Ṛebbi iɛawen Ḥizqiyahu
TAQSIṬ TIS 72
Ṛebbi iɛawen Ḥizqiyahu
TEẒRIḌ acuɣer ideɛɛu wergaz-agi ɣer Yahwa? Acimi yessa tibṛatin-agi zdat n uɛalṭar n Yahwa? Argaz-a isem-is Ḥizqiyahu. Yeḥkem ɣef tgelda n usammer n Isṛayil yesɛan sin leɛṛac. Agellid-agi yesɛa aɣilif ameqran. Teẓriḍ acimi?
Axaṭer yusa-d lɛeskeṛ n tmurt n Acur ad yeẓdem ɣef tgelda n sin n leɛṛac iɣef yeḥkem. Yuɣ lḥal At Acur ssengren yakan ɛecṛa leɛṛac n umalu. Yahwa iɛemmed ad yeḍru waya axaṭer yejhel wegdud.
Tibṛatin-agi yessa Ḥizqiyahu zdat n Yahwa ţ-ţid i s-d-iceggeɛ ugellid n Acur. Acu i d-yuran deg-sent? Agellid n Acur yumeṛ i Ḥizqiyahu ad yeknu zdat-es yerna yekkat-ed di Yahwa Ṛebbi. Ɣef wannect-a i geẓẓull Ḥizqiyahu, yenna: ‘A Yahwa, sellek-aɣ seg ufus n ugellid n Acur. Akka leǧnas meṛṛa ad ɛelmen belli d kečč kan i d Ṛebbi.’ Yahwa a d-iḥess i Ḥizqiyahu?
Ḥizqiyahu d agellid yelhan. Ur icuba ara yir igelliden n tgelda n ɛecṛa leɛṛac n Isṛayil, neɣ baba-s Aḥaz yellan d agellid n diri. Ḥizqiyahu yuɣ awal i leqwanen meṛṛa n Yahwa. Mi gfukk Ḥizqiyahu taẓallit-is, nnbi Icɛaya iceggeɛ-as lǧawab-agi i d-yekkan sɣur Yahwa: ‘Agellid n Acur ur d-ikeččem ara tamdint n Yarucalim. Ula d yiwen seg iɛsekṛiwen-is ur d-iţqerrib ɣur-es. Ur d-kkaten ula d yiwet n tḥeṛbunt ɣer temdint.’
Muqel ţţeswiṛa-ya. Teẓriḍ anwa-ten iɛsekṛiwen-agi meṛṛa yemmuten? D At Acur. Yahwa iceggeɛ-ed lmelk-is i genɣan deg yiwen yiḍ 185 000 n iɛsekṛiwen. Imiren agellid n Acur yekker, yuɣal ɣer tmurt-is.
Tagelda n sin leɛṛac teţţusellek, agdud yethedden kra n lweqt. Asmi i gemmut Ḥizqiyahu, d mmi-s Manaci i guɣalen d agellid. Ama d neţţa ama d mmi-s Amun i t-id-iḍefren ur llin d igelliden yelhan. Tamurt teččuṛ daɣen ţ-ţimenɣiwt akk-d leqher. Asmi i gemmut ugellid Amun s ufus n iqeddacen-is, d mmi-s Yucyahu i guɣalen d aneḥkam ɣef tgelda n sin leɛṛac.
2 Igelliden 18:1-36; 19:1-37; 21:1-25.