “Anezmar”, “Win Ɛlayen” akk-d “Ssid”, d Titṛagṛam kan i ssexdamen m’ara d-bedren Ṛebbi s yisem-is.

D Yahwa Ṛebbi s yiman-is i gḍelben i wid yuran Adlis Iqedsen ad ssexdamen isem-is. Ɣef lemtel, iweḥḥa-d i nnbi Yuwil lehduṛ-agi: “Kra n win ara inedhen s yisem n [Yahwa] ad imneɛ.” (Yuwil 3:5) Yenna daɣen i yiwen seg wid yuran Ihellilen ad yekteb lehduṛ-agi: “Ad ẓren belli ţ-ţideţ, d kečč kan i geţţusemman [Yahwa], d Win Ɛlayen ɣef ddunit meṛṛa!” (Ahellil 83:19) Di tin n ṣṣeḥ, deg Ihellilen kan, yeţwabder-ed yisem n Ṛebbi azal n 700 tikkal. (Ihellilen d yiwet n tektabt n isefra i geţwaxedmen bac a ten-qqaren iqeddacen n Ṛebbi w’a ten-cennun.) Ayɣer ihi i ulac isem n Ṛebbi deg waṭas n ṭrejmat n Wedlis Iqedsen? Ayɣer ur yeţwassen ara wamek i geţwanṭaq swaswa yisem n Ṛebbi? Yerna, acu i d lmeɛna n yisem n Yahwa?

Ayɣer i ulac isem n Ṛebbi deg waṭas n ṭrejmat n Wedlis Iqedsen? Aṭas n ssebbat i gellan. Kra ḥesben belli imi Ṛebbi d Anezmar ur yeḥwaǧ ara ad yesɛu isem. Wiyaḍ, tebɛen ahat yiwet n lɛadda taqdimt n Iyahudiyen ideg yeţţuḥeṛṛem ad  ssexdmen isem-agi, axaṭer ţţagaden ammar a t-ssemsxen. Wiyaḍ nniḍen, ɣilen belli imi ulac win izemren ad iẓer amek i geţwanṭaq swaswa yisem n Ṛebbi, axiṛ ad ssexdamen ameslay nniḍen i t-id-iţweṣṣifen, am “Ssid”, “Ṛebbi” neɣ “Ameɣlal”. Acu kan, ssebbat-agi meṛṛa ur sɛint ara lsas. Wali acuɣer:

• Wid i gɣilen belli Ṛebbi Anezmar ur yeḥwaǧ ara ad yesɛu isem, ur meyyzen ara ɣef wayagi: kra n iţafţaren iqdimen n Wawal n Ṛebbi yella deg-sen yisem n Ṛebbi. Gar iţafţaren-agi, llan wid yeţwaketben uqbel talalit n Ɛisa yerna mazal-iten ar ass-a. Yerna akken i t-id-nenna, Ṛebbi yexdem ayen ilaqen akken ad yeţwakteb yisem-is azal n 7 000 tikkal deg Wawal-is. Iban ihi, Ṛebbi yebɣa a nissin isem-is w’a t-nessexdam.

• Ṭrejmanat i gţekksen isem n Ṛebbi ɛlaǧal n lɛadda-nni n Iyahudiyen, ur xemmen ara ɣer yiwet n lḥaǧa: kra n lɛulama n ccariɛa iyahudiyen, yesteklfen s uneqqel n tira, llan ţţagin a d-bedren isem-agi. Meɛna, ur t-mḥin ara seg iţafţaren-nsen ideg i d-neqqlen Adlis Iqedsen. Di kra n iţafţaren iqdimen i ufan di Qumran, tama n lebḥeṛ Yemmuten, yella deg-sen yisem-agi aṭas n tikkal. Kra seg wid yesṭerjimen Adlis Iqedsen sseknen-d belli yella yisem n Ṛebbi deg iţafţaren yeţwaketben di laṣel. Amek? Ţţarran deg wemkan n yisem-agi ameslay “SSID” s leḥṛuf imeqranen. Meɛna mazal yiwen westeqsi: ma yella ṭrejmanat-agi ur nkiṛen ara belli yeţwabder-ed yisem n Ṛebbi d luluf n tikkal deg iţafţaren n Wedlis Iqedsen, acuɣer ihi i t-beddlen neɣ i t-kksen? Anwa i sen-yefkan ţţesriḥ ad xedmen akka? Ḥaca nutni i geẓran.

