Dina tger iman-is di twaɣit
TAQSIṬ TIS 20
Dina tger iman-is di twaɣit
TWALAḌ tigi iɣef i terza Dina? Tṛuḥ aţ-ţẓer kra n tullas i geţɛicin di tmurt n Kanɛan. Ad yefṛeḥ baba-s Yeɛqub s wannect-a? Iwakken a d-tafeḍ lǧawab i westeqsi-yagi, mmekti-d acu i ţxemmimen Abṛaham d Isḥaq ɣef tlawin n Kanɛan.
Yebɣa Abṛaham ad yezweǧ mmi-s Isḥaq d yiwet n teqcict n Kanɛan? Ala, ur yebɣi ara. Isḥaq d Ribka bɣan ad yaɣ mmi-tsen Yeɛqub taqcict n Kanɛan? Ala, ula d nutni ur bɣin ara. Teẓriḍ acuɣer?
Axaṭer imezdaɣ n Kanɛan ţɛebbiden iṛebbiten n lekdeb. Ur llin ara d lɛibad yelhan akken ad ilin d imezwaǧen neɣ d leḥbab n lɛali. Ihi mebla ccekk ur ifeṛṛeḥ ara Yeɛqub m’ara yeɛlem belli tesɛa yelli-s tiḥbibin si tullas n Kanɛan.
Iban belli yir lemɛacṛa-yagi a s-d-tawi tawaɣit i Dina. Twalaḍ argaz-agi n Kanɛan yeţmuqulen Dina? Isem-is Caxim. Yiwen wass ideg i tṛuḥ aţ-ţẓer tiḥbibin-is, Caxim iṭṭef Dina, iḥettem-iţ aţ-ţeṭṭeṣ yid-es. Annect-a d ayen icemten nezzeh axaṭer ḥaca irgazen ţ-ţlawin izewǧen i gzemren ad ṭṭṣen akken. Lameɛna, lexsaṛa i gexdem Caxim i Dina tewwi-d akteṛ n lehmum.
Mi slan swayen yeḍran, atmaten n Dina zeɛfen aṭas. Sin seg-sen, Cimɛun d Lewwi, ddmen ijenwiyen-nsen imeqranen (isekkinen), ṛuḥen ɣer temdint akken ad ẓedmen ɣef wid i ţ-izedɣen di lawan iɣef ur bnin ara fell-asen. Nutni d watmaten-nsen nɣan Caxim d yergazen akk nniḍen. Yeɛqub yerfa imi xedmen warraw-is lmuṣiba-yagi.
Amek akk i d-bdan iɣeblan-a? Bdan-d axaṭer tɛuceṛ Dina imdanen ur neţţaɣ ara awal i lumuṛ n Ṛebbi. Yak ur nebɣi ara a nesɛu leḥbab yecban wigi, neɣ ala?