TAQSIṬ TIS 24

Yusef ijeṛṛeb atmaten-​is

YUSEF yebɣa ad iẓer ma beddlen tikli ɛecṛa watmaten-​is neɣ mazal-​iten d imcumen. Dɣa yenna: ‘Kunwi d ixbaṛǧiyen (imucaṛen). Tusam-​d aţ-​ţwalim lexṣaṣ n tmurt-​nneɣ.’

Rran-​as: ‘Xaṭi, nusa-​d s nneyya-​nneɣ. D atmaten akk i nella. Zik nella di 12 yid-​nneɣ, lameɛna yiwen deg-​nneɣ ur d-​iban ara lateṛ-​is, ma d amecṭuḥ atan tura ɣer baba-​tneɣ.’

Yusef yesteɛmel ur ten-​yumin ara. Yerra win iţţusemman Cimɛun ɣer lḥebs, ma d wiyaḍ yeǧǧa-​ten ad awin učči ɣer tmurt-​nsen. Lameɛna uqbel ad ṛuḥen, yenna-​yasen: ‘M’ara d-​tuɣalem awit-​iyi-​d gma-​twen amecṭuḥ.’

Mi wwḍen ɣer Kanɛan, ḥkan i baba-​tsen Yeɛqub ayen akk yeḍran. Yeɛqub yeḥzen aṭas, dɣa isuɣ: ‘Zik d Yusef kan i gɣaben, tura yerna ɣur-​es ula d Cimɛun. D lmuḥal a kkun-​ǧǧeɣ aţ-​ţernum amaẓuẓ-​iw Binyamin.’ Lameɛna, imi qrib ad yekfu lqut, Yeɛqub yeţţuḥettem a ten-​yeǧǧ ad awin Binyamin ɣer Maṣer akken a d-​aǧwen lqut.

Yiwen wass, Yusef iwala teddun-​d watmaten-​is. Tergagi tasa-​s s lfeṛḥ mi gwala gma-​s amecṭuḥ Binyamin. Ur tesɛiḍ win i gɛeqlen seg-​sen belli argaz-​agi yesɛan lɛaḍima d Yusef. Tura ad ixdem yiwet n lḥaǧa akken ad ijeṛṛeb atmaten-​is i ɛecṛa.

Yumeṛ i iqeddacen-​is ad ččaṛen ticekkaṛin n watmaten-​is d lqut. Inna-​yasen daɣen ad rren taqbuct-​is n lfeṭṭa di tcekkaṛt n Binyamin bla ma faqen. Atmaten-​is ṭṭfen abrid, ṛuḥen. Mazal ur bɛiden ara mi gceggeɛ Yusef iqeddacen-​is ɣur-​sen. Mi ten-​qeḍɛen, iqeddacen-​nni nnan-​asen: ‘Acuɣer i tukrem taqbuct n lfeṭṭa n ssid-​nneɣ?’

Atmaten n Yusef rran-​asen: ‘Ur nukir ara taqbuct-​is. Muqlet, win wuɣur ara ţ-​tafem ilaq ad immet!’

Iqeddacen-​nni nudan di tcekkaṛin n watmaten n Yusef. Ufan taqbuct-​nni n lfeṭṭa di tcekkaṛt n Binyamin, akken i teţwaliḍ di ţţeswiṛa-​ya. Iqeddacen-​nni nnan-​asen: ‘Tzemrem akk aţ-​ţṛuḥem, ma d Binyamin a t-​nawi yid-​nneɣ.’ Acu ara xedmen tura ɛecṛa watmaten n Yusef?

Ṭṭfen akk abrid nutni d Binyamin ɣer wexxam n Yusef. Yusef yenna i watmaten-​is: ‘Tzemrem akken ma tellam aţ-​ţuɣalem s axxam-​nwen, ma d Binyamin ad yeqqim dagi w’ad yuɣal d akli-​w.’

Yahuda yenṭeq, yenna-​yas: ‘Ma yella uɣaleɣ s axxam mebla aqcic-​agi, ad immet baba axaṭer iḥemmel-​it nezzeh. Di leɛnaya-​k, anef-​iyi ad uɣaleɣ d akli-​k deg wemkan n weqcic-​agi, ma d neţţa eǧǧ-​it ad iṛuḥ d watmaten-​is.’

Yusef iwala belli beddlen watmaten-​is. Ur llin ara d imcumen am zik. A nwali d acu ara yexdem tura Yusef.

Laṣel n ddunit 42:9-38; 43:1-34; 44:1-34.