AḤRIC WIS 7

Si ḥeggu n Ɛisa ar unekcum n Bulus ɣer lḥebs

Ɛisa yeḥya-​d si ger lmeggtin ass wis tlata mbeɛd lmut-​is. Ass-​nni ibeggen-​ed iman-​is i inelmaden-​is xemsa iberdan. Ṛebɛin n wussan yesskanay-​ed iman-​is i wid yeddan yid-​es. Mbeɛd yuli s igenni zdat n wallen n kra n inelmaden. Mi ɛeddan ɛecṛa wussan, Ṛebbi issers-​ed ṛṛuḥ iqedsen ɣef inelmaden n Ɛisa yellan ţṛaǧun di temdint n Yarucalim.

Ssyin, iɛdawen n Ṛebbi rran imceggɛen ɣer lḥebs, lameɛna yiwen n lmelk issufeɣ-​iten-​id. Ixṣimen n Ɛisa ṛejmen anelmad Stifan armi yemmut. Lameɛna a nwali amek i gextaṛ Ɛisa yiwen ger yeɛdawen-​agi akken a t-​yerr d aqeddac-​is ameqran i guɣalen ɣer zdat d amceggeɛ Bulus. Mi ɛeddan tlata iseggasen d nnefṣ mbeɛd lmut n Ɛisa, Ṛebbi iceggeɛ Buṭrus akken ad iberreḥ i Kurnilyus ur nelli ara d Uday.

Mi ɛeddan wazal n 13 iseggasen, Bulus yebda aṣafer-​ines amezwaru akken ad iberreḥ. Deg uṣafer-​ines wis sin, Timuti yedda yid-​es. A nwali amek i gesɛedda Bulus neţţa d yerfiqen-​is iṣufren yid-​es aṭas n teswiɛin igerrzen di leqdic i Ṛebbi. Ɣer taggara, Bulus yeţwaḥbes sin iseggasen di temdint n Ṛuma, umbeɛd yeffeɣ-​ed. Lameɛna, yuɣal tikkelt tis snat ɣer lḥebs. Dinna i t-​nɣan. Aḥric wis sebɛa a d-​immeslay ɣef wazal n 32 iseggasen.