• Wid i d-yeqqaren belli ur ilaq ara a nessexdam isem n Ṛebbi axaṭer ur nessin ara amek i geţwanṭaq swaswa, ţţadren-d Ɛisa s yisem-is. Acu kan, yemxallaf mliḥ wamek i d-ssenṭaqen isem-is inelmaden-is di lqern amezwaru d wamek i t-id-ssenṭaqen ass-a waṭas n imasiḥiyen. Ɣer imasiḥiyen iyahudiyen, isem n Ɛisa ahat yeţwanṭaq Yacuɛa, ma d ameslay “Lmasiḥ”, Maciyaḥ. Imasiḥiyen iheddṛen tayunanit ssawalen-as Iyasus Xristus, ma d wid iheddṛen talatinit ssawalen-as Yasus Kristus. Di ṭrejma n Wedlis Iqedsen s tyunanit, yeţwaketben lemɛawna n ṛṛuḥ n Ṛebbi, yeţwabder-ed deg-s yisem n Ɛisa s tyunanit; daymi i nezmer a d-nini belli imasiḥiyen n lqern amezwaru sɛan lḥeqq imi i d-ssenṭaqen isem-agi akken i gella yeţwassen di lluɣa-nsen.  Akka daɣen, kul m’ara sṭerjmen Inagan n Yahwa Adlis Iqedsen di kra n lluɣa, ţwalin belli ilaq ad ssexdmen isem n Ṛebbi di ṭrejma-nsen akken i geţwassen di lluɣa-yagi, ɣas ma yella mačči akken swaswa i geţwanṭaq di lluɣa taɛibṛanit taqdimt.

Acuɣer ur yeţwassen ara wamek i geţwanṭaq swaswa yisem n Ṛebbi? Di Teqbaylit, ṛebɛa leḥṛuf-nni n yisem n Ṛebbi s tɛibṛanit (יהוה) ţwaktaben s ṛebɛa leḥṛuf-agi: YHWH. Am imeslayen akk nniḍen n lluɣa taɛibṛanit n zik, Titṛagṛam ur yesɛi ara leḥṛuf umi qqaren tiɣra (yeɛni a, e, i, u). Asmi llan ssexdamen lluɣa taɛibṛanit taqdimt, wid i ţ-yeqqaren ssnen amek ara s-rnun s sshala tiɣra iwulmen.

