TAQSIṬ TIS 71

Lǧennet yewɛed Ṛebbi

AŢŢAN ţţeswiṛa n lǧennet i gessken ahat Yahwa i Icɛaya, nnbi-​ines. Icɛaya iɛac cwiṭ kan n lweqt mbeɛd Yuna.

Acu i d lmeɛna n wawal-​agi “lǧennet”? D “leǧnan” neɣ d “tibḥirt”. Lǧennet i teţwaliḍ dagi ur k-​d-​tesmektay ara ayen i nwala di tazwara deg wedlis-​agi? Ur tcuba ara leǧnan-​nni icebḥen i ghegga Yahwa i Adam d Ḥewwa? Aţ-​ţuɣal lqaɛa meṛṛa d lǧennet yiwen wass?

Yahwa yumeṛ i nnbi Icɛaya a d-​immeslay ɣef lǧennet tajdiṭ yeţṛaǧun agdud n Ṛebbi ɣer zdat. Atan wayen i ɣ-​d-​yenna: ‘Ucen d izimer ad ɛicen lwaḥid di lehna. Aɛejmi d yizem amecṭuḥ ad ksen akken, aqrur ad yili d amenhaṛ-​nsen. Ula d llufan ara yuraren ɣer tama n wezrem iteqqsen ur t-​iţţaɣ wacemma.’

Ahat aṭas ara s-​yinin: ‘Annect-​agi d lmuḥal ad yeḍru. Si zik yella cceṛ ɣef lqaɛa yerna ad yili i dima.’ Lameɛna, xemmem ɣef waya: Amek i tga tnezduɣt i gefka Ṛebbi i Adam d Ḥewwa?

Ṛebbi issers-​iten di lǧennet. Armi d asmi i ɛuṣan Ṛebbi, i sen-​tṛuḥ tnezduɣt-​nsen. Imiren-​nni uɣalen d imɣaren yerna mmuten. Lameɛna, Ṛebbi iɛuhed belli ad yefk i wid i t-​iḥemmlen ayen akk i gṛuḥen i Adam d Ḥewwa.

Di lǧennet tajdiṭ i d-​iteddun, ulac d acu ara d-​yawin lqerḥ neɣ lexsaṛa. Aţ-​ţili lehna di mkul lǧiha. Imdanen meṛṛa ad ɛicen di sseɛd yerna ad sɛun ṣṣeḥḥa yelhan. Kullec ad yili akken i t-​yenwa Ṛebbi di tazwara. Ɣer zdat a nwali amek ara yaweḍ Ṛebbi ɣer lebɣi-​s.

Icɛaya 11:6-9; Aweḥḥi 21:3, 4.