Yusef yekcem ɣer lḥebs
TAQSIṬ TIS 22
Yusef yekcem ɣer lḥebs
YUSEF yesɛa kan 17 n sna di leɛmeṛ-is mi t-wwin ɣer Maṣer. Dinna zzenzen-t i yiwen wergaz yeţţusemman Futifaṛ. Futifaṛ ixeddem ɣef Ferɛun yellan d agellid n Maṣer.
Yusef ixeddem s tezmert-is meṛṛa ɣef umɛellem-is Futifaṛ. Ɣef wannect-a, asmi i meqqer di leɛmeṛ, Futifaṛ yerra-t d lewkil ɣef wexxam-is meṛṛa. Ihi, acu i gxeddem Yusef di lḥebs-agi? Ţ-ţameṭṭut n Futifaṛ i d ssebba n wannect-a.
Asmi i guɣal d argaz, Yusef izyen aṭas. Tameṭṭut n Futifaṛ tebɣa aţ-ţeṭṭeṣ yid-es. Lameɛna ur s-yuɣ ara awal Yusef axaṭer yeẓra diri-t wannect-a. Tameṭṭut n Futifaṛ tezɛef nezzeh. Mi d-yekcem ihi wergaz-is s axxam, teskaddeb-as, tenna-yas: ‘Yusef d yir bnadem, iɛreḍ ad yeṭṭeṣ yid-i!’ Futifaṛ yumen tameṭṭut-is dɣa yezɛef aṭas ɣef Yusef. Ɣef waya i t-issekcem ɣer lḥebs.
Aneḥkam n lḥebs iwala s lemɣawla belli Yusef d argaz n lɛali. Ihi iwekkel Yusef, yerra-t d amḍebber ɣef imeḥbas meṛṛa. Yiwen wass, Ferɛun yezɛef ɣef lewkil-is n tissit d win iferrqen aɣrum-is, dɣa yerra-ten ɣer lḥebs. Yiwen yiḍ, urgan di sin yid-sen, mkul yiwen s targit-is, lameɛna ur ẓrin ara d acu i d lmeɛna-nsent. Azekka-nni, Yusef yenna-yasen: ‘Ḥkut-iyi-d tirga-nwen.’ Ḥkan-as tirga-nsen, imiren Yusef issefra-tent-id s tezmert n Ṛebbi.
Yusef yenna i lewkil-nni n tissit: ‘Mazal tlata wussan, Ferɛun a k-issufeɣ si lḥebs, imiren aţ-ţuɣaleḍ ɣer wemkan-ik.’ Yusef yenna-yas daɣen: ‘M’ara tiliḍ di beṛṛa, hdeṛ-as i Ferɛun fell-i, ɛiwen-iyi akken a n-ffɣeɣ si lḥebs.’ I win akken iferrqen aɣrum, Yusef yenna-yas: ‘Mazal tlata wussan kan, Ferɛun a k-ikkes aqerru.’
Mi ɛeddan tlata wussan, yeḍra meṛṛa wayen i d-yenna Yusef. Ferɛun yekkes aqerru i win akken iferrqen aɣrum, ma d lewkil-nni n tissit iffeɣ-ed si lḥebs, yuɣal ɣer lxedma-s. Lameɛna yeţţu yakk Yusef-nni! Ur yehdiṛ ara fell-as i Ferɛun, ɣef waya i geqqim Yusef di lḥebs.
Laṣel n ddunit 39:1-23; 40:1-23.