Azal n 1 000 iseggasen mbeɛd mi tekfa lektiba n Tira tiɛibṛaniyin, kra n imusnawen iyahudiyen snulfan-d yiwen n ţţawil i usenṭeq n imeslayen; rennun i leḥṛuf kra n tneqqiḍin i d-yeţmalen d acu-tent tiɣra i glaqen a tent-rennun m’ara d-qqaren taɛibṛanit. Acu kan, di lweqt-nni, aṭas n Iyahudiyen i geţţamnen s yir lfal; ɣilen belli ur ilaq ara a d-yebder walbeɛḍ isem n Ṛebbi s ṣṣut ɛlayen. Ssexdamen ihi deg wemkan-is imeslayen nniḍen. Ɣef wayagi, m’ara ţɛawaden i lektiba n yisem n Ṛebbi seg uţafţar ɣer wayeḍ, rennun-as i Titṛagṛam tiɣra n imeslayen-agi nniḍen bac a d-ssenṭqen isem n Ṛebbi. Daɛneţţa, iţafţaren-agi umi i rnan tineqqiḍin i d-yeţmalen tiɣra ur zmiren ara a ɣ-ɛiwnen a nẓer amek i geţwanṭaq swaswa yisem n Ṛebbi s lluɣa taɛibṛanit n zik. Kra ɣilen belli yella yeţwanṭaq “Yahwah”, ma d wiyaḍ ssenṭaqen-t-id akken nniḍen. Deg yiwen uţafţar n lebḥeṛ Yemmuten, yella yiwen weḥric si tektabt n Wat Lewwi s tyunanit ideg yeţwakteb yisem n Ṛebbi akka: Iyaw.  Kra n yemyura n Lyunan n zik nnan-d belli yezmer daɣen ad yeţwanṭaq akka: Iyayih, Iyabih, Iyawuwih. Acu kan, ur ilaq ara a d-nini belli d wagi kan i d ṛṛay iṣeḥḥan di temsalt-agi. Nezmer kan a d-nini belli ur neɛlim ara amek i d-ssenṭaqen iqeddacen n Ṛebbi n zik isem n Ṛebbi s tɛibṛanit. (Laṣel n ddunit 13:4; Tuffɣa 3:15) Meɛna, neɛlem belli Ṛebbi yessexdem isem-is aṭas n tikkal asmi i gella iheddeṛ akk-d iqeddacen-is; neɛlem daɣen belli iqeddacen-agi-ines ssawalen-as s yisem-agi yerna ur ţkukrun ara a t-ssexdmen m’ara heddṛen d wiyaḍ.​—Tuffɣa 6:2; 1 Igelliden 8:23; Ahellil 99:9.

Acu i d lmeɛna n yisem n Yahwa? Di lluɣa taɛibṛanit, isem n Yahwa yekka-d seg yiwen umeslay, lmeɛna-s “uɣal”. Ɛlaḥsab n kra n lɛulama n lluɣa taɛibṛanit, isem-agi lmeɛna-s: d win i gxeddmen ayen i glaqen bac “aţ-ţuɣal” lḥaǧa d ayen i gebɣa, yeɛni a ţ-yesseḍru. Tarbaɛt n ṭrejmanat n Wedlis Iqedsen n ddunit tajdiṭ fehmen-d seg wayagi belli isem n Ṛebbi lmeɛna-s “win yesseḍrayen”. Imi ur mtafaqen ara lɛulama n lluɣa taɛibṛanit ɣef lmeɛna n yisem-agi, nekni daɣen ur nezmir ara a d-nini belli ţ-ţagi kan i d lmeɛna-s. Acu kan, lmeɛna-yagi twulem mliḥ imi Yahwa d Axellaq n kulci yerna d Win yesseḍrayen lmeqsud-is. D ṣṣeḥ, si lǧiha, ixleq-ed igenwan d lqaɛa d lexliqat nniḍen meṛṛa, si lǧiha nniḍen, yeţkemmil ixeddem ayen ilaqen bac a d-yeḍru lebɣi-s akk-d lmeqsud-is.

Ihi, lmeɛna n yisem n Yahwa ur tcudd ara kan ɣer wayen yellan di Tuffɣa 3:14 i d-yeqqaren: “Ad uɣaleɣ d ayen i bɣiɣ ad uɣaleɣ.” (Ṭrejma n ddunit tajdiṭ, s tṛumit) Imeslayen-agi weḥḥed-sen, ur d-ssefhamen ara swaswa lmeɛna n yisem n Ṛebbi. Ţbegginen-d kan yiwen wudem si ccexṣiyya-ines; smektayen-d belli, di yal liḥala, yeţţuɣal d ayen akk iwulmen bac ad yesseḍru lebɣi-s akk-d lmeqsud-is. Ihi, ɣas akken nezmer a d-nefhem ayagi deg yisem n Yahwa, lmeɛna n yisem-agi mačči d ayen kan i gextaṛ Yahwa ad yuɣal neţţa s yiman-is. Isem-agi ijemmel-ed daɣen ayen i gxeddem Yahwa bac aţ-ţuɣal txelqit-is d ayen ilaqen, neɣ aţ-ţexdem ayen ilaqen, iwakken a d-yeḍru lebɣi-s.