TAQSIṬ TIS 58

Dawed d Gulyat

IFILISTIYEN uɣalen-​d daɣen ad mceččawen nutni d Isṛayil. Di lawan-​nni tlata watmaten imeqranen n Dawed llan di lɛeskeṛ n Cawul. Yiwen wass, Icay yenna i Dawed: ‘Ddem lkil n yirden d weɣrum, awi-​ten i watmaten-​ik, twaliḍ ma bxiṛ i llan.’

Mi gewweḍ Dawed ɣer wegrur anda yella lɛeskeṛ, yuzzel ɣer wennar n imenɣi akken ad yesteqsi ɣef watmaten-​is. Ataya yeffeɣ-​ed Gulyat, Afilistini bu lqedd ameqran, akken ad ilaqeb At Isṛayil. Iţeffeɣ-​ed ṣṣbeḥ tameddit azal n 40 n wussan. Dɣa iɛeggeḍ: ‘Xtiṛet gar-​awen argaz ara d-​iṣubben ad innaɣ yid-​i. Ma iɣleb-​iyi, inɣa-​yi, a nuɣal d aklan-​nwen. Lameɛna, ma ɣelbeɣ-​t, nɣiɣ-​t, aţ-​ţuɣalem d aklan-​nneɣ. Ass-​a cqarrweɣ-​kkun a d-​tafem win ara yi-​izemren.’

Dawed yesteqsa kra n iɛsekṛiwen: ‘D acu ara xedmen i wergaz ara yenɣen Afilistini-​yinna yerna ara yekksen ddel (lḥecma) ɣef Isṛayil?’

Yiwen uɛsekṛiw yerra-​yas: ‘Cawul a s-​yefk aṭas n ttrikat yerna a s-​yernu yelli-​s aţ-​ţuɣal ţ-​ţameṭṭut-​is.’

Lameɛna At Isṛayil akken ma llan ugaden Gulyat axaṭer meqqer aṭas di lqedd. Yesɛa seţţa iɣallen di lqedd (azal n tlata lmitrat). Yesɛa daɣen aɛsekṛiw ileḥḥun zdat-​es akken a s-​yerfed taseddarit-​is.

Kra ssawḍen i Cawul lexbaṛ belli Dawed yebɣa ad yennaɣ neţţa d Gulyat. Lameɛna Cawul yenna i Dawed: ‘Ur tezmireḍ ara aţ-​ţennaɣeḍ d Ufilistini-​yinna. Kečč d aqcic kan i telliḍ, ma d neţţa yella d argaz n ṭṭrad ṭṭul n leɛmeṛ-​is.’ Dawed yerra-​yas: ‘Nɣiɣ ursel akk-​d yizem iṛeffɛen lmal n baba. Akka ara teḍru d Ufilistini-​yinna. Yahwa a yi-​iɛiwen.’ Dɣa Cawul yenna: ‘Ṛuḥ, ad yili Yahwa Ṛebbi yid-​ek.’

Dawed iṣubb s asif, yeddem-​ed xemsa yeblaḍen leggaɣen, dɣa yerra-​ten zdaxel n ucekkaṛ-​is. Mbeɛd, iṛuḥ ad iqabel argaz-​nni aɣezfan s yildi (tirbulat) deg ufus-​is. Mi t-​id-​iwala Gulyat, yewhem aṭas. Yenwa ad ineɣ Dawed am wulac.

Gulyat yenna: ‘Eyya-​d ɣur-​i, ad fkeɣ lǧeţţa-​k i yefṛax akk-​d lewḥuc n lexla a ţ-​ččen.’ Lameɛna Dawed yerra-​yas: ‘Kečč tṛuḥeḍ-​d ɣur-​i s ssif, s umeẓrag akk-​d tmeẓragt. Nekk ṛuḥeɣ-​d ɣur-​ek s yisem n Yahwa. Ass-​agi a k-​isellem Yahwa ger ifassen-​iw, aţ-​ţemmteḍ.’

Dɣa Dawed yuzzel ɣer Gulyat. Yeddem-​ed ablaḍ seg ucekkaṛ-​is, yerra-​t deg yildi-​s, dɣa iwet yis Afilistini-​nni s lǧehd-​is meṛṛa. Aẓru-​nni yenta deg wenyir n Gulyat, dɣa yeɣli, yemmut! Mi walan Ifilistiyen belli lefḥel-​nsen yeɣli, bdan regglen. At Isṛayil tebɛen-​ten, ɣelben-​ten di lgirra.

1 Camwil 17:1-54.