Tecɛel tmes deg inijel
TAQSIṬ TIS 30
Tecɛel tmes deg inijel
YIWEN wass, Musa yenheṛ taqeḍɛit-is armi d yiwen wedrar yeţţusemman Ḥurib. Iwala dinna yiwen inijel, tecɛel deg-s tmes lameɛna ur ireqq ara (ur t-teţţ ara tmes).
Musa yenna deg wul-is: ‘D leɛǧeb ameqran! Ad qerrbeɣ akken ad waliɣ mliḥ.’ Mi gqerreb, iffeɣ-ed ṣṣut si tlemmast n inijel-nni i s-yennan: ‘Ur d-ţqerrib ara ɣer dagi. Kkes arkasen-ik axaṭer amḍiq ideg i tbeddeḍ d amḍiq imqeddes.’ D Ṛebbi i s-d-immeslayen s lmelk. Ɣef wayagi i gɣumm Musa udem-is.
Ṛebbi yenna-yas: ‘Walaɣ lmeḥna n wegdud-iw di tmurt n Maṣer. Ad kkreɣ a t-id-sellkeɣ seg ufus n Imaṣriyen. D kečč ara ceggɛeɣ akken a t-id-tessufɣeḍ syenna.’ Tura Yahwa yeqsed ad yawi agdud-is ɣer Kanɛan, tamurt-nni ifazen.
Lameɛna Musa yerra-yas: ‘Nekk d acu-yi akken ad xedmeɣ annect-agi? Yerna lukan ad ṛuḥeɣ ɣer Maṣer, At Isṛayil a yi-d-inin: “Anwa i k-id-iceggɛen?” Imiren d acu ara sen-rreɣ?’
Ṛebbi yerra-yas i Musa: ‘Atan ihi wayen ara sen-tiniḍ: “YAHWA, Ṛebbi n Abṛaham, Ṛebbi n Isḥaq, Ṛebbi n Yeɛqub iceggeɛ-iyi-d ɣur-wen.”’ Yahwa yenna daɣen: ‘D wagi i d isem-iw i lebda.’
Musa yerra-yas: ‘Lameɛna, lukan ur iyi-ţţamnen ara m’ara sen-iniɣ tceggɛeḍ-iyi-d.’
Ṛebbi yesteqsa-t: ‘Acu yellan deg ufus-ik?’
Musa yerra-yas: ‘D aɛekkaz.’
Ṛebbi yenna-yas: ‘Ḍegger-it ɣer lqaɛa.’ Musa iḍegger-it, dɣa yuɣal d azrem. Yahwa yessken lbeṛhan nniḍen i Musa. Yenna-yas: ‘Err afus-ik ɣer iciwi-k.’ Musa yuɣ awal. Mi t-id-ikkes, yuɣal ufus-is d amellal am wedfel. Icuba afus n win ihelken lehlak yeţţusemman lbeṛs. Mbeɛd, Yahwa yefka i Musa lqeḍra akken ad ixdem lbeṛhan wis tlata. Ɣer taggara yenna-yas: ‘M’ara txedmeḍ lbeṛhanat-agi, At Isṛayil ad amnen belli d nekk i k-iceggɛen.’
Mbeɛd, yuɣal Musa s axxam, yenna i uḍeggal-is Yitru: ‘Di leɛnaya-k, eǧǧ-iyi ad uɣaleɣ ɣer Maṣer s atmaten-iw akken ad waliɣ ma bxiṛ i llan.’ Yitru isellem ɣef Musa, sakin yeǧǧa-t ad iṛuḥ ɣer Maṣer.
