Ṛebbi yextaṛ Dawed
TAQSIṬ TIS 57
Ṛebbi yextaṛ Dawed
TWALAḌ d acu akka yeḍran? Aqcic-agi isellek-ed izimer amecṭuḥ seg uxenfuc n wursel. Ursel i teţwaliḍ dagi yemmeɣ ɣef izimer-a akken a t-yečč. Lameɛna aqcic-agi itbeɛ-iten, isellek-ed izimer-agi seg uxenfuc n wursel. Mi gekker wursel-nni a d-yezzi fell-as, aqcic-a yeṭṭef-it, iwet-it armi i t-yenɣa! Tikkelt nniḍen, isellek-ed ikerri seg yimi n yizem. Mačči d aqcic yesɛan ẓẓwara? Teẓriḍ anwa-t?
D yiwen ilemẓi iwumi qqaren Dawed. Yezdeɣ di temdint n Bit-Liḥim (Bitelḥem). Jeddi-s d Ɛubid, mmi-s n Rut akk-d Buɛaz. Tecfiḍ fell-asen? Dawed ikess lmal n baba-s yeţţusemman Icay. Dawed ilul ɛecṛa iseggasen mbeɛd mi gextaṛ Yahwa Cawul akken ad yuɣal d agellid.
Yiwen wass, Yahwa yenna i Camwil: ‘Ddem zzit yemxalafen ɣef tiyaḍ, tṛuḥeḍ s axxam n Icay yellan di Bit-Liḥim. Atan xtaṛeɣ yiwen seg warraw-is ara yuɣalen d agellid.’ Mi gwala Camwil mmi-s amenzu n Icay, yeţţusemman Ilyab, yenna deg yiman-is: ‘Mebla ccekk, d wagi i gextaṛ Yahwa.’ Lameɛna Yahwa yenna-yas: ‘Ur ţmuqul ara ɣer ṣṣifa-s neɣ ɣer lqedd-is ɛlayen. Mačči d neţţa i xtaṛeɣ ad yuɣal d agellid.’
Mbeɛd, Icay yessawel i mmi-s Abinadab, yesɛedda-t zdat n Camwil. Lameɛna Camwil yenna: ‘Mačči d wagi daɣen i gextaṛ Yahwa.’ Icay isɛedda-d mmi-s Cama. Camwil yenna: ‘Mačči d wagi daɣen i gextaṛ Yahwa.’ Icay yessken-as-d sebɛa warraw-is i Camwil, lameɛna Yahwa ur yextaṛ ula d yiwen deg-sen. Dɣa Camwil yesteqsa Icay: ‘D wigi kan i tesɛiḍ d arrac?’
Icay yerra-yas: ‘Mazal amecṭuḥ, atan ikess lmal di lexla.’ Mi d-wwin Dawed, Camwil iwala d aqcic icebḥen aṭas. Yahwa yenna: ‘D neţţa. Kker, smir zzit fell-as.’ D ayen yexdem Camwil. Qrib a d-yas wass ideg ara yuɣal Dawed d agellid n Isṛayil.
