Amek ara ɣ-d-tṣaḥ tudert n dayem
TAQSIṬ TIS 116
Amek ara ɣ-d-tṣaḥ tudert n dayem
TƐEQLEḌ acu i teqqar teqcict-agi tamecṭuḥt neţţat d yemdukkal-is? Ţ-ţaktabt am tagi-inek: Tiqsiḍin n Wedlis Iqedsen. Imecṭaḥ-agi atnan la qqaren am kečč taqsiṭ-agi taneggarut: “Amek ara ɣ-d-tṣaḥ tudert n dayem?”
Teẓriḍ acu akka i ḥeffḍen? Ḥeffḍen belli ilaq uqbel kullec a nissin Yahwa akk-d mmi-s Ɛisa ma yella nebɣa a nɛic i lebda. Adlis Iqedsen yenna-d: ‘Issinet Ṛebbi awḥid n ṣṣeḥ akk-d Mmi-s Ɛisa Lmasiḥ i d-iceggeɛ ɣer lqaɛa, imiren a kkun-id-tṣaḥ tudert n dayem.’
Lameɛna amek i nezmer a nissin Yahwa Ṛebbi d Mmi-s Ɛisa? Nezmer a ten-nissin ma yella neɣra taktabt n Teqsiḍin n Wedlis Iqedsen si tazwara armi ţ-ţaggara. Taktabt-agi tehdeṛ-ed ɣef xilla n leḥwayeǧ yeɛnan Yahwa d Ɛisa. Aṭas i ɣ-d-teḥka ɣef wayen i xedmen zik d wayen ara xedmen ɣer zdat. Lameɛna mačči ţ-ţaktabt-agi kan i ɣ-ilaq a nɣer iwakken a ten-nissin.
Twalaḍ taktabt-agi nniḍen yersen di lqaɛa? D Adlis Iqedsen. Ssuter i walbeɛḍ a k-d-iɣer ifyar n Wedlis Iqedsen iɣef i reṣṣant teqsiḍin n tektabt-agi. Adlis Iqedsen yessken-aɣ-d ayen akk i glaq a t-nexdem iwakken a neqdec ɣef Yahwa am wakken i gebɣa. Imla-yaɣ-d diɣen amek ara nesɛu tudert i lebda. Annect-a meṛṛa ibeggen-ed ihi belli ilaq a naɣ tannumi a neqqar Adlis Iqedsen daymen.
Yelha ma nessen Yahwa akk-d Ɛisa Lmasiḥ, lameɛna mačči d annect-agi kan i glaqen. Akken tebɣu tili tmusni-nneɣ ɣef Ṛebbi d Ɛisa akk-d wayen i seɣren, ur ɣ-d-teţţawi ara tmusni-yagi tudert n dayem. D acu nniḍen ihi i glaqen?
Ilaq a nesselḥu tudert-nneɣ ɛlaḥsab n wayen i nḥeffeḍ. Tecfiḍ ɣef Yudas n Qeryut? Yella ger 12 yemceggɛen-nni i gextaṛ Ɛisa. Yudas yesɛa tamusni tameqrant ɣef Yahwa d Ɛisa. Lameɛna, mi gɛedda cwiṭ n lweqt, yuɣal d win iṭṭammaɛen. Ṭṭmeɛ-agi yewwi-t ad izzenz Ɛisa i yeɛdawen-is s 30 iṣurdiyen n lfeṭṭa. Ɣef waya ur iseɛɛu ara tudert n dayem.
Tecfiḍ ɣef Giyḥazi, argaz-nni i nwala di teqsiṭ tis 69? Yeḍmeɛ ad isɛu llebsa d yedrimen ur iţţalas ara, dɣa yeskaddeb iwakken ad ikseb leḥwayeǧ-agi. Ɣef waya i t-iɛuqeb Yahwa. Ula d nekni a ɣ-iɛaqeb ihi ma yella nugi a naɣ awal i leqwanen-is.
Lameɛna aṭas n yemdanen yelhan i gqedcen ɣef Yahwa ṭṭul n leɛmeṛ-nsen. Nebɣa a nili am nutni. Camwil, aqcic-nni amecṭuḥ d lemtel igerrzen i nezmer a netbeɛ. Akken i t-nwala di teqsiṭ tis 55, Camwil yesɛa kan ṛebɛa neɣ xemsa iseggasen di leɛmeṛ-is mi gebda iqeddec deg uqiḍun imqeddes. Ula d kečč, xas meẓẓiyeḍ tzemreḍ aţ-ţqedcen ɣef Yahwa.
Lameɛna amdan i nebɣa yakk a netbeɛ d Ɛisa Lmasiḥ. Ɣas d amecṭuḥ i gella, akken i t-nwala di teqsiṭ tis 87, ur yugad ara ad immeslay di lemqam ɣef Baba-s yellan deg igenni. Ilaq a netbeɛ lemtel-is. A nemmeslay i waṭas n lɣaci ɣef Yahwa Ṛebbi ɛlayen d Mmi-s Ɛisa Lmasiḥ. Ma yella nexdem leḥwayeǧ-agi, a nizmir a nɛic i dima di lǧennet tajdiṭ ara yexdem Ṛebbi ɣef lqaɛa.
Yuḥenna 17:3; Ahellil 145:1-21.
