Yuna akk-d uḥutiw ameqran
TAQSIṬ TIS 70
Yuna akk-d uḥutiw ameqran
MUQEL argaz-agi yellan deg waman. Atan di ccedda tameqrant! Qrib a t-issebleɛ uḥutiw-agi! Teẓriḍ anwa-t wergaz-agi? Isem-is Yuna. Acu i t-yewwin ɣer liḥala yecban ta?
Yuna d nnbi i gessexdem Yahwa. Ur iɛedda ara aṭas n lweqt mbeɛd lmut n Ilicaɛ, mi gumeṛ Yahwa i Yuna: ‘Kker, ṛuḥ ɣer temdint tameqrant n Ninib. Cceṛ i xeddmen imezdaɣ-is meqqer aṭas. Ɣef wannect-a i bɣiɣ a sen-temmeslayeḍ.’
Lameɛna Yuna, ur ibɣi ara ad iṛuḥ. Dɣa yuli ɣer yiwen lbabuṛ ara iṛuḥen ɣer lǧiha ixulfen tin n Ninib. Yahwa ur yefṛiḥ ara s trewla n Yuna, dɣa yessker-ed tabuciḍant tameqrant. Aḍu iţsuḍu s lǧehd-is meṛṛa armi qrib ad yeɣreq lbabuṛ-nni. Ixeddamen n lbabuṛ (ibeḥṛiyen) tweḥḥcen, dɣa bdan ţɛeggiḍen ɣer iṛebbiten-nsen akken a ten-ɛiwnen.
Ɣer taggara, Yuna yenna-yasen: ‘D Yahwa i ţɛebbideɣ, Ṛebbi i d-ixelqen igenni d lqaɛa. Aql-i rewleɣ akken ur xeddmeɣ ara ayen i yi-d-yumeṛ.’ Ihi irgazen-nni nnan-as: ‘Acu i glaq a k-nexdem akken aţ-ţeḥbes tbuciḍant?’
Yuna yerra-yasen: ‘Ḍeggret-iyi si lbabuṛ iwakken a kkun-ihenni lebḥeṛ.’ Irgazen-nni ugin a t-ḍeggren. Lameɛna mi walan tabuciḍant simma teţzid, ḍeggren Yuna s aman. Imiren kan teḥbes tbuciḍant, dɣa yers lebḥeṛ.
Yuna izder deg waman, dɣa yessebleɛ-it yiwen uḥutiw annect-ila-t. Ur yemmut ara lameɛna yeqqim deg uɛebbuḍ n uḥutiw-agi tlata wussan akk-d tlata wuḍan. Yuna yendem aṭas imi ur yuɣ ara awal i Yahwa yerna ur iṛuḥ ara ɣer Ninib. Teẓriḍ d acu i gexdem?
Yuna idɛa ɣer Yahwa akken a t-iɛiwen. Yahwa yewwi aḥutiw-nni a d-yerr Yuna ɣef lqaɛa. Mbeɛd Yuna iṛuḥ ɣer Ninib. Ur a ɣ-d-tbeggen ara teqsiṭ-agi acḥal yesɛa azal a nxeddem dima ayen i d-yeqqar Yahwa?
Adlis n Yuna.