Ḥyan-d sin warrac si lmut
TAQSIṬ TIS 68
Ḥyan-d sin warrac si lmut
MA YELLA yemmut weqcic amecṭuḥ, d acu ara tḥuss yemma-s ma yuɣal-ed ɣer tudert? Ahat aţ-ţefṛeḥ aṭas! Lameɛna win yemmuten, yezmer a d-yeḥyu? Yella wasmi i d-yeḍra waya?
Muqel argaz ţ-ţmeṭṭut-agi d weqcic-agi amecṭuḥ. Argaz-a d nnbi Ilyahu. Tameṭṭut-a d yiwet n taǧǧalt n temdint n Ṣurfat, ma d aqcic-agi yellan ger ifassen-is d mmi-s. Yiwen wass yuḍen weqrur-agi. Yuɣal yeţzid deg-s lehlak armi yemmut. Imiren Ilyahu yenna i yemma-s: ‘Efk-iyi-d mmi-m.’
Ilyahu yessuli aqcic-nni ɣer texxamt n ufella, yeẓẓel-it ɣef wusu. Dɣa yeẓẓull: ‘A Yahwa, err-as-d tudert i weqcic-agi.’ Imiren kan aqcic-nni yuɣal-it-id nnefs! Mbeɛd Ilyahu iṣubb-it-id d akessar, dɣa yenna i yemma-s: ‘Muqel, mmi-m yedder!’ Yemma-s n weqcic-nni teččuṛ d lfeṛḥ.
Yella nnbi nniḍen ameqran n Ṛebbi yeţţusemman Ilicaɛ. Yella d amɛiwen n Ilyahu. Yahwa yefka-yas tazmert ula i neţţa akken ad ixdem lbeṛhanat. Yiwen wass, Ilicaɛ iṛuḥ ɣer temdint n Cunim anda i tella yiwet n tmeṭṭut i s-ixedmen lxiṛ. Iɛedda lweqt, tameṭṭut-nni tesɛa-d aqcic.
Yiwen wass, asmi meqqer weqcic-nni, iṛuḥ ad iẓer baba-s ixeddmen di lexla. Taswiɛt kan iɛeggeḍ: ‘Aqerruy-iw, iqreḥ-iyi uqerruy-iw!’ Wwin-t s axxam, dɣa yemmut dinna. Acḥal i teḥzen yemma-s! S lemɣawla tṛuḥ a d-tawi nnbi Ilicaɛ.
Mi d-yewweḍ Ilicaɛ, iṛuḥ ɣer texxamt anda yella weqcic-nni yemmuten. Yeẓẓull Yahwa, mbeɛd yeẓẓel ɣef weqcic-nni. Imiren lǧeţţa n weqcic-nni tebda tḥemmu, dɣa iɛḍes-ed sebɛa iberdan. Acḥal i tefṛeḥ yemma-s mi twala yuɣal-ed mmi-s ɣer tudert!
Aṭas aṭas n yemdanen i gemmuten. Liḥala-ya tesseḥzan ayendin tiwaculin-nsen d leḥbab-nsen. Nekni ur nezmir ara a d-neḥyu lmeggtin. Lameɛna Yahwa neţţa yezmer. Ɣer zdat a nwali amek ara d-yeḥyu imelyan n yemdanen.
1 Igelliden 17:8-24; 2 Igelliden 4:8-37.
