Taqcict i gɛawnen Naɛaman
TAQSIṬ TIS 69
Taqcict i gɛawnen Naɛaman
TEẒRIḌ ɣef wacu i teţmeslay teqcict-agi tamecṭuḥt? Theddeṛ i tmeṭṭut-agi ɣef nnbi Ilicaɛ d leḥwayeǧ meṛṛa yessewhamen i gexdem s lemɛawna n Yahwa. Tameṭṭut-agi ur tessin ara Yahwa axaṭer ur telli ara seg wegdud n wat Isṛayil. Iḥqa, acu i txeddem teqcict-a deg wexxam-is?
Tameṭṭut-agi n wat Aram. Argaz-is d Naɛaman, ameqran n lɛeskeṛ n tmurt n Aram. Yiwen wass, At Aram ṭṭfen taqcict-agi tamecṭuḥt, wwin-ţ i tmeṭṭut n Naɛaman akken aţ-ţuɣal ţ-ţaqeddact-is.
Naɛaman yesɛa yir lehlak iwumi qqaren lbeṛs. Lbeṛs-agi d aṭan iweɛṛen aṭas, iqqazen irennu deg weksum. Atan ihi wayen i tenna teqcict-a i tmeṭṭut n Naɛaman: ‘Ah lukan ad iṛuḥ sidi ɣer nnbi n Yahwa yellan di tmurt n Isṛayil, a t-isseḥlu si lbeṛs-is!’ Mbeɛd ssawḍen imeslayen-a i Naɛaman.
Naɛaman yebɣa ad iḥlu. Yeggull ihi ad yaweḍ tamurt n Isṛayil. Mi gelḥeq ɣer dinna, iṛuḥ ɣer wexxam n Ilicaɛ. Ilicaɛ iceggeɛ aqeddac-is a s-yini i Naɛaman ad iṛuḥ ad yeccucef sebɛa n tikkal deg wasif n Uṛdun. Annect-agi isserfa Naɛaman, dɣa yenna: ‘Eɛni isaffen n tmurt-iw ur ifen ara isaffen meṛṛa n Isṛayil?’ Imiren yeṭṭef abrid-is s wurrif ameqran.
Lameɛna yiwen uqeddac-is yenna-yas: ‘A sidi, lemmer d ayen iweɛṛen i k-d-issuter Ilicaɛ, tili a t-txedmeḍ. Acimi ihi ur teccucufeḍ ara akken i k-t-id-yenna?’ Naɛaman yuɣ awal i uqeddac-is, dɣa iṛuḥ iger iman-is sebɛa iberdan deg wasif n Uṛdun. Mi d-yeffeɣ, lǧeţţa-s meṛṛa teṣfa, teḥla!
Naɛaman yeččuṛ d lfeṛḥ. Yuɣal ɣer Ilicaɛ, yenna-yas: ‘Tura steɛṛfeɣ belli d Ṛebbi n Isṛayil i d Ṛebbi n ṣṣeḥ di ddunit meṛṛa. Di leɛnaya-k ihi, ṭṭef tarzeft-agi seg ufus-iw.’ Lameɛna Ilicaɛ yerra-yas: ‘Xaṭi, ur ţ-ţţaṭṭafeɣ ara.’ Ilicaɛ yeẓra diri ma yeṭṭef tikci-ya axaṭer d Yahwa i gesseḥlan Naɛaman. Lameɛna Giyḥazi, aqeddac n Ilicaɛ, neţţa yebɣa tarzeft-agi.
Giyḥazi yeǧǧa ṭṭmeɛ a t-isderɣel. Mi gṛuḥ Naɛaman, Giyḥazi yuzzel deffir-es, yenna-yas: ‘Iceggeɛ-iyi-d Ilicaɛ a k-d-iniɣ belli yebɣa kra si tikciwin-nni i yeḥbiben i d-yerzan fell-as.’ D ayen ibanen, annect-agi d lekdeb. Lameɛna Naɛaman neţţa ur yeẓri ara belli d lekdeb, dɣa yefka i Giyḥazi aṭas n leḥwayeǧ.
Mi guɣal Giyḥazi s axxam, Ilicaɛ yeẓra d acu i gexdem axaṭer ixebbeṛ-it-id Yahwa. Dɣa yenna-yas: ‘Imi txedmeḍ ayen icemten, lbeṛs-nni n Naɛaman a k-inṭeḍ.’ Din din, Giyḥazi yehlek lbeṛs!
Acu i nezmer a neḥfeḍ si temsalt-agi? Lḥaǧa tamezwarut, ilaq a necbu taqcict-nni tamecṭuḥt w’a neţmeslay ɣef Yahwa. Annect-a yezmer a d-yawi ayen ilhan i wid i ɣ-d-izzin. Lḥaǧa tis snat, ur ilaq ara a neţkebbir iman-nneɣ am Naɛaman di tazwara, lameɛna ilaq a neţţaɣ awal i iqeddacen n Yahwa. Lḥaǧa tis tlata, ur ilaq ara a neskiddib am Giyḥazi. Nezmer a nestenfeɛ mliḥ s leqraya n Wedlis Iqedsen, neɣ ala?
