Yusef, keṛhen-t watmaten-is
TAQSIṬ TIS 21
Yusef, keṛhen-t watmaten-is
MUQEL acḥal yeḥzen yerna yuyes weqcic-a. Isem-is Yusef. Atan akken kan i t-zzenzen watmaten-is i yemdanen-agi iteddun ɣer tmurt n Maṣer. Dinna ad yuɣal Yusef d akli. Acimi i xedmen watmaten n Yusef lḥaǧa-yagi n diri? Axaṭer ţţasmen seg-s.
Baba-tsen Yeɛqub iḥemmel aṭas aṭas Yusef. Ibeggen-as-d belli iḥemmel-it akteṛ ɣef watmaten-is mi s-yefka yiwen uqendur urqim. Mi walan ɛecṛa watmaten n Yusef acḥal i t-iḥemmel baba-tsen Yeɛqub, bdan ţţasmen seg-s yerna keṛhen-t. Lameɛna tella ssebba nniḍen ɣef wacu i t-keṛhen.
Yusef yurga snat n tirga. Deg-sent iwala atmaten-is knan zdat-es. Asmi i sen-yeḥka tirga-yagi, keṛhen-t akteṛ.
Yiwen wass, asmi i ṛuḥen ad ksen lmal n baba-tsen, Yeɛqub iceggeɛ Yusef ad iṛuḥ ad issefqed amek i ţţilin watmaten-is. Mi t-walan a d-iteddu ɣur-sen, kra seg-sen nnan: ‘Eyyaw a t-nneɣ!’ Lameɛna Rawubin yellan d amenzu ger watmaten-is yenna-yasen: ‘Ur t-neqqet ara!’ Ihi ur t-nɣin ara lameɛna ṭṭfen-t, ḍeggren-t ɣer lbir yellan d ilem. Umbeɛd qqimen akken, ţţemcawaṛen acu ara s-xedmen.
Aţţan yiwet n terbaɛt n wat Ismaɛil tleḥḥu-d ɣur-sen. Yahuda yenna imiren i watmaten-is: ‘Eyyaw a t-nezzenz i wat Ismaɛil.’ D ayen i xedmen. Zzenzen Yusef s 20 twiztin n lfeṭṭa. Acḥal yecmet wayen i xedmen! Qquren wulawen-nsen!
Acu ara inin tura i baba-tsen? Zlan aqelwac, ddmen-d aqendur n Yusef dɣa gren-t deg idammen n uqelwac-nni. Mbeɛd ceggɛen aqendur-nni i baba-tsen Yeɛqub, nnan-as: ‘Atan d acu i nufa. Muqel ma d aqendur n Yusef neɣ ala.’
Yeɛqub iɛqel-it, dɣa iɛeggeḍ: ‘Ahat d lweḥc n lɣaba i t-iččan!’ D ayen i bɣan swaswa watmaten n Yusef ad yamen baba-tsen. Yeɛqub yeḥzen nezzeh. Acḥal n wussan neţţa yeţmeǧǧid fell-as. Lameɛna Yusef ur yemmut ara. A nwali tura d acu yeḍran yid-es mi t-wwin ɣer Maṣer.
