TAQSIṬ TIS 31

Musa d Haṛun zdat n Ferɛun

ASMI i guɣal Musa ɣer Maṣer, yeḥka i gma-​s Haṛun lbeṛhanat meṛṛa i gwala. Mi sseknen di sin i wat Isṛayil lbeṛhanat-​agi, agdud s lekmal-​is yumen belli Ṛebbi yella yid-​sen.

Mbeɛd, Musa akk-​d Haṛun ṛuḥen ad ẓren Ferɛun. Nnan-​as: ‘Atah wayen i d-​yenna Yahwa, Ṛebbi n Isṛayil: “Serreḥ i wegdud-​iw tlata wussan ad iṛuḥ s aneẓruf (ṣṣeḥṛa) akken ad iyi-​iɛbed.”’ Ferɛun yerra-​yasen: ‘Ur umineɣ s Yahwa, ur ţserriḥeɣ i Isṛayil ad iṛuḥ.’

Ferɛun yezɛef axaṭer yebɣa wegdud ad yeɛbed Yahwa di lweqt-​nni n lxedma. Yuɣal issawɛeṛ fell-​asen lxedma akteṛ n zik. At Isṛayil lummen Musa imi ẓẓayet fell-​asen teɛkemt. Annect-​a yesseḥzen Musa. Meɛna Yahwa isebbeṛ-​it mi s-​yenna: ‘Ad ḥettmeɣ Ferɛun akken ad iserreḥ i wegdud-​iw.’

Musa akk-​d Haṛun ṛuḥen daɣen ad ẓren Ferɛun. Tikkelt-​a xedmen lbeṛhan zdat-​es. Haṛun iḍegger aɛekkaz-​is ɣer lqaɛa, dɣa yuɣal d azrem ameqran. Lameɛna ula d iseḥḥaren n Ferɛun ḍeggren iɛekkzan-​nsen ɣer lqaɛa, dɣa uɣalen ula d nutni d izerman. Meɛna muqel! Azrem n Haṛun ibda iteţţ izerman-​nni n iseḥḥaren. Ɣas akka, Ferɛun iggumma ad iserreḥ i wat Isṛayil.

Tura yusa-​d lweqt anda ara yessefhem Yahwa i Ferɛun ayen akk ur yezmir ad yeţţu. Teẓriḍ d acu yexdem? Isseɣli-​d ɛecṛa n lmuṣibat ɣef Maṣer.

Mbeɛd, mi ɛeddant kra n lmuṣibat, Ferɛun issawel i Musa, yenna-​yas: ‘Ḥbes lmuṣiba-​yagi, ma d nekk ad ǧǧeɣ Isṛayil ad iṛuḥ.’ Lameɛna akken kan teḥbes lmuṣiba, Ferɛun yuɣal deg wawal-​is. Ur yebɣi ara ad iserreḥ i wegdud n Isṛayil. Armi d asmi i d-​teɣli lmuṣiba tis ɛecṛa i geǧǧa Ferɛun At Isṛayil ad ṛuḥen.

Teẓriḍ amek i gant lmuṣibat-​agi? Dewweṛ tawerqeţţ-​a akken a tent-​twaliḍ.

Tuffɣa 4:27-31; 5:1-23; 6:1-13, 26-30; 7:1-13.