Yeɛqub iṛuḥ ɣer Ḥaṛan
TAQSIṬ TIS 18
Yeɛqub iṛuḥ ɣer Ḥaṛan
TEẒRIḌ anwa-ten yemdanen-agi yeţmeslayen d Yeɛqub? D imeksawen. Yeɛqub yelḥa aṭas n wussan, yuɣal immuger-iten-id ɣer tama n lbir. Yufa-ten kessen lmal-nsen. Yeɛqub yesteqsa-ten: ‘Ansi-kkun?’
Rran-as: ‘Si Ḥaṛan.’
Yeɛqub yesteqsa-ten daɣen: ‘Tessnem Laban?’
Rran-as: ‘Ih, nessen-it. Muqel dɣa, aţţan yelli-s Ṛaḥil teţţeddu-d s lmal-is.’ Twalaḍ Ṛaḥil akken a d-tleḥḥu?
Mi gwala Yeɛqub a d-tleḥḥu Ṛaḥil neţţat d lmal n baba-s, ikkes ablaḍ yellan ɣef yimi n lbir, dɣa yefka i lmal ad isew. Umbeɛd, Yeɛqub isellem ɣef Ṛaḥil, yelli-s n xali-s Laban, yessefhem-as wi t-ilan. Ṛaḥil ikkat wul-is, dɣa tuzzel aţ-ţxebbeṛ baba-s Laban.
Laban yefṛeḥ aṭas imi ara yeqqim Yeɛqub deg wexxam-is. Yerna asmi i gexḍeb Ṛaḥil, Laban yefṛeḥ ayendin. Lameɛna issuter i Yeɛqub ad ixdem sebɛa iseggasen ɣur-es akken a s-yefk Ṛaḥil. Yeɛqub yeqbel axaṭer iḥemmel aṭas Ṛaḥil. Lameɛna mi d-yewweḍ lweqt n zzwaǧ, teẓriḍ acu yeḍran?
Laban yefka i Yeɛqub yelli-s tamenzut Liya deg wemkan n Ṛaḥil. Armi yeqbel Yeɛqub ad ixdem sebɛa iseggasen nniḍen ɣur-es, i s-yefka Ṛaḥil. Di zzman-nni Ṛebbi iɛemmed i yergazen ad sɛun akteṛ n yiwet tmeṭṭut. Lameɛna tura, akken i d-inna Wedlis Iqedsen, ilaq-as i wergaz ad yesɛu yiwet n tmeṭṭut kan.