TAQSIṬ TIS 61

Dawed yuɣal d agellid

CAWUL yeɛreḍ daɣen ad yeṭṭef Dawed. Yeddem ihi 3000 iɛsekṛiwen iẓewren, iṛuḥ ad inadi fell-​as. Mi gesla Dawed s lexbaṛ-​agi, iceggeɛ ixbaṛǧiyen ad walin anda yesbedd Cawul neţţa d iqeddacen-​is iqiḍunen-​nsen akken ad sɛeddin iḍ. Mi d-​uɣalen, Dawed yesteqsa sin seg iqeddacen-​is: ‘Anwa ara yeddun yid-​i ɣer wegrur n Cawul?’

Abicay yerra-​yas: ‘D nekk.’ Abicay d mmi-​s n Ṣaruyah, weltma-​s n Dawed. Dawed neţţa d Abicay ṛuḥen s leɛqel ɣer wegrur. Mi wwḍen, ufan Cawul d iqeddacen-​is ṭṭṣen. Ddmen ameẓrag n Cawul ţ-​ţbuqalt-​is n waman yersen ɣer tama n uqerruy-​is. Ula d yiwen ur ten-​iwala neɣ ur sen-​yesli axaṭer teɣder-​iten akk tnafa.

Muqel tura Dawed akk-​d Abicay. Ffɣen-​d seg wegrur, atnan di ṭṭmana ɣef yixef n tewrirt. Dawed iɛeggeḍ s ṣṣut ɛlayen i uneḥkam n lɛeskeṛ n Isṛayil: ‘A Abnir, acuɣer ur tɛusseḍ ara agellid-​ik? Muqel! Anda yella umeẓrag-​is, anda tella diɣen tbuqalt-​is n waman?’

Cawul yuki-​d, iɛqel taɣect n Dawed, dɣa yesteqsa: ‘D kečč aya a Dawed?’ Twalaḍ ukessar-​a Cawul akk-​d Abnir?

Dawed yerra i Cawul: ‘D nekk a sidi agellid. Ayɣer i teţnadiḍ a yi-​teṭṭfeḍ? Anta lɣelṭa i xedmeɣ? Atah umeẓrag-​ik ay agellid. Eǧǧ yiwen seg iqeddacen-​ik a d-​yali a t-​in-​yawi.’

Cawul yesteɣfer, yenna: ‘Denbeɣ, ţ-​ţisselbi i selbeɣ.’ Dɣa Dawed ikemmel abrid-​is, Cawul yuɣal s axxam-​is. Lameɛna Dawed yenna deg wul-​is: ‘Ass-​a neɣ azekka ad iyi-​ineɣ Cawul. Axiṛ-​iyi ihi ad rewleɣ ɣer tmurt n Ifilistiyen.’ Dawed yekker, yexdem ayen i d-​yenna. Dawed ikellex Ifilistiyen, yewwi-​ten ad amnen belli yedda tura yid-​sen.

Yiwen wass, kkren Ifilistiyen ad nnaɣen d Isṛayil. Cawul akk-​d Yunatan mmuten di sin di lgirra-​yagi. Dawed yeḥzen aṭas, dɣa yura yiwen usefru amelḥan anda icennu: ‘Aql-​i ḥezneɣ fell-​ak a gma Yunatan. Acḥal i teɛzizeḍ fell-​i!’

Ssyin d asawen, Dawed yuɣal ɣer Isṛayil, yezdeɣ di temdint n Ḥibṛun. Yiwen wass tekker lgirra ger wid yeddan d Ic-​Bucit, mmi-​s n Cawul, d wid yebɣan ad yuɣal Dawed d agellid. Ɣer taggara, d wid yeddan d Dawed i grebḥen lgirra. Dawed yesɛa 30 iseggasen di leɛmeṛ-​is asmi i guɣal d agellid. Yeḥkem sebɛa iseggasen d nnefṣ di Ḥibṛun. Dinna i s-​d-​lulen warrac i Dawed. Yiwen isem-​is Amnun, wayeḍ Abcalum ma d wis tlata Adunyahu.

Tura yewweḍ-​ed lawan ad iṛuḥ Dawed d lefḥul-​is ad ẓedmen ɣef yiwet temdint icebḥen aṭas, yeţţusemman Yarucalim. D Yuwab, mmi-​s nniḍen n Ṣaruyah, weltma-​s n Dawed, i gezwaren ɣer ṭṭrad. Dawed iǧuza-​t, yerra-​t d aneḥkam n lɛeskeṛ-​is. Tura Dawed yebda leḥkem di temdint n Yarucalim.

1 Camwil 26:1-25; 27:1-7; 31:1-6; 2 Camwil 1:26; 3:1-21; 5:1-10; 1 Amezruy 11:1-9.