D akniwen meɛna mxalafen
TAQSIṬ TIS 17
D akniwen meɛna mxalafen
SIN warrac-agi i teţwaliḍ dagi mxalafen, neɣ ala? Tessneḍ ismawen-nsen? Aṣeggad-agi d Ɛisu (Icaw) ma d aqcic-agi yesslufuyen i izimer d Yeɛqub.
Ɛisu d Yeɛqub d akniwen i d-sɛan Isḥaq d Ribka. Baba-tsen Isḥaq iḥemmel aṭas Ɛisu axaṭer yezweṛ di ṣṣyada, yerna yeţţawi-d lqut i wat wexxam. Ma d Ribka, neţţat, tḥemmel akteṛ Yeɛqub axaṭer d aqcic amhenni.
Jeddi-tsen Abṛaham mazal-it yedder. Nezmer a nxayel acḥal iḥemmel Yeɛqub a s-issemḥess m’ara d-iţmeslay ɣef Yahwa. Ɣer taggara Abṛaham yemmut mi gesɛa 175 n sna, mi wwḍen wakniwen-nni 15 iseggasen di leɛmeṛ.
Asmi i gewweḍ Ɛisu 40 n sna, yuɣ snat tlawin si tmurt n Kanɛan. Annect-agi isseḥzen aṭas Isḥaq d Ribka, axaṭer tilawin-agi ur ţɛebbident ara Yahwa.
Yiwen wass, teḍra-d yiwet lḥaǧa i gewwin Ɛisu ad izɛef ɣef gma-s Yeɛqub. Iḥdeṛ-ed lawan ad yefk Isḥaq lbaṛaka i mmi-s amenzu. Imi i d neţţa i d amenzu, Ɛisu yessarem ihi a t-id-tṣaḥ lbaṛaka-ya. Lameɛna yeţţu belli, zik yezzenz i Yeɛqub lḥeqq-is n lbaṛaka-yagi. Yerna asmi i d-lulen sin warrac-a, Ṛebbi yenna-d belli d Yeɛqub iwumi ara teţţunefk lbaṛaka. D ayen i geḍran. Isḥaq yefka lbaṛaka i mmi-s Yeɛqub.
Asmi i gesla Ɛisu i lexbaṛ-agi, izɛef yiwen n zzɛaf d ameqran ɣef gma-s Yeɛqub. Zzɛaf-is issaweḍ-it armi yeţgalla di gma-s a t-ineɣ. Mi tesla Ribka s lexbaṛ-agi ikcem-iţ uɣilif ameqran. Dɣa tenna i wergaz-is Isḥaq: ‘Ţ-ţawaɣit ma yezweǧ ula d Yeɛqub d yiwet si tlawin n Kanɛan.’
Ihi Isḥaq yessawel i mmi-s Yeɛqub, yenna-yas: ‘Ur d-ţţawi ara tameṭṭut si Kanɛan. Meɛna ṛuḥ s axxam n jeddi-k Batwil yellan di tmurt n Ḥaṛan. Aɣ yiwet si yessi-s n mmi-s n Laban.’
Yeɛqub issemḥess i baba-s. Din din yekker iṛuḥ ɣer Ḥaṛan anda zedɣen imawlan-is.
Laṣel n ddunit 25:5-11, 20-34; 26:34, 35; 27:1-46; 28:1-5; Iɛebṛaniyen 12:16, 17.