TAQSIṬ TIS 25

Yeɛqub yunag ɣer Maṣer

YUSEF ur yezmir ara ad yeṭṭef imeṭṭawen-​is akteṛ. Yenna i iqeddacen-​is ad ffɣen meṛṛa. Mi d-​yufa iman-​is weḥd-​es neţţa d watmaten-​is, iserreḥ d imeṭṭi. Nezmer a nxayel acḥal i wehmen watmaten-​is imi ur ẓrin ara ayɣer yeţru. Ɣer taggara, Yusef yenna i watmaten-​is: ‘Nekk d Yusef. I baba, mazal-​it yedder?’

Atmaten-​is ggugmen zdat-​es seg wakken i ten-​iffeɣ leɛqel. Teṭṭef-​iten tugdi. Lameɛna Yusef inna-​yasen: ‘Di leɛnaya-​nwen, qerrbet-​ed ɣur-​i.’ Mi d-​uẓan ɣur-​es, inna-​yasen: ‘Nekk d gma-​twen Yusef i tezzenzem ɣer Maṣer.’

Yusef yenna-​yasen daɣen s leḥnana: ‘Ur ţlummut ara iman-​nwen imi i yi-​d-​tezzenzem ɣer dagi. Di tin n ṣṣeḥ, d Ṛebbi i yi-​d-​izzenzen ɣer Maṣer akken ad sellkeɣ aṭas n yemdanen. Ferɛun yerra-​yi d aneḥkam ɣef tmurt meṛṛa. Azzlet ihi tura ɣer baba, teḥkum-​as annect-​agi meṛṛa. Init-​as a d-​yas ɣur-​i akken ad yezdeɣ dagi.’

Umbeɛd Yusef iḥelbab (iɛenneq) atmaten-​is, izmeḍ-​iten ɣer wul-​is yerna yessuden-​iten. Mi gesla Ferɛun usan-​d watmaten n Yusef, yenna-​yas: ‘Eǧǧ-​iten ad ɛebbin i zzwayel-​nsen yerna ad ṛuḥen a d-​awin baba-​tsen ţ-​ţwaculin-​nsen akken ad zedɣen dagi. A sen-​fkeɣ amkan yifen akk wiyaḍ di tmurt n Maṣer.’

D ayen i xedmen. Baba-​s n Yusef yusa ɣer Maṣer neţţa ţ-​ţwacult-​is meṛṛa. Twalaḍ dagi m’akka ţţemḥelbaben neţţa d baba-​s?

Tawacult n Yeɛqub tuɣal ţ-​ţameqrant. Llan di 70 yid-​sen mi ṛuḥen ɣer Maṣer, ma neḥseb kan Yeɛqub d warraw-​is akk-​d warraw n warraw-​is. Llant daɣen tlawin, yerna bla ccekk aṭas n iqeddacen. Zedɣen di Maṣer akken ma llan. Ţţusemman At Isṛayil axaṭer ibeddel Ṛebbi isem n Yeɛqub s Isṛayil. D At Isṛayil ara yuɣalen d agdud n Ṛebbi ger yegduden meṛṛa. D ayen ara nwali ɣer zdat.

Laṣel n ddunit 45:1-28; 46:1-27.