Izabal, tagelliṭ tamcumt
TAQSIṬ TIS 66
Izabal, tagelliṭ tamcumt
MBEƐD lmut n ugellid Yarubɛam, igelliden meṛṛa iḥekmen ɣef ɛecṛa leɛṛac n Isṛayil llan d imcumen. Lameɛna, agellid Aḥab yugar-iten meṛṛa. Teẓriḍ acimi? Ssebba tameqrant ţ-ţameṭṭut-is Izabal yellan ţ-ţagelliṭ tamcumt.
Izabal ur telli ara seg wegdud n Isṛayil. D yelli-s n ugellid n temdint n Ṣidun. Teţɛebbid aṛebbit n lekdeb Baɛal yerna tewwi Aḥab d waṭas si wat Isṛayil ad ɛebden ula d nutni Baɛal. Izabal tekṛeh Yahwa yerna tessazzel idammen n waṭas n lanbeyya-ines. Wid i d-yeqqimen, ilaq-asen ad ffren di lɣiran akken ur ten-tneqq ara. M’ara tebɣu lḥaǧa, teţţaweḍ dima ɣer lebɣi-s ɣas ilaq aţ-ţneɣ albeɛḍ.
Yiwen wass, agellid Aḥab yeḥzen aṭas. Dɣa testeqsa-t Izabal: ‘Acuɣer akka i tḥezneḍ ass-a?’
Aḥab yerra-yas: ‘Ɣef ssebba n wayen i yi-d-yenna Nabut. Bɣiɣ ad aɣeɣ fell-as tafeṛṛant-is lameɛna yeggumma a yi-ţ-izzenz.’
Izabal tenna-yas: ‘Ur ţceggib ara iman-ik, d nekk ara k-ţ-id-iḥeṛṛen.’
Izabal tura tibṛatin, dɣa tceggeɛ-itent i kra n imeqranen n temdint anda yezdeɣ Nabut. Tenna-yasen: ‘Ddmet sin imejhal ara iberrḥen belli Nabut yenɛel Ṛebbi akk-d ugellid. Mbeɛd awit Nabut beṛṛa n temdint, tṛejmem-t alamma yemmut.’
Akken kan i ţ-id-yewweḍ lexbaṛ belli yemmut Nabut, Izabal tenna i Aḥab: ‘Kker aţ-ţeddmeḍ tafeṛṛant n Nabut.’ Ahat ula d kečč teqqareḍ-as deg yiman-ik belli tuklal Izabal lɛiqab imi texdem tawaɣit yecban tagi, neɣ ala?
Yusa-d lawan ideg iceggeɛ Yahwa yiwen wergaz iwumi qqaren Yihu akken a ţ-iɛaqeb. Mi tesla Izabal iteddu-d Yihu, tekker tkeḥḥel i wallen-is yerna tcebbeḥ iman-is. Mi d-yusa Yihu, yufa-ţ-id ɣef ṭṭaq. Yenna i yergazen yellan deg wexxam: ‘Ḍeggret-ţ-id d akessar!’ D ayen i xedmen yergazen-nni akken i teţwaliḍ di ţţeswiṛa. Ḍeggren-d Izabal tamcumt, dɣa temmut. Akka i tfukk ddunit fell-as.
1 Igelliden 16:29-33; 18:1-4; 21:1-16; 2 Igelliden 9:30-37.