Tarewla n Dawed
TAQSIṬ TIS 59
Tarewla n Dawed
DAWED yenɣa Gulyat, imiren Abnir, yellan d aqerru n lɛeskeṛ, yewwi-t zdat n Cawul. Dawed iɛǧeb aṭas i ugellid Cawul. Yerra-t d aneḥkam n lɛeskeṛ-is yerna yeǧǧa-t ad yezdeɣ deg wexxam-is.
Yiwen wass, asmi i d-uɣalen iɛsekṛiwen si lgirra i xedmen d Ifilistiyen, ffɣent-ed tlawin, cennunt: ‘Cawul yenɣa luluf ma d Dawed yenɣa tiɛceṛtin n luluf.’ Cawul yuɣal yusem axateṛ ccan i fkant tlawin i Dawed yugar win i s-fkant i neţţa. Lameɛna Yunatan, mmi-s n Cawul, neţţa, ur yesɛi ara tismin. Iḥemmel aṭas Dawed, Dawed iḥemmel-it ula d neţţa. Dɣa di sin myefkan lemɛahda ad qqimen d iḥbiben i lebda.
Dawed yewwi-d iman-is di tyita n snitra. Cawul iḥemmel ayendin lmusiqa n Dawed. Lameɛna tismin wwint Cawul ad yexdem lexsaṛa. Yiwen wass, asmi i gekkat Dawed snitra, Cawul yeddem-ed ameẓrag-is, dɣa iwet yis Dawed. Yenna: ‘A t-semmṛeɣ di lḥiḍ!’ Ccwi kan Dawed iwexxeṛ-as, ur t-innul ara. Iɛedda kra n lweqt, Cawul iwet Dawed tikkelt nniḍen s umeẓrag, lameɛna ur t-iḥuza ara. Dawed yefhem ihi belli ilaq-as ad iɛass iman-is.
Tecfiḍ ɣef lemɛahda i gexdem Cawul? Yenna ad yefk yelli-s akken aţ-ţuɣal ţ-ţameṭṭut n wergaz ara yenɣen Gulyat. Ɣer taggara Cawul yenna i Dawed a s-yefk yelli-s Mixal, lameɛna uqbel, ilaq ad ineɣ 100 Ifilistiyen. Twalaḍ! Cawul yeţmenni-yas lmut i Dawed ger ifassen n Ifilistiyen. Lameɛna ur s-zmiren ara i Dawed, dɣa Cawul yefka-yas yelli-s aţ-ţezweǧ yid-es.
Yiwen wass, Cawul yenna i mmi-s Yunatan d iqeddacen-is meṛṛa belli yebɣa ad ineɣ Dawed. Lameɛna, Yunatan yenna i baba-s: ‘Ur teẓẓel ara afus-ik ɣef Dawed. Leɛmeṛ i k-ixdem ayen n diri, lameɛna siwa ayen yelhan d wayen i k-inefɛen i k-ixdem. Imekken iman-is i lmut asm’akken i genɣa Gulyat. Ass-nni tfeṛḥeḍ mi twalaḍ annect-nni.’
Cawul yuɣ awal i mmi-s Yunatan, dɣa yeggull ur ixeddem acemma i Dawed. Ihi, Dawed yuɣal ɣer leqdic-is i gxeddem zik deg wexxam n ugellid Cawul. Lameɛna, yiwen wass, Dawed yella yekkat snitra, Cawul yeddem-ed ameẓrag-is, iwet yis Dawed tikkelt nniḍen. Acu kan Dawed iwexxeṛ-as, ameẓrag-nni yenta di lḥiḍ. Wagi d abrid wis tlata! Tura Dawed yefhem belli ilaq-as ad yerwel!
Iḍ-nni, Dawed iṛuḥ s axxam-is. Lameɛna Cawul iceggeɛ kra n yergazen a t-nɣen. Mixal teɛlem lmeqsud n baba-s, dɣa tenna i wergaz-is: ‘M’ur terwileḍ ara iḍ-agi, azekka aţ-ţemmteḍ.’ Iḍ-nni Mixal tɛawen Dawed ad iɛeddi si ṭṭaq akken ad yerwel. Azal n sebɛa iseggasen, Dawed iţṛuḥu ad yeffer deg wemḍiq ɣer wayeḍ akken ur t-iţţaf ara Cawul.
