Asmi i gella Musa d llufan
TAQSIṬ TIS 28
Asmi i gella Musa d llufan
MUQEL llufan-agi yeţrun, yeṭṭfen aḍad n tmeṭṭut-agi! Isem-is Musa. Teẓriḍ anta-ţ tmeṭṭut-agi izeynen? D yelli-s tawḥiṭ n Ferɛun, agellid n Maṣer.
Yemma-s n Musa teffer mmi-s tlata wagguren axaṭer ur tebɣi ara a t-nɣen Imaṣriyen. Lameɛna teɛlem belli ur tezmir ara a t-teffer i lebda. Acu i texdem ihi akken a t-tsellek?
Teddem-ed taqecwalt, tesleɣ-iţ akken ur ţ-keččmen ara waman. Tesgen deg-s Musa, dɣa terra-ţ ger iɣunam n wasif imi qqaren Nnil. Tweṣṣa Meryem, weltma-s n Musa, akken aţ-ţɛass taqecwalt-nni. Acu ara yeḍrun tura?
Aţţan tṣubb yelli-s n Ferɛun ɣer wasif n Nnil akken aţ-ţeccucef. Dɣa twala taqecwalt-nni ger iɣunam. Tessawel i yiwet si tqeddacin-is, tenna-yas: ‘Azzel awi-yi-d taqecwalt-inna.’ Mi teldi yelli-s n Ferɛun taqecwalt-nni tufa deg-s llufan yeččuṛen d sser. Llufan-nni yeţru armi yegzem tasa-s. Ur tebɣi ara a t-nɣen.
Meryem tqerreb-ed ihi. Twalaḍ-ţ di ţţeswiṛa-ya? Meryem testeqsa yelli-s n Ferɛun: ‘Tebɣiḍ ad ṛuḥeɣ a m-d-awiɣ tameṭṭut n wat Isṛayil ara yessuṭḍen llufan-agi?’
Yelli-s n Ferɛun terra-yas: ‘Ih, di leɛnaya-m m’ur tṛuḥeḍ a ţ-id-tawiḍ.’
Meryem tuzzel a d-tawi yemma-s. Mi d-tusa yemma-s n Musa, yelli-s n Ferɛun tenna-yas: ‘Awi llufan-agi, ssuṭeḍ-iyi-t-id ma d nekk a kem-xellṣeɣ.’
Yemma-s n Musa telha-d d mmi-s i d-tesɛa tɛebbuṭ-is. Mi meqqer Musa, tefka-t i yelli-s n Ferɛun i t-yerran am mmi-s n ṣṣeḥ. Akka i d-yekker Musa deg wexxam n Ferɛun.
