TAQSIṬ TIS 115

Lǧennet tajdiṭ ɣef lqaɛa

TWALAḌ ttjuṛ-​agi acḥal meqqrit, ijeǧǧigen-​agi acḥal cebḥen akk-​d idurar-​inna ɛlayen? I teɣzalt-​a iteţţen deg ufus n weqcic-​agi amecṭuḥ, twalaḍ-​ţ? Twalaḍ daɣen izmawen d iɛawdiwen yeqqimen ɣef leḥcic deffir-​ihin? Ur tebɣiḍ ara aţ-​ţɛiceḍ deg wemkan yecban wagi?

Ṛebbi yebɣa aţ-​ţɛiceḍ di lǧennet ɣef lqaɛa i dima. Yebɣa a k-​imneɛ si lemḥayen meṛṛa i ţmagaren lɛibad di ddunit-​a. Atah wayen i gewɛed Wedlis Iqedsen i wigad ara iɛicen di lǧennet-​agi tajdiṭ: ‘Ṛebbi ad yili yid-​sen. Ur teţţili lmut, ur yeţţili leḥzen, ur ţţilin imeṭṭawen. Leḥwayeǧ n zik ɣabent i dima.’

Lemɛahdat-​agi a tent-​issufeɣ akk Ɛisa ɣer lxiṛ. Teẓriḍ melmi ara yexdem annect-​a? Asm’ara yebrez lqaɛa seg yemcumen d cceṛ meṛṛa yellan fell-​as. Tecfiḍ? Asm’akken yella Ɛisa ɣef lqaɛa, isseḥla imdanen si mkul aṭan. Ula d lmeggtin isseḥya-​ten-​id si lmut. Ɛisa yexdem annect-​a iwakken a d-​isbeggen ayen akk ara yexdem ɣef lqaɛa asm’ara yuɣal d Agellid n Tgelda n Ṛebbi.

Xayel amek ara tfaz temɛict di lǧennet-​agi tajdiṭ ɣef lqaɛa! Ɛisa ad yeḥkem deg igenni neţţa d kra n yemdanen i gextaṛ. Ineḥkamen-​agi a d-ɛnun yal yiwen deg-​nneɣ s leḥnana akken a nestummen s lfeṛḥ. A nwali tura d acu i ɣ-​ilaq a nexdem iwakken a ɣ-​yefk Ṛebbi tudert n dayem di lǧennet-​ines tajdiṭ.

Aweḥḥi 21:3, 4; 5:9, 10; 14:1-3.