Tameṭṭut n Luṭ
TAQSIṬ TIS 15
Tameṭṭut n Luṭ
LUṬ ţ-ţwacult-is llan ţɛicin d Abṛaham di tmurt n Kanɛan. Yiwen wass Abṛaham yenna i Luṭ: ‘Tamurt ur tewwi ara lmal-nneɣ meṛṛa. Di leɛnaya-k, eyya-d a nemfaraq. Ma tṛuḥeḍ ɣer yiwet n lǧiha, nekk ad ṛuḥeɣ ɣer tayeḍ.’
Luṭ imuqel tamurt meṛṛa. Iwala yiwen wemḍiq ilhan, yeṛwan aman yerna yeččuṛen ţ-ţizzegzewt i lmal-is. Amḍiq-agi isem-is Azaɣar n Uṛdun. Ihi Luṭ, tawacult-is d lmal-is ṛuḥen ɣer dinna. Ɣer taggara zedɣen di temdint n Sudum.
Lɣaci i gzedɣen di Sudum fesden armi dayen. Annect-agi yesmuɣben Luṭ yellan d argaz yelhan. Liḥala-ya tesneɣni ula d Ṛebbi. Ɣef wannect-a i gceggeɛ Ṛebbi snat lmalayek ɣer Luṭ. Nnant-as belli Ṛebbi ad issenger Sudum ţ-ţemdint i ţ-iqerben iwumi qqaren Gumur axaṭer fesdent aṭas.
Lmalayekkat-nni nnant i Luṭ: ‘Ɣiwel! Ddem tameṭṭut-ik d snat yessi-k teffɣeḍ ssyagi!’ Imi Luṭ ţ-ţwacult-is ɛeṭṭlen, lmalayekkat-nni ṭṭfent-ten seg ufus, ssufɣent-ten-id si temdint-nni. Umbeɛd, yiwet si lmalayekkat-nni tenna: ‘Rewlet, ssellket iman-nwen! Ur ţmuqulet ara ɣer deffir. Azzlet ɣer wedrar akken ur teţmeţţatem ara.’
Luṭ d yessi-s uɣen awal, rewlen si Sudum. Ur ḥbisen, ur muqlen ɣer deffir. Meɛna, tameṭṭut n Luṭ ur tuɣ ara awal. Mi d-lḥan kra n lweqt si Sudum, teḥbes, dɣa tezzi ɣer deffir. Imiren kan tameṭṭut n Luṭ tuɣal ţ-ţigejdit n lemleḥ. Twalaḍ-ţ di ţţeswiṛa-ya?
Nezmer a nestenfeɛ mliḥ s teqsiṭ-agi. Nwala belli Ṛebbi yeţsellik wid i s-yeţţaɣen awal, ma d wid ur s-neţţaɣ ara awal ad mmten.
Laṣel n ddunit 13:5-13; 18:20-33; 19:1-29; Luqa 17:28-32; 2 Buṭrus 2:6-8.